Македонија
Сомнежи за новозарзени со МРСА, екипи од ДСЗИ и ЦЈЗ на терен
Родители на деца што одат во градинката во Чаир и во училиштето во Бутел, каде што има заразени со бактеријата МРСА, утрово кај наставничките и кај воспитувачите пријавиле новозаразени деца, но официјална потврда за ширење на бактеријата нема. Екипи од Центарот за јавно здравје и од Државниот санитарен и здравствен инспекторат денес прават проверки за откривање нови случаи.
„Екипи на Државниот санитарен и здравствен инспекторат и на Центарот за јавно здравје се на терен. Се проверуваат сите наводи каде што има индиции за присуство на бактеријата МРСА. До овој момент потврда за новозаразени со бактеријата МРСА нема, но се прават проверки“, изјави Иринка Сотирова-Бухова, директорка на Државниот санитарен и здравствен инспекторат, за „Макфакс“.
Од Центарот за јавно здравје и од Инспекторатот апелираат родителите да ги почитуваат процедурите и доколку имаат позитивен наод на бактеријата, тоа да го пријават за да може да се преземат мерки. За да сепреземат мерки, потребно е наодот, со миелсње од матичниот лекар, да го проследат во Центарот за јавно здравје кој, пак, треба да го извести Инспекторатот, кој наложува механичко чистење и други санитарни мерки на местата каде што престојувале заразените со МРСА.
Нов случај на заразени со МРСА денес нема ниту во Институтот за јавно здравје. По паниката кај родителите на дечињата што одат во градинката и во училиштето каде што се откриени заразените со бактеријата, епидемиологот Жарко Караџовски од Институтот за јавно здравје вели дека нема потреба од паника доколку бактеријата се појави кај здрави деца.
„Бактеријата може да направи проблем доколку се појави кај лица со намален имунитет, кај лица што имаат други заболувања и кај новороденчиња. Кога се појавува кај здрави деца, таа не може да направи проблем. Иако на повеќето антибиотици е резистентна, сепак има антибиотици со кои се лекува и нема потреба од паника“, изјави епидемиологот Караџовски за „Макфакс“.
Тој објасни дека бактеријата, во зависност од тоа каде е пронајдена, може да предизвика инфекција на кожата, а ако е во грлото или во носот, може да предизвика бронхитис и воспаление на белите дробови. Според него, основа за појава на бактеријата е недоволната хигиена.
Државниот санитарен и здравствен инспекторат извести дека во училиштето во Бутел и во градинката во Чаир се преземени сите мерки за чистење и дезинфекција.
Надлежните утврдија дека едно дете заразено со МРСА има во основното училиште „Панајот Гиновски“ во Бутел, а три случаи се регистрирани во детската градинка „Снежана“ во Чаир.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Во Собранието седници на три комисии
Во Собранието денеска седници ќе одржат Комисијата за финансирање и буџет, Законодавно-правната комисија и Комисијата за политички систем и односи меѓу заедниците.
На дневен ред на Комисијата за финансирање и буџет и Законодавно-правната комисија се две точки – Предлог на законот за изменување и дополнување на Законот за експропријација, по скратена постапка и Предлог на законот за изменување и дополнување на Законот за спречување перење пари и финансирање на тероризам, со европско знаме и по скратена постапка.
Скопје
Делови од Ѓорче Петров и Кисела Вода денеска без струја
Поради планирани зафати во електро дистрибутивната мрежа, денеска без напојување со електрична енергија ќе останат:
-Во период од 10:30 – 11:00 часот, дел од корисниците на место.наречено Присојница – Горно Нерези во општина Ѓорче Петров
– Во период од 09:00 – 12:00 часот, дел од булевар Борис Трајковски (кај Вардар мебел) во општина Кисела Вова.
Македонија
Сончево со мала до умерена облачност
Времето денеска ќе биде сончево со мала до умерена облачност. Попладне и во вечерните часови облачноста ќе се зголеми, а во западните делови ќе има повремен локален дожд. Ќе дува умерен, а наместа долж Повардарието повремено засилен ветер од југоисточен правец. Минималната температура ќе биде во интервал од 1 до 10, а максималната ќе достигне од 22 до 27 степени.
Во Скопје сончево со умерена облачност, која кон крајот на денот ќе се зголеми. Ќе дува умерен, а во делови од котлината повремено засилен ветер од југоисточен правец. Минималната температура ќе се спушти до 5, а максималната ќе достигне до 27 степени.
Под влијание на циклонска активност во петок и во деновите од викендот времето ќе биде променливо облачно со повремени врнежи од дожд. Наместа врнежите ќе бидат пообилни, локално во форма на невреме, проследени со грмежи и засилен ветер.
Потоа во следните два дена ќе настапи стабилизирање на времето.