Македонија
Француската министерка предупреди на можно реформирање на Унијата пред следното проширување

Министерката за Европа и за ннадворешни работи на Република Франција, Натали Лоазо, на средбата со претседателот на Комисијата за европски прашања на Собранието, Артан Груби, ја повтори европската перспектива на регионот и во тој контекст и на Северна Македонија, но со укажување дека е потребно исполнување на сите критериуми во поглавјата.
Таа ја потврди француската поддршка за нашите евроинтегративни процеси, при што посочи дека треба да се има предвид и можноста Унијата да се реформира во поглед на нејзиното функционирање, пред следното проширување со нови земји членки. Во однос на сегашната состојба во Европската Унија, порача дека европските избори, во мај, ќе бидат одлучувачки за нејзината иднина.
Груби истакна дека е значајна нејзината посета, како и на нејзината придружба, сенаторката и претседател на групата за пријателство Франција-Западен Балкан, Марта де Сидрак, пратеникот и претседател на групата за пријателство Франција-Северна Македонија, Бертран Сор, и на заменик-директорот за континентална Европа при Министерството за Европа и надворешни работи, Бујан де Лакост, за што сведочи и присуството на опозицијата. Груби се заблагодари за досегашната француска поддршка на евроинтегративните процеси на земјата.
По повод различните ставови помеѓу опозицијата и власта, Груби истакна дека сите ние дишеме ист воздух, нè грее исто сонце, имаме различни убедувања и гледишта, но заедничка ни е целта, европска Северна Македонија.
За актуелните случувања во земјата посочи дека се во рамките на милјето на претстојните претседателски избори во април и дека државата одлучно чекори кон членство во ЕУ и НАТО, зад кое несомнено стојат сите политички партии. Поради тоа, истакна Груби, за нас е особено важно да нè поддржи Франција, имајќи го предвид нејзиното место и влијание во евро-атлантските структури.
На средбата свои обраќања имаа пратениците: Антонио Милошоски, Лидија Тасевска и Сашо Василевски, во кои заедничка беше констатацијата дека Северна Македонија треба да добие датум за почеток на преговорите со ЕУ во јунската сесија на Советот бидејќи посветено работи на ЕУ-реформите во правосудството и владеењето на правото. Сега, кога е надминат долгогодишниот спор за името со Грција, со ратификацијата на преспанскиот договор и со потпишувањето на договорот за соработка со Бугарија, земјата треба да добие валоризација за успешно завршените задачи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Јавното обвинителство се обиде да ја релативизира одговорноста на актуелните функционери

Според СДСМ, со денешната прес-конференција, Јавното обвинителство уште еднаш потврдило дека постои сериозен обид да се минимизира и релативизира одговорноста на носителите на актуелни функции и институции поврзани со трагедијата во Кочани.
Од опозициската партија велат дека наместо да се лоцира институционалната одговорност и да се повикаат на одговорност директорите на Државниот пазарен инспекторат, УЈП и други релевантни органи кои имаа обврска да постапуваат, фокусот се префрла на индивидуални случаи и на маргинални групи, избегнувајќи ја суштината – зошто и како фирма увезувала и со месеци продавала опасна пиротехника без дозвола, и кој тоа го дозволил.
Дополнително, како што се додава, наместо да се отворат посебни истраги за секој аспект од случајот – за незаконскиот увоз, за институционалниот надзор, за реакцијата на полицијата и за конкретните пропусти на диското, Обвинителството сѐ спакува во еден предмет, со што ризикува да се развлекува постапката со години, па дури и децении. Со ваков пристап, правдата станува недостижна – а тоа е неприфатливо.
„Сериозно прашање е и одлуката приведените полицајци и полициски функционери, кои биле одговорни кобната вечер, да се пуштат на слобода со мерки за претпазливост. Особено загрижува фактот дека двајца од нив биле пресретнати на пат кон граница со Бугарија, што отвора сомнеж за можно бегство и криење на вината.
СДСМ уште еднаш потенцира – без целосна и непристрасна истрага, без одговорност за институциите и носителите на функции кои затаиле, нема да има вистинска правда за жртвите и нивните семејства.
Граѓаните гледаат. И со право очекуваат правда“, се додава во партиското соопштение.
Македонија
(Видео) Во Гази Баба се гради огромна дива депонија без никакви дозволи, објави Арсовска

Во општина Гази Баба, фирма затекната од инспекторат на град Скопје при вршење нелегални активности, правење огромна дива депонија со градежен и опасен отпад и бесправна експлоатација на земјиште, без лиценци, елаборати, дозволи и одобренија, што претставува сериозна опасност по здравјето на граѓаните и животната средина, објави градоначалничката на Град Скопје, Данела Арсовска.
„Апелираме до Министерството за внатрешни работи да постапи, бидејќи неказнивоста и непостапувањето предизвикува сторителите на вакви дела да мислат дека се недопирливи пред законот. Фирмата која прави дива депонија и каде се експлоатира, го има поткопано 110kV кабловски и воздушен далновод кој го напојува со електрична енергија градот Скопје. На ова земјиште сопственост на Република Македонија се прави сериозна штета на главниот далновод, известени се сите надлежни институции за кои очекуваме да не се кријат и да постапуваат“, вели Арсовска.
Македонија
Кривични пријави против двајца угостители од Берово и од Пехчево за бесправно градење

Полицијата поднесе кривични пријави против правно лице – угостителски објект од Пехчево и против С. П. (43) од Пехчево и против правно лице – угостителски објект од Берово и В. К. (32) од Берово поради постоење основи на сомнение за сторени кривични дела бесправно градење.
Пријавениот С.П., сопственик и управител на правното лице од Пехчево, на катастарска парцела во Пехчево во државна соспственост, без одобрение за градење издадено од надлежен орган, изградил тврд објект во кој што е сместен угостителскиот објект и вршел угостителска дејност.
Пријавениот В.К., сопственик и управител на правното лице од Берово, на катастарска парцела, сопственост на Т.К. и М.К., на земјоделско земјиште, надвор од урбанистички план за град Берово, бесправно изградил тврд објект во кој што е сместен угостителскиот објект во кој вршел угостителска дејност.