Свет
Во Венецуела е толкава сиромаштија што луѓето ограбуваат гробови
На најголемите гробишта во Каракас, Кементерио дел Сур, повеќето од гробовите се ограбени поради накит, златни заби или дури самите коски од мртовецот. Како што се наведува, тие може да се продадат за користење во ритуали.
На ужалените членови на семејствата на починатите не им преостанува ништо друго, освен редовно да ги проверуваат гробовите. За нив, оваа ситуација е метафора за хаотичната состојба во Венецуела воопшто.
„Доаѓам овде секоја недела или на секои две недели. Чувам стража. Се плашам дека еден ден кога ќе дојдам, нема да ја најдам“, вели Еладија Бастида во изјава за Би-би-си, чија сопруга починала пред една и пол година.
Гробниците што ограбувачите на гробови ги вандализираат може да се видат наоколу. Украдените коски се користат во ритуали на локалниот култ Сантерија.
Провалите се случуваат многу често и работниците на грабиштата велат дека не може да се спречат. Имало грабеж дури и во гробниците на историски личности. Грабежите стигнале до такво ниво што семејствата почнале да ги обележуваат гробовите со натписи – „ова е ограбено“ за да ги одвратат крадците од повторни кражби во истиот гроб.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Водостојот на Дунав расте: во Будимпешта би можело да го достигне својот врв за време на викендот
Дунав, чијшто водостој моментално е над осум метри, би можел да го достигне својот врв во Будимпешта за време на викендот, според прогнозите на метеоролозите.
Во Унгарија, која се бори со поплави откако циклонот „Борис“ предизвика обилни врнежи во Централна Европа, ситуацијата е најкритична во селото Кисмарош, каде мештаните веќе користат чамци по улиците, додека населението на градот Баја се подготвува за најголемата поплава во последните 11 години, пренесува „Index.hu“.
„Во Будимпешта се очекува бавен раст, водостојот на Дунав ќе се зголеми за педесет сантиметри до сабота навечер, по што реката полека ќе почне да се повлекува“, изјави генералниот директор на националното водостопанство Иштван Ланг.
Тој нагласи дека поплавите се големи и дека одбраната е отежната.
Тој рече и дека просечниот водостој на Дунав е околу педесет сантиметри понизок од нивото на водата за време на поплавите во 2013 година, но дека оптоварувањето на одбранбените линии е сепак многу значајно.
Ланг истакна дека времето за одбрана ќе биде подолго од претходно планираното бидејќи падот на водостојот е побавен од очекуваното.
Унгарија се бори со поплави откако циклонот „Борис“ предизвика обилни врнежи во Централна Европа, јавува Танјуг.
Најлошите поплави што ја погодија централна Европа во последните две децении погодија делови од Полска, Чешка, Романија, Австрија и Словачка и однесоа најмалку 24 животи.
Претседателката на Европската комисија, Урсула фон дер Лајен вчера се сретна со лидерите на европските земји погодени од поплавите, меѓу кои Полска, Австрија, Чешка и Словачка и вети финансиска помош од Европскиот фонд за солидарност.
Таа изјави дека ЕУ ќе обезбеди уште 10 милијарди евра од кохезиониот фонд поради огромните штети предизвикани од поплавите
Свет
Ал Каеда ја нападна елитната полициска академија во Мали, 70 мртви
Во разработен напад на огранок на Ал Каеда во главниот град на Мали оваа недела загинаа околу 70 луѓе, соопштија денеска дипломатски и безбедносни извори, додека владата не понуди бројки за жртвите.
Милитантите нападнаа елитна полициска академија за обука и аеродром во вторникот, демонстрирајќи ја нивната способност да удрат во срцето на главниот град на Мали. Земјата се бори со бунтот што се вкорени пред повеќе од една деценија на нејзиниот север.
Обемот и сложеноста на нападот дополнително ги поткопува тврдењата на владејачката хунта дека безбедноста е подобрена откако ги истисна француските и американските сили и наместо тоа, се сврте кон Русија за безбедност.
Огранокот на Ал Каеда, Џама Нусрат ул-Ислам ве ал Муслимин (ЈНИМ) ја презеде одговорноста за нападот во вторникот.
Откако избувна конфликтот во Мали, насилството се прошири и на соседите во регионот Сахел и стигна до северот на крајбрежните земји. Илјадници се убиени, а милиони раселени во регионот, а некои борци се поврзани со Ал Каеда или Исламската држава.
Владејачката хунта во Мали соопшти дека претрпела одредени загуби, без да даде детали. Весниците во Мали објавија дека во четвртокот бил одржан погреб на околу 50 полициски кадети.
Свет
(Видео) Пожарите во Перу излегуваат од контрола: „Ни треба помош“
Властите во ПЕРУ подготвија план за борба против пожарите кои беснеат низ целата земја, уништувајќи ги посевите, оштетувајќи ги археолошките богатства и оставајќи неколку региони во состојба на катастрофа.
Пожарникарите велат дека гаснењето на пожарите е се потешко.
„Уморни сме. Изгаснавме пожар кој повторно се разгоре“, изјави пожарникар доброволец во шумите во северниот регион.
Пожарникарите во областа се повлекле пред пламените јазици.
„Пожарите се надвор од контрола. Потребна ни е помош“, изјави Артуро Моралес, друг пожарникар волонтер.
Претседателката Дина Болуарте во средата прогласи 60-дневна вонредна состојба во регионите Сан Мартин, Амазонас и Укајали, издвојувајќи дополнителни средства за да се спречи ширењето на пожарите. Таа ги повика земјоделците да престанат да палат тревници, поради што, како што рече, пламените јазици неконтролирано се шират.
Шумските пожари во Перу се вообичаени од август до ноември, а според владата, тие се предизвикани од земјоделци или од оние кои сакаат илегално да ја преземат земјата.
Околу 240 пожари избувнаа оваа сезона во 22 од 25 региони во земјата, иако повеќе од 80 отсто беа ставени под контрола до средата.
Некои пожари, сепак, се закануваат да се разгорат повторно со суво време, ветрови и оддалечени локации што го отежнуваат пристапот.