Шест месеци по одобрувањето на грантот, до Комитетот за одобрување инвестиции во Фондот за иновации стигнала информацијата за поврзаноста на советничката на премиерот Цветанка Ласкова со фирмата на нејзината снаа. Комитетот треба да ја донесе конечната одлука дали Христина Керкез, снаата на Ласкова, преку фирмата „Декодикс“ ќе добие 320.000 евра државни пари за проектот „Декодирај – ме“. Покрај за снаата на Ласкова, Комитетот треба да донесе одлуки и за грантовите на компанијата „Контура“ на Елена Донева поврзана со поранешниот амбасадор Јован Донев, за „Т – сенс“ поврзана со сопругата на актуелниот министер за култура Асаф Адеми и за „Микросам“ на поранешниот министер без ресор Веле Самак. Сите четири компании од „Транспаренси интернешнал – Македонија“ добија оценка среден ризик од аспект  влијанието на јавните функционери со кои се поврзани.

„Комитетот за одобрување инвестиции на 21. 01. 2018 година, понеделник, одржа седница на која им беше презентирана проценката на ризик која ја направи нашиот партнер ‘Транспаренси интернешнал – Македонија’ за компаниите што пријавија поврзаност со носители на јавни функции во сопственичката структура во сопственичката структура во рамките на првиот бран од Планот за економски раст на Влада на РМ. Деновиве ја очекуваме конечната одлука на Комитетот во однос на доделување финансиски средства од ФИТР“, велат од Фондот за иновации.

Комитетот за одобрување инвестиции во Фондот за инвестиции е независно тело формирано од петмина меѓународни експерти именувани од Владата. Претседателка на Комитетот е Кларис Бехар Молад, а членови се Доналд Луис ЏР, Николаос Георгулас, Глигор Ташковиќ и Авинаш Сахи, сите со меѓународно искуство во областа на инвестициите во иновациската дејност. Комитетот во истиот состав во јули минатата година им одобри грантови и на овие четири компании за кои повторно одлучува, но по притисокот од јавноста Фондот ги обврза сите добитници да дадат изјави за поврзаност со носители на јавни функции. Откако четирите компании пријавија поврзаност со функционери, Фондот во октомври минатата година изготви протокол за проценка на ризик, а „Транспаренси интернешнал – Македонија“ како надворешен соработник го примени и оцени дека четирите фирми се со среден ризик. Во понеделникот проценката „Транспаренси“ ја покажале на Комитетот кој го има последниот збор за одобрување на грантовите.

На компанијата „Декодикс“  ѝ беше одобрен грант од 19.954.200 денари, нешто помалку, односно 19.925.977 денари беа одобрени на „Микросам“, на „Контура“ и беа одобрени 3.638.655 денари, на „Т – сенс“ и беа одобрени 4.113.041 денари. Дали ќе потпишат договори со Фондот за да ги добијат парите зависи од конечната одлука на Комитетот.