Македонија
Црната листа на антикорупциската: СДСМ вработил 29 роднини на функционери, ВМРО-ДПМНЕ – 15, а ДУИ – 8
Државната комисија за спречување корупција одлучува дали има непотизам кај 29 вработувања помогнати од функционери на СДСМ, 15 вработувања помогнати од функционери на ВМРО-ДПМНЕ и 8 помогнати од функционери на ДУИ, кои се дел од 60-те вработувања за кои веќе се отворени предмети.
Лидери по број на вработени роднини се пратеникот Антонио Милошоски и поранешниот градоначалник на општина Лозово, Орце Цветковски, од ВМРО-ДПМНЕ. Двајцата се на црната листа на антикорупциската со по четворица вработени. Под истрага се вработувањата на снаата, вујкото и двајцата братучеди на Милошоски, а градоначалникот, пак, се истражува дали помогнал во вработувањето на синот, внукот, внуката и еден братучед.
Зад нив, со по тројца вработени, се пратеничката Мира Стојчевска од СДСМ поради вработувањата на сопругот, синот и братот, пратеникот Александар Кирацовски од СДСМ поради вработувањата на сестрата, дедото и бабата, пратеничката Тања Ковачев од СДСМ кај која ќе се истражуваат вработувањата на сопругот, сестрата и зетот за сестрата, а со три вработувања на листата е и министерот за локална самоуправа Сухејљ Фазлиу од ДУИ поради вработувањата на двете сестри и еден внук.
По две вработувања имаат пратеникот Сашко Атанасов од СДСМ, Елена Гошева, претседателка на Уставниот суд во периодот 2013-2016 година, Анастасија Илиевска, советник за безбедност во кабинетот на претседателот и Игор Јанушев од ВМРО -ДПМНЕ, поранешен директор на ЈСП „Скопје“.
Од роднините на функционерите најмногу вработувања има во ЕЛЕМ – 8, по пет вработувања има во МВР, во општини и во основни училишта, четири вработувања во АЕК се под лупа на антикоруциската комисија, по три во Основен суд 1 и во УЈП, по две во Централен регистар, ЦРМ Струмица, АД Станбен и деловен простор, ЈП „Водовод и канализација“ и детски градинки, а по едно вработување ќе се истражува во Агенцијата за катастар, во Агенцијата за разузнавање, во Агенцијата за супервизија и осигурување, во Владата, во ДУД „Мирка Гинова“, Здравствен дом – Македонски брод, ЈПВ „Лисиче, Велес, МЕПСО, „Македонски шуми“, РЕК „Битола“, „Телеком“, Министерството за транспорт, ФИТР, Царинската управа, ЦУК и Шумската полиција – Делчево.
До сите институции во кои има вработени за кои се отворени истраги антикорупциската комисија веќе има испратено барања за отстапување на документацијата за вработувањата. Претседателката Билјана Ивановска вели дека институциите почнале да одговараат на барањата.
„До крајот на оваа и почетокот на следната недела истекуваат роковите за одговор на барањата од првите 18 отворени предмети. Веќе почнаа да стигнуваат документациите, некои од институциите одговорија. За другите 42 предмета роковите сè уште течат. Ова се предметите што ги отворивме ние по допрен глас, а по изборите, ќе отвориме и нови предмети. Веќе имаме 200 претставки од политичките партии за вработувања за кои треба да се испита постоење непотизам “, изјави претседателката Ивановска за „Макфакс“.
Во 60-те отворени предмети најмногу вработени се роднини на пратеници, а најмногу се вработувале сопружници, синови и ќерки и сестри.
Поради јавно укажаниот непотизам, под притисок на јавноста досега оставки си поднесоа братот и сопругот на пратеничката Мира Стојчевска, вработени во РЕК „Битола“ и во Шумската полиција во Делчево, дедото на пратеникот Александар Кирацовски, вработен во ЕЛЕМ, синот на пратеникот Горан Мисовски, вработен во Агенцијата за супервизија и осигурување, и мајката на пратеникот Костадин Костадинов, вработена во ЦРМ – Струмица.
Министерот за информатичко општество и администрација, Дамјан Манчевски, неделава изјави дека нема точна бројка на поднесени оставки поради непотизам, но рече дека нивниот број ќе расте оти постапката е во тек. За конечна бројка на оставки министерот рече дека ќе ги чекаат одлуките на антикорупциската комисија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Одлуки за учество на припадници на Армијата на вежби во Германија, Бугарија, Косово
Владата на денешната седница донесе и повеќе одлуки на предлог на Министерството за одбрана, меѓу кои и за испраќање на припадници на Армијата на Република Северна Македонија за учество на вежбата „BEYOND HORIZON 24“, во Република Бугарија, за испраќање на припадници на Армијата на Република Северна Македонија за учество во НАТО операцијата „КФОР“ во Република Косово и за испраќање на припадници на Армијата на Република Северна Македонија за учество на вежбата „Combined Resolve 24-2“ во Сојузна Република Германија.
Македонија
Личните документи ќе можат да се подигнат и в среда, извести МВР
Во пресрет на претстојните Претседателски и Парламентарни избори што ќе се одржат утре, Министерството за внатрешни работи ги известува граѓаните дека Одделот за граѓански работи, односно сите отсеци за управни работи на оваа организациона единица при МВР на 08.05.2024 ќе работат за издавање на лични документи со работно време од 08.00 до 19.00 часот.
„Исто така ги известуваме граѓаните дека сите барања за лични карти кои се поднесени до 03.05.2024 година, се веќе изготвени и граѓаните можат да ги подигнат“, соопшти МВР.
Македонија
Пронајдени три полуавтоматски пиштоли и 139 куршуми, ОЈО Велес отвори истрага за недозволено држење оружје
Основното јавно обвинителство Велес донесе Наредба за спроведување истражна постапка против едно лице за кривично дело – Неовластено изработување, држење, посредување и тргување со оружје или експлозивни материи од член 396 став 5 во врска со став 3 на Кривичниот законик.
„При претрес во домот на осомничениот во селото Мелница, општина Чашка, полицијата пронашла поголемо количество оружје и муниција – три полуавтоматски пиштоли и 139 куршуми со различен калибар. За осомничениот поднесен е предлог за определување мерка притвор“, соопшти Обвинителството.
ОЈО Велес продолжува да постапува и да презема дејствија за проверка на сомненијата за изборен поткуп во однос на овој осомничен и на уште едно лице во велешко кај кое во текот на вчерашниот ден беа извршени претреси, се додава во соопштението.