Политика
ВМРО-ДПМНЕ: СДСМ ветува заштита од поплави, а неговите советници гласаат против чистење на каналите
Сé уште нема одговор од СДСМ зошто со години нивните советници сакале да го спречат финансирањето на чистењето канали со општински пари и зошто не сакале граѓаните да ја добиваат помошта од општината за да се чистат одводните канали, одговорија во неделата од владејачката ВМРО-ДПМНЕ на претходната прес-конференција на најголемата опозициска партија која ја обвини власта дека не вложува во заштитата на граѓаните од поплави, и оти вложува во проекти како на пример Панорамското тркало на Вардар во Скопје.
Спорд владејчката партија, катастрофални политичари и најнеодговорни носители на функции се функционерите на СДСМ, кои терајќи дневна политика на безразумно контрирање, максимално неодговорно биле против сé’, па дури и против субвенционирано чистење на одводните канали.
„Нема одговор бидејќи СДСМ, како тогаш така и сега, ниту се интересира за граѓаните, ниту за чистењето на каналите. СДСМ се интересира само како преку некрофилија да ја злоупотреби трагедијата на фамилиите кои претрпеа ненадоместливи човечки загуби, и да се обиде да приграби некој ситен политички поем, божем се грижи и е одговорна партија. Ниту се грижи, ниту е одговорна. СДСМ злоупотребува човечки судбини во секоја можна прилика и граѓаните тоа добро го знаат“, се вели во реакцијата на ВМРО-ДПМНЕ.
Се заклучува дека доколку од опозициската партија се грижеле за одводните канали и заштитата на животот и имотот на граѓаните, тогаш немало да бидат против чистењето на одводните канали, како што неодамна покажаа записниците токму од седниците на скопската општина Гази Баба, или како што се наведува во реакцијата ниту пак да прашува „до кога планира општината да им помага на граѓаните во чистењето на одводните канали“, што се оценува како „врв на апсурдот и лицемерието“.
Натаму се потсетува дека од СДСМ досега не го негираа фактот дека неговите советници во општина Гази Баба биле против тоа општината да им помага на граѓаните во чистење на одводните канали, а за прес-конференцијата на Манчевски и Николовски во неделата на локацијата каде е планирано градењето на Панорамското тркало, се вели дека е „блед неуспешен обид за сеење магла и покривање на овој невиден срам за СДСМ“.
„Чистотата на каналите редовно се одржува и советниците на СДСМ тоа многу добро го знаат бидејќи го гласале како заклучок на совет. Наместо да лажат дека СДСМ било кога бил заинтересиран да се чистат одводните канали, СДСМ на јавноста мора да ѝ каже: Зошто СДСМ со години е против субвенциите за чистење на одводните канали во Гази баба? Како е можно една политичка партија да работи толку против граѓаните? Дали е нормално да не сака СДСМ да им се помогне на граѓаните во чистење на одводните канали?“, прашуваат од владејачката партија.
Од ВМРО-ДПМНЕ потсетуваат дека проектирањето на Скопската обиколница на којашто имаше големи оштетувања и повеќе жртви при неодамнешното големо невреме што го зафати скопско се одвиваше во времето на владата на СДСМ, како и дека во 2005 година е ликвидирано јавното претпријатие „Водостопанство“, со што била предизвикана повеќегодишна неможност да се одржуваат и чистат одвотните каналите.Колку километри атмосферска канализација направи нивниот градоначалник во Куманово? Колку километри атмосферска канализација во Струмица по методот „евро за вицето“ направил аболицираниот криминалец Заев? Колку километри атмосферска канализација во Центар направил Жерновски?“, прашуваат притоа до ВМРО-ДПМНЕ обвинувајќи го СДСМ за „нечовечки обиди“ да се злоупотребува трагедијата на граѓаните по природната катастрофа во која загинаа 22 лица./крај/мф/бб
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски од Чаир: На Македонија ѝ треба обединување и единство, а не поделби, владата на ВМРО-ДПМНЕ ќе вложи 1 милијарда евра за проекти во сите општини
Се чувствува победничка атмосфера и енергија, тоа е важно за сите нас и ни дава мотив да продолжиме посилно да се бориме. Овие денови кои ни преостануваат треба максимално да се мобилизираме, а најновите анкети кои ги добив утрово велат дека ќе биде голема победата и на 24 април и на 8 мај, изјави претседателот на ВМРО-ДПМНЕ, Христијан Мицкоски на митингот во Чаир.
Мицкоски истакна дека сега во Македонија имаме политичка гарнитура која повеќе од две децении е на власт, тоа се ДУИ чија суштина се поделби и грабеж на народот.
– Кога ќе анализирате која е суштината на ДУИ, Али Ахмети и Артан Груби, Бујар Османи, Талат Џафери и останатите, кај нив нема ништо посебно тие само го делат народот по етничка основа и така опстојуваат. Дали некој може да се сети некоја добра работа која Али Ахмети и Артан Груби ја имаат направено, но можам да кажам десетици лоши работи, рече Мицкоски.
Мицкоски нагласи дека сега ДУИ сериозно ќе бидат изненадени на овие избори, а им се познава нервозата затоа што после 8 мај треба да одговараат за сето она што му го направија на народот, за целиот грабеж.
