И натаму мислам дека претседателот Александар Вучиќ лавовски се бори за Косово и Метохија и тоа под невидено нерамноправни услови, но и непроменетиот став со векови на црквата на својот народ и својата држава го доживува како помош, а не како отежнување на и така тешката ситуација, изјави српскиот патријарх Иринеј во интервју за „Вечерње новости“.

„Надеж и утеха влева тоа што тој (Вучиќ) повеќекратно изјавува дека нема да ја наметнува својата волја и своите евентуални решенија, туку ќе ги почитува слободно изразената народна волја и својата, па и да не се согласува интимно со неа“, рекол Иринеј.

Тој додава дека црквата по својата природа не донесува државни и политички одлуки, но, како што вели патријархот, има право, а уште повеќе должност, да укаже на вечните мерки и вечните вредности.

Според него, главниот проблем на Србија не се вековните соседи Арбанаси, туку развиена Европа, па и Западот воопшто, бидејќи, како што оценува, не се занимава со решевање на кризата и надминување на судирите, туку се занимава со своите вечни интереси.

Тој порача дека ако и кога Србија ќе дојде на ред, тогаш, доколку уште постои, ЕУ ќе биде поразлична од денеска. Исто така оцени дека Србија никогаш нема да си купи членска карта за влез во ЕУ по цена на воведување санкции против Русија.

Вучиќ претходно денеска рече дека Србија е далеку од ставови за решавање на проблемот на Косово, но рече дека ќе продолжи да се бори и да разговара за еден ден да дојде до договор, но не се знае дали тоа би било за три месеци или една година.