Македонија
(Видео) Неисправни сопирачки и голема брзина главни причини за несреќата кај Ласкарци
Неисправни сопирачки на автобусот и недозволена брзина на движење, како и пропусти во работењето на компанијата, се главните причини за несреќата кај Ласкарци, што се случи на 13 февруари, а во која загинаа 15 лица, соопшти обвинителот Сашо Рајчев од скопското Обвинителство.
„Според вештите наоди и мислења, евидентирани се кочења кога автобусот ја преминал заштитната ограда во двете насоки. Но, брзината не му овозможила да го сопре автобусот пред да се преврти“, рече Рајчев.
Истрагата покажала дека возачот се движел со брзина од 99 километри на час иако на автопатот било дозволено возење со 80 километри на час и дека го активирал уредот за манипулација на тахографот за да не ја прикаже вистинската брзина на движење. Поради големата брзина, тој изгубил контрола и излетал со автобусот во бездна.
Рајчев соопшти дека седум лица се приведени во врска со несреќата, меѓу нив се и возачот на автобусот и сопственикот на компанијата „Дурмо турс“. Шестмина се осомничени за кривично дело тешки дела против безбедноста на луѓето и имотот во сообраќајот, а седмото лице е осомничено за несовесно работење во службата. Сите седуммина денеска ќе бидат изведени пред судот. За шестмина Обвинителството побара притвотр, а за седмиот осомничен побара определување мерки за претпазливост.
Сопственикот на „Дурмо турс“ е првоосомничен. Тој не го организирал автобускиот превоз врз основа на законските прописи и му го препуштил раководењето на возниот парк на второосомничениот – раководителот на правното лице. Според истрагата, сопственикот не се грижел за исправноста на тахографот. Исто така, и двајцата знаеле дека не е исправен уредот за сопирање, ама не презеле ништо.
Трето, четврто и петтоосомничениот се вработени во станицата за технички преглед. Во јули и декември 2018 бил извршен технички преглед на автобусот и било забележано дека има проблем со сопирачките, но сепак издале документ дека автобусот е исправен.
Шестоосомничен е возачот, а седмото лице е осомничено дека издало потврда оти тахографот во автобусот е исправен, без да спроведе проверки.
Обвинителството ја продолжува истрагата. Рајчев рече дека и денеска ќе бидат сослушувани сведоци.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мисајловски: Ветуваме дека сите дечиња ќе ги запишеме во градинките, сите ученици ќе добијат учебник
Ние како нова влада ветуваме дека сите дечиња ќе ги запишеме во градинките, дека сите дечиња ќе добијат учебник, рече денеска Владо Мисајловски, потпретседател на ВМРО-ДПМНЕ и носител на изборна единица 2.
„Денеска сме тука во Ѓорче Петров во Стопански Двор каде што позади мене ова место набрзо ќе започне изградба на градинка и навистина ми е драго и со огромна чест и задоволство можам да најавам јас заедно со Бојан дека за кратко започнува новата градинка во Ѓорче Петров. Онаа градинка каде што јас и Бојан како пратеници во Собранието поднесовме амандмани и ни беа прифатени од владата и Александар Стојкоски како градоначалник ги започна сите постапки и веќе наскоро ќе потпише договор за да се гради таа градинка во Ѓорче Петров.
Ние како нова влада ветуваме дека сите дечиња ќе ги запишеме во градинките, дека сите дечиња ќе добијат учебник. И затоа ова ветување ни е многу важно за да се започнат сите градинки со изградба. И навистина во Ѓорче Петров имаше голем проблем изминативе години со запишување на дечиња, со нови градинки и така натаму.
Но со одличната работа на Александар и неговиот тим може да видиме дека листата е намалена, со отворање на нови градинки, со нови реконструкции, со нови можности и адаптација дека многу дечиња се згрижија. Но со оваа градинка тука во Стопански Двор навистина е полн погодок и уште еднаш ми е драго што јас и Бојан навистина поднесувавме стотици и стотици амандмани, но овој беше прифатен и околу 60 милиони денари токму тука во Стопански Двор за брзо ќе започне нова градинка во Ѓорче Петров.
