Украина оваа недела ќе испрати делегација во Вашингтон за да ги унапреди преговорите за стратешко партнерство со САД во областа на минералите, изјави министерката за економија, Јулија Свириденко.

„Овој дијалог ги претставува стратешките интереси на двете земји и нашата заедничка посветеност за градење силно, транспарентно партнерство“, рече Свириденко.

Во делегацијата ќе има претставници на украинските министерства за економија, надворешни работи, правда и финансии.

Свириденко додаде дека целта на преговорите е да се постигне договор меѓу страните за избор на проекти, законски рамки и механизми за долгорочни инвестиции во минерални суровини.

Договорот требаше да биде потпишан на крајот на февруари за време на посетата на украинскиот претседател Володимир Зеленски на Белата куќа. Сепак, договорот беше одложен по жестоката расправија меѓу Зеленски и претседателот Доналд Трамп и потпретседателот Џеј-Ди Венс кога украинскиот лидер ги доведе во прашање напорите на САД за дипломатски крај на тригодишната војна во Украина.

Минатиот месец Зеленски рече дека Америка му испратила на Киев нова и сосема поинаква верзија на нацрт-договорот за минерални суровини, кој би им овозможил на САД пристап до природните ресурси на Украина во замена за натамошна воена поддршка.

Трамп одговори дека Зеленски очигледно сака да се повлече од договорот и предупреди дека украинскиот лидер ќе се соочи со големи проблеми доколку го стори тоа.

Пентагон го разгледува предлогот за повлекување до 10.000 американски војници од Источна Европа, што предизвика загриженост кај американските и европските претставници, објави „Ен-би-си њуз“ повикувајќи се на шест извори запознаени со планот.

Тие се од силите распоредени од американската армија по руската инвазија на Украина во 2022 година. Тогаш администрацијата на претседателот Џо Бајден испрати дополнителни 20.000 војници во источното крило на НАТО за да ја зајакне одбраната на сојузниците по должината на украинската граница. Според информациите на Ен-би-си, сегашниот предлог вклучува можност за повлекување до половина од овие сили.

Дискусијата за намалување на военото присуство доаѓа во време кога Доналд Трамп се обидува да го убеди рускиот претседател Владимир Путин да се согласи на прекин на огнот во Украина, тврдат американски извори.

Администрацијата на Трамп јасно стави до знаење дека очекува европските сојузници да преземат поголема одговорност за сопствената одбрана бидејќи Вашингтон сака да ги пренасочи воените ресурси кон Кина и другите глобални приоритети.

Во февруари новиот министер за одбрана на САД, Пит Хегсет, за време на својата прва надворешнополитичка посета на Брисел изјави дека „стратешките околности не дозволуваат САД да бидат првенствено фокусирани на безбедноста на Европа“. Фокусот, рече тој, ќе биде на одбраната на јужната граница на САД и на одвраќањето на Кина.

Според Ен-би-си, некои европски функционери стравуваат дека овој потег може да се сфати како знак за американско повлекување од Европа, што според нив ќе ја охрабри Русија.

„Русија би го протолкувала намалувањето на американските сили како слабеење на одвраќањето и би била поподготвена да се меша во европските работи“, изјави Сет Џонс од Центарот за стратешки и меѓународни студии (ЦСИС).

Бен Хоџис, пензиониран генерал, кој командуваше со американските сили во Европа, предупреди дека повлекувањето значително ќе ги ослаби одбранбените способности: „Полска и Романија ја зајакнуваат својата одбрана, но тоа сепак ќе остави празнина, што некој ќе треба да ја пополни“, рече тој.

На сослушувањето во Сенатот републиканскиот сенатор Роџер Викер ја критикува можноста за повлекување:

„Длабоко сум загрижен за опасните ставови на некои бирократи од среден ранг во Министерството за одбрана. Тие работат на повлекување на САД од Европа – честопати без знаење на министерот за одбрана“.

Ен-би-си пренесува дека портпаролот на Пентагон не го коментирал случајот, а американската војска исто така одбила да даде официјална изјава.

Во исто време, администрацијата на Трамп спроведува кратења во буџетот за одбрана, а повлекувањето на дел од силите од Европа би овозможило прераспределба на средствата во Индо-пацифичкиот Регион, кој Вашингтон го смета за постратешки важен.

Речиси една петина од луѓето што ги регрутираат руските специјални служби за задачи во Украина се малолетници, кои биле користени за подготовка на саботажа или терористички напади, изјави портпаролот на Службата за безбедност на Украина (СБУ), Артем Дехтаренко, во коментар за „Укринформ“.

„Русите за своите задачи најмногу регрутираат малолетници, невработени и луѓе со разни видови зависности. Според нашата статистика, 22 отсто од откриените сторители се малолетни, 55 се невработени, а другите се лица со криминално досие за разни кривични дела“, рече Дехтаренко.

Дехтаренко објасни дека малолетниците се поподложни на психолошка манипулација бидејќи младите не се во можност целосно да ги проценат последиците од своите постапки.

Портпаролот истакна дека подметнувањето пожари врз возила на украинските вооружени сили и саботажи на железницата се интензивирале во мај 2024 година, а масовното регрутирање деца за организирање експлозии почнало на почетокот на 2025 година.

„Од почетокот на 2025 година руските специјални служби повторно покажаа дека немаат црвени линии и дека се префрлија на терористички напади со употреба на експлозиви. Тие регрутираат, меѓу другото, тинејџери за такви злосторства“, рече Дехтаренко додавајќи дека најмладите извршители на руските наредби откриени од СБУ за време на палењето на канцелариите на Укрзалиц имле само 13 години.

Дехтаренко изјави дека, според податоците на Службата за безбедност на Украина, само во 2025 година СБУ и Националната полиција откриле повеќе од 50 малолетници, кои по наредба на Руската Федерација учествувале во терористички напади, палење автомобили и други злосторства.