Македонија
(Видео) ВМРО-ДПМНЕ утре ќе поднесе иницијатива за укинување на новиот закон за пензии
Лидерот на ВМРО-ДПМНЕ, Христијан Мицкоски, на денешната прес-конференција информираше дека со Синдикатот на пензионерите одржале состанок на кој се разговарало за актуелната положба на пензионерите во земјава. Тој информриаше дека детално го анализирале новото законско решение коешто помина во рамките на Парламентот.
„Пензионерите ни ги претставија сите нивни забелешки, сите нивни сугестии како истиот тој закон да биде подобрен. За ВМРО-ДПМНЕ основна цел ќе биде подобрување на квалитетот на животот на пензионерите бидејќи тие тоа го заслужуваат. Бидејќи имаат многу дадено за оваа држава. И тоа колку многу имаат дадено за Република Македонија. Така што навистина заслужуваат е пензионерските денови да им бидат достоинствени, а не да бидат омаловажени и понижени, како што впрочем владата на СДСМ и Зоран Заев се труди да омаловажи и понижи сè во ова држава. Се разбира врвен приоритет се нивните лични приоритети и сугестии“, изјави Мицкоски по денешниот состанок.
За време на денешната средба со Синдикатот за пензионерите од партијата посочија дека во текот на утрешниот ден пратеничката група на ВМРО-ДПМНЕ и коалицијата „За подобра Македонија“ ќе поднесе предлог-закон за укинување на новото законско решение каде што практично пензионерите се оштетени за приближно 500 денари по месец имајќи го предвид движењето на просечната нето-плата во изминатото полугодие, и ќе бара веднаш враќање на старото законско решение.
„Практично сите оние нефункционални и проблематични т.н. реформи што ги прави Владата на СДСМ и Зоран Заев. За волја на вистината, структурна реформа е само оваа минималната плата, но ги гледаме сите негативни ефекти на таа минимална плата каде преку што 300000 пензионери секој месец во годината што следува ќе бидат со намалена пензија од 500 денари. Односно нема да го добијат заслуженото покачување за приближно 500 денари“, изјави Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
(Видео) Маричиќ-Стевановиќ: На Собранието му требаат современи патриоти и борци за еднаквост, права и слободи
Во заедничката изјава за медиумите, Милена Стевановиќ и Бојан Маричиќ од листата на кандидати за пратеници во Изборната единица 1, порачуваат дека „реформите ни носат системски промени и европски фондови“, но и „демократски вредности со кои се пробиваат границите за еднакви можности за жените како докажана заложба на СДСМ.
Милена Стевановиќ во својот дел на изјавата истакнува дека „СДСМ, Ковачевски, Пендаровски, Маричиќ и другарите социјадемократи се оние кои со знаење и капацитет можат да ја придвижат земјата напред“.
„Нам ни требаат луѓе како Бојан. Со исклучително познавање на институциите на ЕУ, со чиста и прогресивна мисла, вистински современи патриоти кои додека ја внесуваат земјата во ЕУ го штитат и промовираат македонскиот идентитет“, истакнува Стевановиќ.
Tаа ги повикува сите македонски демократи „во среда на 8 мај сите кои се за подобра, современа и демократска Македонија да го заокружат бројот 1 за европска Македонија“.
Бојан Маричиќ ја посочува Милена Стевановиќ како „претставник на прогресивното женско движење“.
Маричиќ порачува дека со Стевановиќ, Македонија и македонското општество ќе имаат „напредок на полето на јавното здравје, на полето на женското здравје и машкото здравје“.
„На Собранието и треба Милена Стевановиќ, врвен професионалец кој го предводеше целиот тим на инфективната криза за време на пандемијата од ковид и која во исто време се докажа како храбар и непоколеблив борец за постојано унапредување на правата на жените“, истакнува Маричиќ.
Порачува дека е важен гласот на жените, девојките, демократи и демократки.
„Вашиот глас за СДСМ и за Милена Стевановиќ на овие избори е глас за жените како еднаква силна движечка сила на општеството“, нагласува Маричиќ во заедничката изјава со Милена Стевановиќ, како кандидати за пратеници на СДСМ и на Коалицијата за европска иднина во изборната единица 1.
Македонија
Сообраќајка на патот Радовиш – Штип, сообраќајот во прекин
Од 18:05 ч. сообраќајот на магистралниот пат Радовиш – Штип, во близина на „Алкопласт“, е во прекин поради сообраќајна незгода, соопшти АМСМ.
Сообраќајот на државните патишта се одвива непречено, по претежно суви коловози.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Владата ќе ја одбележи 121 годишнината од смртта на Гоце Делчев
Владата на Република Северна Македонија, на 04.05.2024 година (сабота), ќе ја одбележи 121 годишнината од смртта на Гоце Делчев со положување свежо цвеќе на неговото вечно почивалиште, во црквата „Св.Спас“,Скопје.
По тој повод, во 10:30 часот, свежо цвеќе ќе положи претседателот на Република Северна Македонија, Стево Пендаровски, владина делегација предводена од Славјанка Петровска, министерка за одбрана во Владата на Република Северна Македонија, Каја Шукова, министерка за животна средина и просторно планирање во Владата на Република Северна Македонија.