Руско-американските односи во моментов не се врвен приоритет за Москва, руското раководство смета дека е многу поважно да се обезбеди разбирање во светската заедница од погубноста на едностраните пристапи кон решавање на проблемите, а неодамнешната посета на американскиот државен секретар Џон Кери кон средината на мај покажа дека Москва и Вашингтон мора да почнат да „градат мостови“, изјави во петокот навечер рускиот министер за надворешни работи Сергеј Лавров.

Во интервјуто за програмата „Меѓународен преглед“ на телевизијата Россия 24, шефот на руската дипломатија Сергеј Лавров, истакна дека денес се забележува процесот на формирање на мултиполарен светски поредок, кој е противставен на обидите на Западот предводени од САД да „држат сé под своја контрола“.

„Поради оваа специфика, не би можел да кажам дека сега најважното за нас се руско-американските односи. За нас најглавно е да се постигне согласност дека проблемите коишто денес постојат во светот не можат да се решат еднострано, или во двојка“, рече Лавров.

Шефот на руската дипломатија истакна дека Русија и САД продолжуваат да имаат напредок кога заедно се ангажираат за решењето на некои проблеми, вклучително и преку мобилизирањето на поголема група поддржувачи. Како примери за тоа Лавров ги наведе хемиското разоружување на Сирија, преговорите за иранската нуклеарна програма, борбата со пиратството…. Генерално, сепак, за успешно решавање на меѓународните проблеми е да се користат меѓународните мерки, смета Лавров.

Неодамнешната посета, од 12-ти мај, на американскиот државен секретар Џон Кери на Сочи, каде што разговараше со рускиот претседател Владимир Путин и со рускиот колега Лавров, покажа дека Москва и Вашингтон мора да „градат мостови“ и да го затворат несреќниот период во нивните билатерални односи, смета рускиот министер за надворешни работи.

„Искрено, посетата на американскиот државен секретар Џон Кери на Сочи, веројатно, дефакто значи дека Вашингтон разбира дека ни е потребно да градиме мостови и да ставиме крај на овој несреќен период во нашите односи, кој не носи ништо добро ниту за нас, ниту за Американците, ниту, пак, за остатокот од светот“, смета Лавров.

Односите меѓу Русија и Западот, во прв ред со САД, се влошија со развојот на ситуацијата во Украина од крајот на јули 2014 година, кога започнаа вооружените судири меѓу прозападните власти во Киев кои дојдоа на власт кон крајот на февруари истата година со соборувањето на проруски ориентираниот претседател Виктор Јанукович, со народните милиции од доминантно рускоајзичните региони на истокот од Украина.

Брисел и Вашингтон ја обвинуваат Москва дека го поттикнала и го помага бунтот на рускојазичните бунтовници и оти нелегално анектирала украинска територија откако рускојазичниот црноморски полуостров Крим во март 2014-та преку референдум ја поврати автономијата и се присоедини кон Руската Федерација. Русија, пак, го обвинува Западот дека го организирал неуставниот преврат во Киев и со тоа ја предизвикала украинска криза, како и дека го поттикнува Киев на воена разврска во Донбас.

Истовремено ЕУ и САД, како и нивните сојузници Канада, Австралија, Норвешка…, воведоа трговски санкции и ембарго против Русија, која одговори со забрана на увоз на прехранбени и земјоделски производи од западните земји./крај/мф/сн

Извор: Макфакс