Аирлија нека се сите овие проекти. Може да видиме дека во Ѓорче Петров насекаде е раздвижено, се градат нови улици и тука во Стопански Двор, се градат нови улици во Кисела Јабука, се гради во урбаниот дел, се градат нови спортски терени. Вака се сака Ѓорче Петров, вака се сака Македонија. Но за да има уште повеќе проекти и за победува Македонија сите масовно на 8 ми мај да ставиме печат, да ставиме печат на победата на ВМРО-ДПМНЕ и Коалицијата Твоја Македонија и после тоа владата да ги засука ракавите и уште повеќе проекти да има за сите луѓе во Македонија“, рече Мисајловски.
Македонија
Сајкоски: Ќе вложиме во РЕК Битола, комбинатот ќе биде во полн сјај и ќе бидат реконструирани блоковите
Битола е на врвот на агендата на идната влада на ВМРО-ДПМНЕ, рече денеска Ѓорѓија Сајкоски, генерален секретар на ВМРО-ДПМНЕ и носител на изборна единица 5.
„Сакаме да им гарантираме дека Битола ќе биде културен, образовен, економски и енергетски центар. Ќе вложиме во РЕК Битола , комбинатот ќе биде во полн сјај и ќе бидат реконструирани блоковите. Сакаме исто така да укажеме дека ќе вложуваме и во општина Битола. Секоја година општината од владата ќе добива 11 милиони евра, ќе се направат влезовите во Битола. Но, владата исто така ќе ја направи обиколницата до Меџитилија, ќе вложи многу средства за градот Битола. Сакам да ги повикам битолчани во што поголем број на изборите на 8 мај да се приклучат исто како и во првиот круг за да донесеме една голема победа на ВМРО-ДПМНЕ и победа за Македонија“, изјави Сајкоски.
Македонија
Костадиновска-Стојчевска: „Битолски весник“ – пирејот на демократските и културните процеси
Министерката за култура, Бисера Костадиновска – Стојчевска присуствуваше на културната манифестација во Офицерскиот дом во Битола, организирана по повод 60 годишното постоење на локалниот „Битолски весник“. Со честитката за јубилејот желбата за ново децениско опстојување, таа потенцираше дека годишнината е прилика да се нагласи важноста на слободата на медиумите и нивниот придонес во развој на културата.
–„Битолскиот весник“ како пиреј 60 години опстојува простум во медиумскиот етер. Ги паметам изданијата од мојата младост и горда сум на истрајноста и активноста на весникот, со кои се вбројува во релевантен и уникатен презентер на градската колективна меморија. Весникот во континуитет е организатор на културни и хуманитарни настани со што го потврдува својот придонес во позитивните промени во културата,- истакна Костадиновска – Стојчевска.
Низ изложбата со весниците од изминатите шест децении јавноста се присети на архивата и бројноста на изданијата низ кои се потенцирани приказните за животот на човекот. Многу од нив придонеле и за промоција на културните вредности.
–Од 1964 година до денес „Битолски весник“ придонесува за развој на плурализмот и слободата на говорот што го прави чинител во демократските процеси. Единствениот локален весник ја потенцира важноста на гласното новинарство и значењето на вистинското информирање во опкружувањето со дезинформации и лажни вести. Ја нагласувам важноста на медиумите како дел од демократија и ја почитувам нивната слобода и независност во придонесот за заедничка европска иднина“- нагласи министерката за култура од настанот во Битола.
На 29 април, во далечната 1964 година, во предвечерјето на празникот 1 Мај, излезе првиот број на Битолски весник. По повеќе неуспешни обиди да се издаде градски весник, група ентузијасти предводени од првиот главен и одговорен уредник на весникот, Владо Ласковски го издадоа првиот број на Битолски весник.
Во изминатите 60 години весникот се афирмирал и како организатор на значајни манифестации. Веќе 24 години успешно ја организира манифестацијата „Избираме најуспешни битолчани“. 19 години ја доделува наградата за новинарство „Тоде Петревски“, а организирал и бројни хуманитарни акции.
Битолски весник е добитник на многу признанија и дипломи, меѓу кои и највисокото признание на Битола, наградата 4 Ноември.
На денешната свечена Академија беа врачени златни плакети на заслужни поединци, установи, инсититуции, кои дале значаен придонес во опстојувањето на „Битолски весник“.