Денеска застанувам пред вас и ве повикувам во финалната битка за враќање на слободата, демократијата, правдата и економската перспектива за сите граѓани на нашата Македонија, порача лидерот на СДСМ Зоран Заев, во обраќањето на отворањето на 19 програмски конгрес.

Тој рече дека во Македонија треба и мора да се случат промени и дека тоа е незапирлив процес.

„Време е за промени! Крајно време е за слобода и демократија! Крајно време е за единство и еднаквост! Крајно време е да им ја вратиме украдената држава на граѓаните“, повика Заев.

Според претседателот на СДСМ, власта намерно го одолговлекува преговарачкиот процес, со единствена цел, да дојде до уште едни, како што рече, криминални избори. 

„Кражба на уште едни избори нема да има… Неопходен е беспрекорен предизборен и изборен процес. Нема бегање од Договорот од Пржино“, истакна Заев.

Тој укажа дека СДСМ заедно со коалициските партнери се подготвува за чист изборен процес на којшто ќе биде изразена слободната волја на граѓаните.

„Работиме на создавање услови за фер избори, однесувајќи се трпеливо и грижливо кон  својата земја“, рече Заев, при тоа додавајќи дека ќе ги преземат сите потребни чекори ако некој застане на патот на интересите на граѓаните и на Република Македонија.

Според него, нема да дозволат она што досега го направиле, да падне во вода.

„Зарем некој сè уште се надева дека ќе дозволиме преку купување време да дојдат изборите, а да нема навремено регулирани медиуми, преку купување време да дојде датумот за избори, а да нема навремено оформено нов состав на ДИК, зарем некој сè уште се надева дека токму сега на крајот ќе дозволиме преку купување време да дојде 24 април, а да не е навремено завршено прочистувањето на избирачкиот список?“, праша Заев.

Тој додаде дека избори ќе има само и единствено кога ќе бидат исполнети сите предуслови за кристално чисти избори.

Заев ја обвини актуелната власт дека сонува за нов почеток, но не за граѓаните туку, како што рече, за себе, за нови парцели на Водно, мерцедеси, богатства…

Ја обвини власта и за сиромаштијата, за блокираните сметки на секоја трета фирма, како и за затворените фирми, за загадувањето на воздухот, за лошата состојба во здравството, во образованието, за заминувањето на младите луѓе од земјата…

„Еве затоа Специјалното обвинителство има толку многу работа. Нема веќе Јанкулоска на Зврлевски, па: ‘Види, вака-така, отфрли ја пријавата’. Можат да продолжат да сонуваат за својот нов почеток, но дојден е нивниот крај. Оваа власт одзеде 10 години живот на граѓаните на Македонија. Оваа криминална власт, за ова што го стори, ќе одговара“, порача Заев.

Претставувајќи ја Програмата, рече дека та е дело на програмскиот тим на партијата, комисиите на партијата, заедно со внатрешни членови, но земени се предвид и мислења, сугестии, предлози од надворешни соработници, граѓани, стручната јавност, невладиниот сектор и од интелектуалците.

„Нашата клучна цел е Македонија да биде земја со бројна и економски стабилна средна класа, не општество на мала група многу богати и мнозинство сиромашни граѓани! Стабилната средна класа ќе биде гарант и носител на демократска и слободна Република Македонија“, рече Заев.

Според него, за време на оваа власт, Македонија стана држава со најголема социјална раслоеност во Европа. 

„Со политиките на Груевски и кумот Ставрески, доходот се слева кон мала група луѓе во власта што се богати, а осиромашуваат сите останати. Ставаме крај на овој начин на владеење и почнуваме обнова на Македонија! Парите ќе ги вратиме на граѓаните! Ќе ги вратиме среќата и достоинството на сите граѓани на нашата Македонија“, нагласи Заев.

Потсети дека општеството ќе го постават на пет столбови.

„Со нив, ќе ги застанеме луѓето на нозе, ќе ја обезбедиме нивната егзистенција, ќе ја стабилизираме економијата. Таму каде што има економска сигурност, таму има борба за демократија и слобода“, рече Заев.

Најави одговорно владеење, транспарентност во трошењето на јавните пари, стручност и искуство при вработувањето, реорганизација каде што има превработеност во администрацијата.

Потоа уште најави и флексибилно работно време и институции отворени до 20 часот, уставни измени за исклучување на министерот за правда од Судскиот совет, законска основа со јасни критериуми за избор и напредување на судиите, намалување на судските такси, вистинска бесплатна правна помош за ранливите категории граѓани.

„Две години по преземањето на власта, ќе создадеме правен основ јавниот обвинител на Република Македонија да се избира по предлог на опозицијата. Нема повеќе МВРО-МВР, полицијата ќе бидат ‘сервис на граѓаните’. Видовте како почнавме да работиме. Ќе го вратиме полицаецот – позорникар, нашиот пријател во маалото“, најави Заев.

Тој уште рече дека ќе го подобрат стандардот на и квалитетот на животот на припадниците на МВР така што ќе ги распоредат според местото на живеење, ќе ја укинат радиодифузната такса, ќе ја вратат евтината тарифа на струјата, ќе создадат услови за слободна работа на медиумите.

„Ќе воведеме праведен даночен систем. Ќе го укинеме рамниот данок на ВМРО-ДПМНЕ со којшто сите граѓани плаќаат данок на доход по иста даночна стапка без разлика колкави се нивните плати, пензии и останати приходи“, рече Заев.

Лидерот на СДСМ најави дека ќе воведат програми за извлекување од сиромаштијата, реформи на социјалниот систем, заштита на секое дете, преку професионализација на улогата на згрижувачките семејства, еднакви родителски права по разводот, помош од државата за семејствата со еден родител, покрив за бездомните лица, гонење на сите насилници во семејствата и заштита на жртвите.

