Надворешната канцеларија за криминалистички работи Кратово поднесе кривична пријава против А.Ј. (64) од Кратово, градежен техничар во одделение за урбанизам при Општина Кратово, Ц.А. (56), раководител на одделение за урбанизам, С.К. (58), соработник во одделение за урбанизам, М.Б. (70), поранешен референт за собирање и наплата на даноци и комунални такси, Д.Ф.К. (35), соработник за даноци и такси во одделението за финансиски прашања, М.К. (58), даночен извршител во одделението за финансиски прашања, за сторено кривично дело злоупотреба на службената положба и овластувањето“, и против Р.С.К. (37) од Кратово, раководител на одделение за финансиски прашања во Општина Кратово, и М.А. (62) од Кратово, поранешен градоначалник на општина Кратово, за сторено кривично дело несовесно работење во службата.

Во текот на 2008 година, прво, второ и третопријавениот, како членови на комисија за утврдување пазарна вредност на недвижен имот во Општина Кратово, при процена на пазарна вредност на недвижен имот на 11 објекти во сопственост или како корисник на неколку фирми од Кратово извршиле процена на површина помала за 24.877 м2 од фактичката по што ја запишале во имотните листови на наведените објекти.

По ова, во периодот од 2008 до 2017 година, четврто, петто и шестопријавениот, при изготвување решенија за данок на имот и контрола на процената на фактичката квадратура, не извршиле соодветна процена на наведените објекти, а при пресметката на данокот за нив не ги опфатиле дворните места на наведените објекти, со што изготвиле решенија за данок на имот на наведените правни лица со помал износ.

Во наведениот период седмопријавената не извршила должен надзор врз работата на прво, второ, трето, четврто, петто и шестопријавениот, со што овозможила да бидат изготвувани решенија за наплата на данок на имот на наведените правни лица во помал износ.

Исто така, во периодот од 2008 до 2017 година, осмопријавениот, со пропуштање должен надзор, ги потпишувал изготвените решенија за наплата на данок на имот на наведените правни лица, со што овозможил тие да стекнат противправна имотна корист од 2.453.120 денари на штета на буџетот на Општина Кратово.