Македонија
(Видео) Ципрас: За трговските марки ќе решава посебен комитет во мај

Ова е важен ден за Балканот не само за Грција и Северна Македонија, порача грчкиот премиер, Алексис Ципрас, кој нагласи дека верува оти денес овде се обидуваат заедно со македонскиот премиер да изградат поинаква историја за Балканот. Да го прекинат наративот на национална омраза и да се обидат да изградат наратив на разбирање.
Тој посочи дека ова е прва посета на грчки премиер на земјава, дека се изгубени три децении и дека мора да се побрза да се премостат овие јазови.
„Разговаравме за соработка во рамки на НАТО и регионот. Квадрилатерална соработка. Најважно прашање беше економијата, мора да забрзаме да ги премостиме јазовите. Има многу грчки претприемачи кои се активни во Северна Македонија, сепак, денес носиме повеќе од 100 кои ќе имаат можност да разменат идеи на бизнис-форумот за подобри билатерални односи“, изјави Ципрас.
Најави дека ќе се избегне двојно даночење, имајќи предвид, како што рече, тоа што двете земји немаа нормални односи во изнинатите 30 години.
„За точно да го спроведуваме договорот, преземавме големи чекори напред. Средбите на комитетите за образование, за учебниците направија голем чекор. Денес решивме до средина на мај група експерти од двете земји да се сретне и да се решат прашањата што постојат со децении. Комитет кој ќе најде решение за трговските марки и брендовите. Важно прашање, според мене, се институциите кои ќе вршат надзор на спроведување на договорот. Ќе има совет кој ќе врши надзор на ниво на министерствата за финансии“, истакна грчкиот премиер.
Тој заклучи дека оваа посета е историска и дека треба да се градат мостови наместо ѕидови. Порача дека Грција ја поддржува Северна Македонија во напорите да стане дел од ЕУ.
„Ние ќе бидеме тука да ве поддржиме. Бевме пречекани со љубов и пријателство, градиме силно пријателство“, рече Ципрас.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Петрушевски: Венко Филипче ти имаш фирми во Бугарија, на адреса со Заев каде се свртеа 9 милиони од јагленот од РЕК

„Вечерва Венко Филипче, пред 30-тина луѓе во мала сала во Кисела Вода, потрошил голем дел од својот говор за да ме навредува. Редно е да одговорам“, напиша на социјалните мрежи Бране Петрушевски од ВМРО-ДПМНЕ.
„Венко, најмалку ти имаш право кој било да го обвинуваш за „лажење“ и „бугаризација“. Јас немам бугарски пасош, немам фирми во Бугарија и немам тајни зделки зад грбот на народот. Ајде еднаш биди искрен и признај дека токму ти си синоним за милионски шеми со фирми во Петрич, заедно со браќата!
Не мора на мене, туку на јавноста дај и одговори: Каде завршија 9 милиони евра од јагленот за РЕК Битола? Зошто на иста адреса во Петрич се појавуваат фирми на твоето семејство и на Вице Заев? Дали тие пари завршуваа во ваши фотоволтаични централи, додека народот го оставивте да плаќа скапа струја? Дали преку бугарски фирми финансирате бизниси по светот, додека Македонија ја потонавте во сиромаштија?
Ова се вистинските прашања, Венко.
Не лажи дека јас или Христијан Мицкоски имаме такви врски. Ние немаме ниту бугарски пасоши, ниту скриени фирми. Ние имаме чесна и чиста биографија.
ВМРО-ДПМНЕ и Мицкоски се јасно определени за Македонија во ЕУ, но како достоинствена држава, без понижувања и без тргување со националните интереси.
Доста е од лицемерието Венко! На народот му е јасно дека додека си трупавте милиони преку Бугарија, граѓаните останаа со празни џебови“, вели Петрушевски.
Македонија
Забрана за тешки товарни возила на неколку патни правци

Од 19:45 часот на магистралниот пат Маврово – Дебар воведена е забрана за тешки товарни возила поради задржување на снег на коловоз, извести АМСМ.
Од 19.55 часот воведена е забрана за тешки товарни возила и за патниот правец Гостивар – Стража, додаваат од АМСМ.
Македонија
Посебен сообраќаен режим утре во Скопје

Од утре петок до сабота, во официјална посета на Р.С.Македонија ќе присуствува претседателот на Владата на Република Србија, Ѓуро Мацут.
Од тие причини Едницата за безбедност на патниот сообраќај ќе преземе мерки за посебен режим на сообраќај на подрачјето на град Скопје.
МВР апелира до граѓаните да се почитуваат наредбите што ќе ги даваат униформираните полициски службеници.