„Ќе се посветиме на развој на домашните мали и средни претпријатија и ќе ја зголемиме драстично државната помош за нив од 200 илјади евра, на 20 – 50 милиони евра. Ќе го поддржуваме приватниот сектор преку програми за сопствен бизнис. Ќе креираме деловни старт-ап центри во сите поголеми општини, во коишто државата ќе обезбеди деловен простор за повеќе ново-основани компании. Ќе создадеме можност за основање посебен вид трговско друштво со минимален износ на основна главнина од 1 евро“, истакна Заев.

Најави и дека ќе работат на привлекување и на домашни, но и странски инвестиции. Во делот на инфраструктурата  рече дека нивна намера е на секој граѓанин, без разлика дали живее во град или во село, да му се овозможат да има свој пристапен пат, водовод и канализација, елементарни услови за 21 век. 

„Предвидуваме вложување во 600 километри автопатишта и експресни патишта, 550 километри магистрални и регионални патишта,1000 километри локални патишта. Планираме модернизација и проширување на железничка инфраструктура во Република Македонија, брза пруга Табановце – Гевгелија. Предвидуваме приградски патнички сообраќај што ќе се состои од 4 краци во и околу Скопје“, рече Заев.

Покрај тоа, првиот човек на социјалдемократите, најави воведување на механизам за поголема сигурност кај граѓаните за квалитетот на градбите, како и конкретни планови за развој и работа на енергетските капацитети во земјава  со што ќе намалат трошоците за енергија во Македонија.

„Македонското сонце да биде извор на енергија за секое домаќинство. Природениот гас да биде достапен во цела Македонија. Со изградба на магистрални гасоводи до сите урбани средини и со изградба на дистрибутивни мрежи ќе овозможиме користење на природениот гас, како евтин и еколошки енергенс за секого во земјава. Исклучените потрошувачи од системот за парно греење нема да бидат должни да плаќаат надоместоци за топлинска енергија“, истакна Заев.

Во делот на земјоделието, најави вистински земјоделски развој и достоинствен живот за земјоделците, ревизија на државно земјоделско земјиште и негова правилна распределба, повисоки и навремени субвенции, ослободување на земјоделците од персоналниот данок, еднаков третман при пензионирање за земјоделците, зелена нафта како гориво за земјоделството, како и пласман на земјоделскиот производ по достоинствени цени.

Најави и европска иднина на граѓаните и квалитетен живот.

„ Уште на почетокот на мандатот ќе направиме јавна расправа за промена на концептот на образование, по примерот на една земја од Европската унија, ќе го укинеме екстерното тестирање, ќе ги намалиме наставните содржини во основното и во средното образование, ќе ја вратиме автономијата на универзитетот и достоинството на професорите, ќе воведеме практична настава во средните училишта и на факултетите“, рече Заев.

За младите најави проект “Гаранција за млади“, поддршка за вработување, студентска платежна картичка.

„Ќе ги задржиме лекарите во Македонија. Зголемување на платите на здравствените работници.Ќе ги вратиме јавните стоматолошки амбуланти во училиштата. Обединување на Клиничкиот центар со функционално поврзани клиники“, рече Заев.

Според нивната Програма, предвидена е изградба на нова и современа еколошка инфраструктура. Мониторинг системи за квалитет на воздух, вода и почва.

„Ќе обезбедиме поволни кредити за замена на еколошките застарени технолошки линии и инсталација на ефикасни системи за намалување на загадувачките емисии. Ќе спроведеме вистинска, ефикасна контрола и спречување на загадувањето“, истакна Заев.

Меѓу другото, најави темелно преиспитување на проектот “Скопје 2014“, отстранување на промовирањето на кичот од страна на државата, нова конкуренција на мобилните оператори, интернет во секое место, рамномерен регионален развој на целата територија на земјата, како и намалување на цензусот за референдумско изјаснување на граѓаните за прашања од локално значење.

Заев најави и нова енергија во евроатлантските интеграции.

„Членството во НАТО и ЕУ се наши стратегиски определби. Знаеме дека е погрешно да се мисли дека членството во НАТО и ЕУ сами по себе ќе ја подобрат нашата иднина. Но, без интеграција во ЕУ и НАТО, државата нема иднина, посебно кога сите останати држави од регионот напредуваат во тој правец“, рече Заев.

Уште рече дека идната влада што ќе ја предводи СДСМ реално ќе се ангажира за надминување на наметнатиот спор од страна на Грција, но нема да прифати никаков разговор за идентитетски прашања

„За можните решенија остануваме на определбата за референдумско изјаснување на граѓаните“, подвлече Заев.

Според него, нивна цел е почеток на преговори за членство во ЕУ најдоцна до 2017 година.

„Ќе обезбедиме достоинствено функционирање на војниците. Ќе обезбедиме буџет за потребите на одбранбениот сектор и финансирање на одбраната согласно НАТО стандардите. Ќе обезбедиме ефикасен систем за управување со персоналот во МО и АРМ“, рече Заев.

Тој уште најави градење на граѓанска држава на сите што живеат во Македонија.

„Планираме воведување елементи на мултикултурно образование, мултикултурно запознавање за сите деца уште во најраната возраст, преку проекти и активности што развиваат чувство на слобода, толеранција и соживот. Планираме заштита на јазиците на другите заедници, афирмирање и унапредување на културата на припадниците на заедниците. Во Македонија, сите ќе имаат еднакви права“, додаде Заев.

Најави и спроведување на Попис на населението, според меѓународни критериуми и стандарди. /крај/со/ст