Министерот за внатрешни работи, Оливер Спасовски, ги отфрла шпекулациите за постоење киднапери и продажба на човечки органи велејќи дека тие се шират од политички побуди. Според него, досега нема киднапирање.

„Во земјата нема ниту еден случај на убиство за вадење органи. Не се точни наводите дека расте бројот на исчезнати лица. Триста и седумдесет лица биле исчезнати во 2018 година. Порано се криеа убиства, ние сме крајно транспарентни“, вели Спасовски.

Запрашан кој ги пласира лажните вести, министерот рече дека очиледно е оти зад тоа стои структура на луѓе што шират лажни информации од политички побуди.

„Поранешен вработен во МВР имаше статус на ‘Фејсбук’ со тотална измислица и лага. Имаме новинари и медиуми на кои сензацијата им е поважна“, потенцира тој.

Спасовски појасни дека во последните 5 години Пронаоѓањето  исчезнати лица се реализира со 94 проценти.

„Ние работиме да биде на 100 проценти. Ги уверувам родителите на исчезнатите дека истрагите се третираат со посветеност. Истрагите се темелни, но за тоа некогаш треба повеќе време за резултати. За оние што шират лажни приказни за продажба на човечки органи, сакам да им порачам – не помагате. Некои од случаите се самоубиства. Кога имаме исчезнато лице, важно е полицијата да добие повеќе информации за пократко време“, рече министерот за внатрешни работи.

Тој сподели препораки за побрзо пронаоѓање на исчезнатите.

„Прво, пријавете во МВР, потоа проверете ги местата каде што може тоа лице да отиде, неговото однесување, не кријте информации од полицијата, споделете фотографија со МВР, водете грижа за лицата што имаат здравствени проблеми“, посочи министерот.

Рече дека се преземени сите неопходни мерки и се преземаат дејства за пронаоѓање на лицата, но одби да каже какви мерки се тоа.

„Семејствата се известуваат за сè“, посочи Спасовски иако тврдењата на семејствата се дека тие не добиваат информации.