Македонија
(Видео) Џељаљ Бајрами: Ако има индиции за сторени кривични дела во Сарај или други места, ќе има и кривични пријави
Во текот на организирањето и спроведувањето на референдумот регистрирани се 40 нарушувања во врска со остварување на правото на глас и референдумот, информираше на прес-конференција јавниот обвинител Џељал Бајрами. Тој објасни дека во Скопје еден од настаните се случил пред референдумот, а другите за време на референдумот. По овој предмет, како што рече Бајрами, се постапува.
„На денот на гласањето не се регистрирани нерегуларности во Куманово, Крива Паланка, Кавадарци и Гевгелија. Во Скопје имало 29 настани, се однесувале на незначитечни настани и се решени истиот ден. Во Аеродром имало инцидент кога лице дошло и викало и навредувало гласачи. Тројца полицајци го смирувале, при што давал физички отпор. Добил пријава за напад на службено лице“, изјави Бајрами.
Тој појасни дека има пријави за неовластено снимање гласачи, а откако екипи излегле на терен воочиле дека тоа биле новинарски екипи.
„Два од овие настани сè уште се истражуваат“, рече Бајрами.
Како што додаде, во Струга имало два настани. Елементи за кривично дело има во село Мислешево, каде член на избирачкото тело се обидел да стави празни ливчиња во кутијата, но бил спречен. За овој настан, јавниот обвинител дал наредба да се најде лицето, а празните ливчиња да се одземат. Сторителот сам се пријавил во полиција.
„Другиот настан во Струга е за фотографирање гласачи, но тоа е правено надвор од територијата на гласачкото место па затоа нема елементи за кривична одговорност.
Во Битола лица убедувале гласачи да не гласаат. Случајот сè уште се разгледува и ќе се расчисти“, рече Бајрами.
Во Гостивар има два случаи, во првиот, гласач гласал, па нервозен го стуткал ливчето, по што барал ново.
Во Штип, пак, има два настани, а кривично дело има во едниот.
Маж дошол со жена да гласа. Жената се претставила дека е неписмена и ѝпомагал член на избирачкиот одбор да гласа. Откако гласала, сопругот го зел ливчето, отворил и искинал. Поднесена му е кривична пријава“, истакна Бајрами.
Тој информираше дека по електрнски пат се доставени 15 информации, а се постапувало и по пријавите на ВМРО-ДПМНЕ.
„Јавното обвинителство ќе постапува по поднесените кривични пријави од ВМРО-ДПМНЕ, ако има кривична одговорност, ќе се поднесе пријава. Доколку има индиции за сторени кривични дела во Сарај, но и други места, тогаш ќе се постапува“, предупреди тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на министерот Муцунски со шефот на Мисијата на ОБСЕ во Скопје, Вал
Министерот за надворешни работи и надворешна трговија, Тимчо Муцунски, денеска оствари средба со шефот на Мисијата на ОБСЕ во Скопје, амбасадорот Килиан Вал. На средбата беше потврдена долгогодишната соработка со ОБСЕ во различни области, при што беше изразена поддршка за напорите на Организацијата насочени кон зајакнување на соработката и одржување на мирот во регионот на ОБСЕ, извести МНР.
Двајцата соговорници изразија задоволство од досегашната соработка помеѓу ОБСЕ и македонските институции, и ја потврдија подготвеноста за нејзино продолжување. Тие разменија мислења и за тековните активности на Мисијата и заеднички ја реафирмираа посветеноста на продолжување на проектите кои ги поддржуваат реформските процеси на новата Влада.
Македонија
ЛДП со реакција за изјавата градоначалникот на Кисела Вода: Сепак има надеж
ЛДП реагираше на изјавите на Орце Ѓорѓиевски во врска со можноста за отповикување на градоначалници, нагласувајќи дека оваа иницијатива не е нова, туку е дел од нивните заложби кои претходно не биле поддржани ниту јавно ниту во Собранието.
„ЛДП ја истакна потребата за воспоставување на механизам за отповикување на градоначалници преку референдум, со цел поголема отчетност и одговорност на локалните лидери. Оваа иницијатива, која партијата ја поддржува подолг период, се заснова на примери од европските земји како Обединетото Кралство, Полска и Молдавија, каде ваквите механизми веќе се применуваат.
Според нив состојбата во која градоначалниците можат да ги поминат своите мандати без да одговараат за несработеното, ги оштетува општините и граѓаните. Иницијативата за отповикување на градоначалници се споменува како начин за подобрување на транспарентноста и одговорноста на локалната власт кон оние кои ја избрале“, велат од ЛДП.
Од партијата потсетија дека уште изминатата година кога ја пласираа идејата за доверба или отповикување на градоначалник истата беше отфрлена.
„Воедно минатата недела поднесовме амандман на измените во законот за локална самоуправа, кој за жал не беше поддржан во Собранието. Но, добро е што само по неколку дена доаѓаат позитивни реакции и изјави по однос на нашата заложба. Подаваме рака да го изработиме предлогот и да го усвоиме сите заедно во интерес на граѓаните“, истакнуваат од ЛДП.
ЛДП почнува серијал на јавни трибини со сите засегнати страни, а пред се со граѓаните затоа што предлогот ги има нив во фокусот: да добијат отчетни институции кои ќе им служат лично нив, а не на сопствените и партиски интереси. Институции исклучиво по европски стандарди и хармонизација со европското законодавство. ЛДП го повикува претседателот на ЗЕЛС и Министерот за локална самоуправа да се приклучат на оваа иницијатива.
Македонија
Претседателката Сиљановска Давкова се обрати на дискусијата „Младите и внатрепартиската демократија“
Претседателката Гордана Сиљановска Давкова се обрати на дискусијата „Младите и внатрепартиската демократија“, што се одржа во Кабинетот на Претседателот по повод 15 септември – Меѓународниот ден на демократијата.
Во дискусијата учествуваа подмладоци од политичките партии во земјава кои ги претставија своите погледи и искуства за улогата и положбата на младите во политичките партии кадешто членуваат и разменија идеи и препораки за подобрување на внатрепартиската демократија и за поттикнување на младинскиот ангажман во политиката.
Претседателката Сиљановска Давкова во обраќањето пред политичките подмладоци посочи дека демократизацијата на политичките партии е клучна за демократизацијата на политиката. Таа се осврна на процесите на внатрепартиското одлучување, на процесите на кандидирање и избор на партиските функционери, посочувајќи дека е неопходна децентрализираност на партиите, почитување на различни тенденции и мислења внатре во партиите и поавтентичен настап на локалните партиски организации.
Во таа насока, таа говореше за потребата од одговорност внатре во партијата, неопходноста од реформи, партиципативна политичка култура и промени во пристапот и комуникацијата на партиите со јавноста.
Претседателката во своето обраќање се осврна и на структурата на партиите и нивното претставување од аспект на родовата застапеност, истовремено посочувајќи дека дејствувањето на политичките партии во голема мера зависи од етичкиот капацитет на водството и на лидерот.
Претседателката ја поддржа потребата од поголема вклученост на младите во носењето на партиските одлуки, истакнувајќи дека тие треба да бидат најсубверзивниот елемент којшто ќе влијае на демократизацијата на овие процеси и на партиското одлучување.
Истакнувајќи ја важноста на внатрепартиската демократија, младите ги разгледаа можностите и начините за нивно поголемо влијание врз политичките процеси, преку активно учество и инклузија во партиските структури.
Политичките подмладоци како генератори на идното партиско лидерство ја истакнаа важноста од едукација и сензибилизирање за демократијата и нејзините сфаќања помеѓу младите.