Свет
Нова студија го поврзува аутизмот кај децата со загадувањето на воздухот
Неодамнешна студија откри нови докази кои ја поврзуваат изложеноста на загаден воздух со зголемен ризик од развој на аутизам кај децата, објави интернет-страницата на Светскиот економски форум.
Истражувањето спроведено кај деца во Шангај покажало дека изложеноста на ситни честички од загадување, познати како ПМ 2.5, е во корелација со 78% зголемување на дијагнозата на нарушувања од спектарот на аутизам (НСА). Доказите од новата студија, која ги следела децата во период од девет години, ги поткрепуваат наодите од претходно истражување.
Имено, една студија од 2014 година спроведена кај 116.430 бремени жени во САД покажала дека зголемената изложеност на ПМ 2.5-честички во текот на последните три месеци од бременоста двојно го зголемува ризикот децата да развијат НСА.
Двете студии нудат дополнитлни докази кои го поврзуваат вдишувањето на ситни честички од загадувањето со широк спектар на здравствени проблеми, како што се срцеви заболувања, мозочен удар, рак на белите дробови и акутни респираторни инфекции.
Светската здравствена организација проценува дека 7 милиони смртни случи на годишно ниво се поврзани со загадувањето на воздухот.
Честичките ПМ 2.5 имаат дијаметар од помалку од 2,5 микрометри и најчесто се наоѓаат во индустриските гасови и издувните гасови од возилата, а се присутни во многу загадени градови ширум светот.
Иако причините за појава на аутизам сè уште не се целосно разоткриени и натаму се предмет на истражување, одамна е препознаена улогата на генетиката во развојот на ваквите нарушувања.
Истражувањата за честичките во воздухот како фактор на ризик од аутизам продолжуваат да замаат замав, благодарение на наодите од Шангај и други студии.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
(Видео) Невремето во Србија направи хаос: се излеа Дунав, ветерот корне дрвја
Реката Дунав денеска се излеа во Бачка Паланка, во природниот парк „Тиквара“, додека на северот од Србија е забележан значителен пад на температурата и се предвидува невреме пропратено со врнежи и грмежи.
Имено, како што може да се види на видеата на социјалните мрежи, водата достигна такво ниво што од водата штрчат само чадори и улични светилки.
Како што соопшти денеска Републичкиот хидрометеоролошки завод на Србија (РХМЗ), облачност со врнежи од дожд, пад на температурата и умерен и засилен северозападен ветер најпрвин ја зафати Бачка Паланка, но потоа ќе се прошири и во остатокот од Војводина.
Студениот бран преку северот на земјата пристигна во Србија, каде во некои градови температурата беше околу 15 степени.
На граѓаните им се препорачува да ги преземат сите мерки за заштита на имотот, но и себеси поради предвиденото невреме.
Значителна промена на времето утре ќе има и во Македонија, најави Управа за хидрометеоролошки работи (УХМР).
Утре под влијание на влажна и постудена воздушна маса од север ќе настапи позначителна промена на времето. Од утринските часови најпрвин во северните делови, ќе има повремени врнежи од дожд и локална појава на грмежи. Ќе дува силен ветер (наместа над 70км/ч.) кој ќе продолжи и во понеделник.
ИЗВОР: УХМР
Дневната температура значително ќе се намали (утре за 6 до 8, а во понеделник уште за дополнителни 4 до 6 степени). Потоа во следните два дена времето ќе биде сончево со ниски утрински температури, а дневните ќе бидат во пораст.
Во Скопје, утре ќе има повремени врнежи од дожд, локално со појава на ретки грмежи и силен ветер.
Од четврток се очекуваат нови врнежи од дожд.
Свет
Фатална грешка при спасувањето мигранти во близина на Шпанија – 9 загинати и 48 исчезнати
Најмалку девет луѓе загинаа, а уште 48 се водат како исчезнати откако брод со мигранти се преврте за време на спасувачка операција во близина на Канарските острови, соопштија во саботата шпанските власти.
Шпанската поморска спасувачка служба соопшти дека трагедијата се случила откако било дојавено за присуство на мал брод натоварен со луѓе на околу 6 километри од островот Ел Хиеро. Бродот се превртел кога премногу луѓе се префрлиле на едната страна за време на обидот за спасување, се вели во соопштението на спасувачката служба.
Спасувачите спасија 27 луѓе, а потврдија дека има девет мртви.
Службата соопшти дека акцијата за спасување била отежната, бидејќи била извршена во текот на ноќта и под налетите на ветровите кои достигнале јачина од 20 јазли. Во акцијата учествуваа спасувачки бродови и хеликоптери на поморската спасувачка служба, Цивилната гарда, Црвениот крст и локалната самоуправа.
Атлантскиот пат за мигранти од Западна Африка до Канарските Острови е еден од најсмртоносните во светот. Иако нема точна бројка на загинати поради недостигот на информации за заминувањата од Западна Африка, шпанската група за заштита на мигрантите „Walking Borders“ проценува дека жртвите се илјадници.
Над 26.000 луѓе пристигнале преку море на Канарските острови досега оваа година, во споредба со околу 14.000 во истиот период минатата година.
Свет
Хакери ја нападнале француската информативна агенција „Франс прес“
Информативниот систем на француската агенција „Франс прес“ бил цел на напад кој зафатил дел од системот за дистрибуција на вести до клиентите, соопштено е денеска.
Мобилизирани се технички тимови на АФП со поддршка и експертиза на Националната агенција за безбедност на информациските системи (АНСИ)“, се вели во соопштението.
„Редакцијата и сите служби на АФП продолжуваат да известуваат за настаните ширум светот“, соопшти агенцијата.
Нападот бил откриен вчера.
Контактирани се надлежните органи на Франција, соопшти AFP, истакнувајќи дека се уште не се познати сторителите на нападот и нивните мотиви.