Мицкоски се осврна на проектите кои ги планира идната влада од ВМРО-ДПМНЕ и посочи дека се планира да се инвестира 250 милиони евра секоја година во општините, 1 милијарда во 4 годишен мандат.
– Во Чаир ќе има висока сума, еден од проектите е проширување на булеварското решение на влезот од Бит Пазар кон Чаир и тоа мора да се направи и го повикувам градоначалникот да се пријави со повеќе проекти. Тоа ќе додаде вредност во квалитетот на живеење. На Македонија и треба обединување и единство не поделба, потенцираше Мицкоски.
Мицкоски додаде дека идната влада на ВМРО-ДПМНЕ планира да отвори нови 55.000 работни места, да функционира со владеење на правото на целата територија и нема да има територии каде ќе владејат шерифи.
Да обезбедиме пристојни услови за поголем инвестициски бран и од странство и од домашни инвеститори за да може децата да останат тука. Мораме и тие кои си отидоа да ги вратиме назад. Да обезбедиме надеж. Ве повикувам на 24 април сите да се обединиме околу број 2 и да гласаме за Гордана Силјановска Давкова, а потоа да се обединиме и заедно на 8 мај да испишеме историја за коалицијата Твоја Македонија предводена од ВМРО-ДПМНЕ, изјави Мицкоски.
Македонија
Доц. д-р Бобан Карапејовски: Ќе обезбедиме вработување на најдобрите 200 студенти, како и стипендии од 500 евра месечно
Носителот на листата на кандидати за пратеници во ИЕ 1, Бобан Карапејовски на денешната прес конференција рече дека во програмата на Движењето ЗНАМ – За наша Македонија за парламентарните избори, наречена „Проглас за достоинствена Македонија“ еден од приоритетите се образованието и науката, кои се суштински за градењето силна и просперитетна држава.
„Во Прогласот за достоинствена Македонија на Движењето ЗНАМ – За наша Македонија, предвидовме два сегменти: зголемување на достоинството на вработените во образованието и во науката и поставување нов систем, со кој овој сектор ќе се врати во фокусот и ќе помогне во создавањето функционално писмен и високообучен кадар, како и продлабочување на
научните истражувања“, рече Карапејовски и додаде: „Во однос на првиот постулат, достоинството на вработените во образовниот сектор, е предвидено платите на наставниците и на професорите да се зголемат до 100 % од актуелните. И, тоа е најмалку што можеме да направиме за да му го вратиме угледот на учителот и да ги привлечеме најдобрите да бидат
даскали на нашите деца“.
Тој потенцира дека за најдобрите студенти ќе се обезбедат стипендии во износ од 500 евра месечно, а за најдобрите двесте студенти вработување во научните и во институциите на системот.
„Партиските вработувања мора да запрат! Не смее партиската книшка да биде услов за вработување. На универзитетите и во државните институции треба да работат најдобрите за најдоброто за сите нас. Ни треба научен подмладок веднаш, како и
ревизија на условите и зголемување на квалитетот на акредитираните универзитети, кои се множат на секој чекор, а не даваат квалитет“, рече тој.
Карапејовски рече дека наставните програми и планови ќе се усогласат со модерните технологии и достигнувања и појасни дека ќе се изгради систем што ќе поттикнува креативно, аналитичко и логичко размислување кај учениците, но и ќе поттикнува креативност во областа на бизнисот и на финансиската едукација. Учебниците ќе бидат усогласени со новите наставни планови и програми и напишани од најдобрите автори, навреме доставени до учениците.
Тој исто така рече дека издвојувањата од буџетот за науката ќе се зголемат, а ќе има и посебни стимулации за оние што успеваат да објавуваат во најпрестижните списанија и да соработуваат со колегите од најдобрите светски универзитети, како и посебни субвенции за таканаречните национални дисциплини.
Македонија
Пендаровски: Ги знам нивните лажни анкети, ги знам и реалните анкети и реално ви кажувам дека на 8 мај победуваме!
На само неколку дена пред првиот круг на гласање, од Скопје кандидатот за претседател Стево Пендаровски искажа верување дека по повеќе од три децении независност, македонските граѓани многу добро знаат да препознаат чија програма е реална, а која е во расчекор со времето во кое живееме.
„Овој претседател и оваа политичка гарнитура никогаш не давале лажни надежи и ветувања за брза реализација на стратешките цели на државата. И денес пред вас, не велам дека Македонија за само неколку години ќе биде најразвиената држава во Европа, не ветувам дека целиот тој процес ќе трае само неколку месеци, но, говорам и повторувам секаде дека најголемиот ризик е ако на изборите им дадеме шанса на оние за кои претходно веќе видовме како владеат со луѓето цели 11 години“, истакна Пендаровски.
Пендаровски денеска повика на масовна излезност на 24 април и на 8 мај, за како што рече, да не се враќаме во режим.
„Ги знам нивните лажни анкети, ги знам и реалните анкети и реално ви кажувам дека победуваме на 8 мај. Со заокружување на бројот 1 продолжуваме кон Европа и кон развиениот свет и дефинитивно не се враќаме назад во режим и заробена држава“, рече Пендаровски.