Регион
Ципрас е убеден дека ќе формира влада по изборите
Челникот на коалицијата на радикалната левица Сириза и досегашен грчки премиер Алексис Ципрас, уште еднаш во саботата ја отфрли можноста да коалицира со конзервативната партија Нова демократија, и е убеден дека ќе може самостојно да формира нова влада.
По вторпат за неполни девет месеци Грците на 20-ти септември ќе излезат на предвремени парламентарни избори. Според резултатите од досегашните анкети, ниедна партија нема да може да освои парламентарно мнозинство од 151 пратени во 300-члениот грчки парламент, со што би можела самата да формира влада.
„Нема услови за соработка (со Нова демократија), затоа што нашите програми многу се разликуваат, нема заеднички цели. Ние сакаме да го надминеме она, што Нова демократија и нејзиниот лидер Вангелис Меимаракис сакаат да го сочуваат“, изјави Ципрас во интервјуто за телевизијата Skai.
„Зошто наеднаш му се допаѓам на Меимаракис: Кога тој вели дека сум лажго, итрец, политички измамник, како може сега да се зборува дека сака соработка? Тоа е лицемерство“, рече челникот на Сириза.
Ципрас остро ги критикуваше и социјалистичкиот Пасок и партијата Потами, искажувајќи големо сомневање дека е остварлива коалиција со нив. „Една работа е да сакате дијалог, а друга е да сакате да соработување со луѓето кои имаат поинаква идеологија, па иако се со чесни намери“, рече лидерот на Сириза.
Поранешниот грчки премиер е убеден дека по претстојните избори ќе може да формира влада. „На сите им е јасно кој ќе победи на изборите, односно ќе ја формира владата. Има 15 до 20 отсто неопределени гласачи, но победничката партија, доколку и нема да има мнозинство во парламентот, ќе може да формира влада“, рече Ципрас.
Тој повторно го бранеше договорот со меѓународните доверители за новата трета по ред програма за финансиска помош на Грција, кој го постигна по мачните долги преговори, велејќи дека тој е „десет пати подобар“ од оние кои ги постигнаа Пасок и Нова демократија. Ципрас, исто така, тврдеше дека „трипати ги напуштал преговорите“ со кредиторите на 12-ти јули, но оти на преговарачката маса го враќал францускиот претседател Франсоа Оланд.
Ципрас призна дека направил грешки и затоа на овие избори не сака да дава ветувања. „Имаме повеќе искуство и сега поцврсто ќе чекориме“, рече додавајќи дека никој не може да го обвинува дека не ги исполнил ветувањата./крај/мф/бс
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Tлото на Балканот се тресе: По Хрватска, земјотреси и во Албанија и Грција
Два земјотреси, во растојание од една минута – во 19.19 и 19.20 часот – вечерва се регистрирани на територијата на Албанија.
Земјотресите се со интензитет од 2,1 степен според Рихеровата скала.
Епицентарот на првиот земјотрес бил на седум километри од Елбасан, додека вториот на 62 километри од Тирана.
Според информациите на ЕМСЦ, неколку минути претходно, земјотрес од 2,5 степени имало и во јужниот дел од Грција, а уште два од 2 и 2,3 степени се регистрирани предмалку на Крит.
Претходно денес, Хрватска ја погоди силен земјотрес од 4,7 степени, а беше почувствуван и во Босна и Херцеговина. По овој потрес, следеа неколку помали.
Регион
Не ги навредив Бугарите, туку ја критикував нашата влада, објасни хрватскиот претседател по изјавата на која реагираше Софија
Хрватскиот претседател Зоран Милановиќ изјави дека со изјавата дека Хрватска е „на дното на ЕУ по повлекувањето на европските пари, а само Бугарија е полоша“, не ги навредил Бугарите, туку ја исмејува хрватската влада која прави „будали и социјални случаи“ од нејзините граѓани.
Милановиќ претходно рече дека „Хрватска е дното на Европската унија и дека само Бугарија е полоша“, па секој ден се молат на Бога, Бугарија да остане последна и ништо да не и се случи, бидејќи во спротивно би била Хрватска“. По изјавата, според хрватските медиуми, Бугарите ја повикале хрватската амбасадорка во Софија, Јасна Огњеновац и изразиле незадоволство, пренесува порталот „Индекс“.
Бугарското Министерство за надворешни работи на хрватскиот амбасадор му пренело „длабоко разочарување од изјавата на претседателот Милановиќ“, каде што истакнале „дека изјавата е неприфатлива за Бугарија и не е во согласност со одличните билатерални односи меѓу Хрватска и Бугарија“.
Тие истакнаа и дека се надеваат дека „хрватската влада ќе се огради од таа изјава“.
„Не ги навредив Бугарите, туку исмевав некои елементи на хрватската влада кои не’ прават будали и социјален случај“, рече шефот на хрватската држава и додаде дека претходно ја критикувал земјата на тема повлекување европски пари.
„Дали можеме да кажеме дека Хрватска се моли Сингапур последен да подигне пари? Дали тоа звучи подобро? Но, Сингапур не е европска земја. Значи некој мора да биде последен. Тоа е Бугарија, а Хрватска е претпоследна“, рече Милановиќ и потсети дека тоа се статистички податоци и дека тоа досега го кажал десет пати.
„Тоа е потсмев, за жал, на сметка на некои во Хрватска кои не прават социјален случај, кои не можат да земат доволно европски средства, па затоа сме претпоследни. Нормално, гледаш кој е последен. Бугарија е последна, секогаш е последна (…) Хрватска е претпоследна“, рече Милановиќ.
„И тоа е факт за кој зборував десет пати. Алелуја (…) Тоа се факти за кои мора да се разговара во политиката бидејќи се многу релевантни податоци. Зошто Хрватска е претпоследна? Зошто не е петата одоздола, или петта одозгора. Зошто не е? Веројатно некој е одговорен за тоа“, додаде тој.
На крајот, како што додаде, никој не се моли Бугарија да пропадне, туку дека неговата изјава е верзија на американската шега за сојузната држава Арканзас, која „се моли на Бога Мисисипи, кој е најсиромашниот, да биде здрав и добро“, бидејќи во спротивно тоа би бил Арканзас.
„За да го знаете тоа, треба да прочитате нешто во животот, а не да се занимавате со селски скандали“, рече Милановиќ.
Регион
Земјотрес со јачина од 4,7 степени во Хрватска, почувствуван и во БиХ
Земјотрес со јачина од 4,7 степени според Рихтеровата скала утрово во 05:38 часот е регистриран во Хрватска, објави Европскиот медитерански сеизмолошки центар (ЕМСЦ).
Според информациите од Европскиот медитерански сеизмолошки центар, земјотресот бил на 92 километри јужно од главниот град Загреб и на 14 километри од границата со Босна и Херцеговина, кај Тржачка Раштела.
Земјотресот бил на длабочина од 10 километри.
Земјотресот најмногу бил почувствуван во централна Хрватска и во дел од Босна и Херцеговина со интензитет од V-VI степени според Европската макросеизмичка скала.
Засега нема извештаи за повредени лица или за предизвикана материјална штета.