Свет
Десет деца убиени во Авганистан во американски воздушен напад
Десет деца, дел од истото пошироко семејство, беа убиени во американски воздушен напад во Авганистан заедно со три возрасни цивили, објавија во понеделникот Обединетите нации.
Нападот рано во саботата беше дел од борбата меѓу талибанците и комбинираните авганистански и американски сили што траеше 30-ина часа во Кундуз, северна провинција каде што талибанците се силни.
Децата и нивното семејство биле раселени од другите делови на земјата како резултат на борбата меѓу силите на двете страни, соопшти Мисијата на ОН за помош во Авганистан (УНАМА) во своите првични сознанија за инцидентот. УНАМА потврдува и дека сите 13 жртви загинале за време на воздушниот напад.
Тројца други цивили беа повредени.
Полковничката Дебора Ричардсон, портпарол на мисијата за поддршка предводена од НАТО во Авганистан, во неделата потврди дека американските сили го спроведоа воздушниот напад. Таа рече дека мисијата има цел да ги спречи цивилните жртви, а талибанците намерно се кријат меѓу цивилите.
Рекорден број авганистански цивили беа убиени минатата година кога се зголемија и воздушните и самоубиствените бомбашки напади, објавија Обединетите нации во еден извештај од февруари. Бројот на деца жртви од воздушните напади секоја година се зголемува од 2014 наваму, се додава во извештајот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Борел: Западен Балкан има историска можност да ја поврзе својата иднина со ЕУ
Високиот претставник за надворешна и безбедносна политика на ЕУ, Жосеп Борел, по повод 20-годишнината од најголемото проширување на ЕУ, изјави дека работата за повторно обединување на Европа не е завршена и порача дека Западен Балкан има историска можност цврсто да ја врзат својата иднина со Европската унија.
„Западен Балкан, Турција, Украина, Молдавија и Грузија имаат историска можност цврсто да ја врзат својата иднина со ЕУ. Проширувањето на ЕУ е трансформативна политика која ја подобрува безбедноста, правдата и демократијата, истовремено подигнувајќи го животниот стандард на Европејците“, се вели во соопштението на Борел.
Тој додаде дека ЕУ и земјите кандидати соработуваат на полето на безбедноста и одбраната со цел подобро да се соочат со повеќе геополитички предизвици заедно. Борел изјави дека од идните земји-членки се бара да ги зајакнат своите демократски институции и да ги поддржат човековите права и основните слободи, додека ЕУ работи на нејзината реформа и денес се подготвува за „Унијата на утрешниот ден“.
Тој подвлече дека целта не е само за поголема ЕУ, туку и за посилна, „способна да ги зачува и проектира нашите заеднички вредности низ целиот свет“.
Свет
Премиерката на Бангладеш: Сопствениците на фабрики да се откажат од луксузот заради вработените
Премиерката на Бангладеш Шеиха Хасина за време на своето обраќање по повод празникот Први мај ги повика сопствениците на текстилните фабрики и другите фабрики од Бангладеш да ги подобрат условите за работа на своите вработени со тоа што ќе се откажат од дел од својот луксуз.
„Сакам сопствениците (фабриките) да посветат посебно внимание на работниците, намалувајќи го малку нивниот луксуз, бидејќи работниците ви дадоа простор да водите луксузен живот со зголемување на производството со нивната напорна работа“, рече Хасина.
Таа, исто така, ги предупреди работниците да ги игнорираат повиците за штрајк бидејќи „на тој начин работниците понекогаш всушност си нанесуваат штета себеси, на своите семејства, на земјата и на сопствениците на фабриките“, пренесува агенцијата БСС.
Свет
Уривање на дел од автопат во Кина: Најмалку 24 лица загинаа, 30 се повредени
Најмалку 24 лица загинаа, а 30 се повредени при уривање на дел од автопат на југот на Кина, во провинцијата Гуангдонг, јавија кинеските медиуми.
„Осумнаесет автомобили паднаа по падината откако се урна дел од автопатот долг 17,9 метри околу 2 часот по полноќ“, се вели во соопштението на властите во градот Мејџоу во провинцијата Гуангдонг, пренесува АП.
Според американската агенција, околу 11:45 часот по локално време под урнатините биле пронајдени 18 автомобили.