Македонија
11 милиони евра може да ја чини Општина Аеродром обесштетувањето на деветкатницата кај „Мајчин дом“, решение сѐ уште нема
Трошоците за обесштетување на инвеститорот на деветкатницата кај „Мајчин дом“ би можеле да ја чинат Општина Аеродром 11 милиони евра, изјавија попладнево за „Макфакс“ од општината. Забраната за градење на деветкатницата поради утврдени недостатоци на градилиштето истече денес. Изградбата беше стопирана 14 дена, рок во кој градоначалникот Марин рече дека ќе најдат решение за трајно стопирање на градбата и обесштетување на инвеститорот, но решение и по истекот на рокот нема.
„Трошоците за земјиште и комуналии изнесуваат околу 5,5 милиони евра. Дополнително, тука се штетите на компанијата за досегашни инвестиции, трошоци за одржување, а како што потенцираше инвеститорот, тој исплаќа и месечна рата за кредитот подигнат за изградба на овој објект. Доколку се оди во насока на обесштетување, инвеститорот би можел да побара сума што би ги покрила сите овие трошоци или да ја тужи општината, што целосно би го блокирало нашето работење. Целиот процес би можел да ја чини општината двојно повеќе од првичните 5,5 милиони евра“, изјавија за „Макфакс“ од општината.
Разговорите за изнаоѓање решение се во тек и покрај истекот на рокот за стопирање на градбата.
„Се разгледуваат сите можни решенија во рамките на законските и правните норми, финансиските можности на општината и инвеститорот. Вредноста на земјиштето пред ‘Мајчин дом’ е драстично порасната по пренамената во градежна парцела, што се направи во рамките на ДУП И10 донесен од претходното општинско раководство предводено од ВМРО-ДПМНЕ. Токму затоа, засега е констатирано дека на територијата на општина Аеродром нема друга парцела со која би можела да се компензира оваа вредност. Дополнително, инвеститорот е изложен на високи тековни трошоци, поради што не може да чека процедури за изработка на нови ДУП-ови“, велат од Аеродром.
Инвеститорот „ЗСФ КОМ“ е недостапен за објаснување дали ќе продолжи со градбата. Од Аеродром велат дека инспекцијата излегла на терен на градилиштето и утврдила дека недостатоците се отстранети, но дека инвеститорот сè уште ги нема продолжено градежните активности.
Жителите на Аеродром преку протести недвосмислено му укажаа на градоначалникот дека се против деветкатницата и дека нема да дозволат да продолжи изградбата. Стопирањето токму на овој објект и поништување на планот со кој е предвиден беше главен адут во изборната кампања на сегашниот градоначалник на Аеродром, Златко Марин. Тој како опозиционер што се бори за градоначалничка функција, на претходниот градоначалник му предлагаше решенија, како обесштетување на сопствениците на земјиштето со пари или компензација со земјиште на друга локација за да го заштити просторот од дополнително градење. Кога стана градоначалник, не само што самиот не ги примени советите што му ги даваше на претходникот туку го смени и мислењето и во неколку наврати се оправдуваше дека не може ништо да преземе за да ја спречи градбата. По протестите на граѓаните, ја стопираше изградбата на 14 дена и најави дека, сепак, ќе бара решение за трајна заштита на зеленилото на просторот на кој е предвидена деветкатницата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Пожарникарите гаснеа три пожари на отворено, информира ЦУК
Центарот за управување со кризи (ЦУК) информира дека изминатото деноноќие на Единствениот повикувачки број за итни случаи 112 имало вкупно 2.028 повици. Од нив „реални“ биле 60,06 отсто, а 39,94 проценти не биле итни. Кон полиција биле упатени 67,16 отсто, кон Итната медицинска помош 19,82, кон пожарникарите 5,03, а кон АМСМ 0,30 проценти од реалните повици.
Според ЦУК, регистрирани се и три пожари на отворено. Од 11.50 до 12.45 часот, со 2 пожарникара и 1 ПП возило се гаснела запалена ниска вегетација во атарот на с. Могила (Општина Битола), во 16.20 до 19.20 часот со 2 пожарникара и 1 ПП возило се гаснело запалено ѓубре патот од Демир Хисар кон Струговско Езеро (Општина Демир Хисар), од 19.00 до 19.50 часот со 2 пожарникара и 1 ПП возило се гаснело запалено стрниште во с. Крупиште (Општина Чешиново Облешево) и од 15.50 до 17.30 часот со 3 пожарникари и 1 ПП возило се гаснело запалено стрниште во атарите на селата Таринци и Карбинци (Општина Карбинци).
Македонија
65 литри на метар квадратен дожд во Пожаране и Лазарополе
Во изминатото деноноќие најмногу дожд наврна во Пожаране и Лазарополе. Според мерењата на Управата за хидрометеоролошки работи наврнат е воден талог од 65 литри на метар квадратен.
До осум часот утрово наврнати се 58 литри на метар квадратен во Маврови Анови, 57 во Дебар, 56 на Попова Шапка, 53 во Тетово, 48 во Крушево, 45 во Охрид, 31 во Скопје-Петровец и Крива Паланка, 28 во Скопје-Зајчев Рид и Куманово, 20 во Велес, 19 во Претор, 14 во Прилеп, 13 во Берово и Тополчани, 11 во Битола, 8 во Кавадарци, Виница и Струмица, 7 во Штип, 4 во Демир Капија и 1 литар во Гевгелија.
Времето денеска ќе биде променливо облачно со повремени врнежи од дожд, наместа во источните делови пообилни, проследени со ретки грмежи. Максималната температура ќе достигне од 19 до 25 степени.
Во Скопје променливо облачно со повремени врнежи од дожд, особено попладне и кон крајот на денот. Во делови од котлината врнежите ќе бидат пообилни, проследени со ретки грмежи. Максималната температура ќе достигне до 23 степени.
Македонија
Рекордни 13.400 натпреварувачи од 55 земји ќе трчаат на маратон утре во Скопје
Поради претстојното 20-то јубилејно издание на Виз Ер Скопски Маратон, што ќе се одржи утре, а на кој ќе учествуваат рекордни 13.400 натпреварувачи од 55 земји, в недела со почеток од 03:00 часот, ќе важи привремен режим на сообраќај во главниот град.
Како што соопштија организаторите на маратонот, одредени улици ќе бидат целосно или делумно затворени за сообраќај во периодот на одржување на маратонот, а променетиот режим ќе биде на сила до завршувањето на маратонот, до 14 часот.
Поточно, в недела, 06.10.2024, започнувајќи од 03:00 часот, сообраќајот ќе биде затворен од Градска Болница, сѐ до Палома Бјанка, а целата патека се затвора исто во недела, 06.10.2024, од 06:00 часот.
Целта на сите трки е на Плоштад Македонија. Локација за старт на сите трки e Собранието. Време за старт на сите трки e 08:00 часот, но организаторите апелираат тркачите да дојдат барем 20 минути порано. При влез во старт зоната, се апелира секој тркач да влезе во соодветниот бокс за својата трка или таргет време што го има одбрано при процесот на регистрација, сѐ со цел да не се создаваат турканици. Тркачите на маратонската, полумаратонската и штафетната трка ќе тргнат во правец кон Католичка Црква, а тркачите на трката Комерцијална Банка 5км ќе трнат во правец кон Црвен Крст.