Европа
Туск на самитот за бегалската криза бара затворање на Балканската рута
Европските држави мора да сторат сé за да биде затворена ткн Балканска рута за илегалните имигранти, изјави во саботата претседателот на Европскиот совет, Доналд Туск, на самитот во австриската престолнина Виена посветен на бегалската криза на којшто учествува и македонскиот премиер Емил Димитриев, пренесуваат агенциите.
„Мораме политички и практично да утврдиме дека Балканската рута е засекогаш затворена за илегалните имигранти“, изјавил претседателот на Европскиот совет, Доналд Туск на состанокот со челниците на земјите кои се наоѓаат на оваа рута, вклучително и Македонија, Бугарија, Грција, Србија, Словенија, Хрватска, Унгарија и Германија, на покана на австрискиот канцелар Кристијан Керн.
Туск истакнал дека за постигнување на таа цел е клучна соработката на земјите членки на Европската унија со балканските земји и со Турција. „Денешната дебата би требало да придонесе за тоа нашите активности да бидат уште поделотворни“, рекол челникот на Европскиот совет.
Европскиот комесар за миграции, Димитрис Аврамопулол, бил поостар во својот тон во однос на Турција, барајќи дека секое европско решение мора да се заснова на „хуманоста и достоинството“.
Ги критикувал членките на ЕУ кои не успеаја да се договорат за заедничка мигрантска политика. „Сите ние зборуваме за солидарноста во Европа, солидарноста не е ‘а ла карт’, туку станува збор за одговорност, темелни вредности и принципи, станува збор за обврски кои произлегуваат од начелата на Европската унија“, истакнал Аврамопулос.
На претходниот сличен самит, исто така, во Виена во февруари годинава, челниците одлучија да ја затворат ткн Балканска рута, всушност главниот правец за имигрантите кои доаѓаат во Грција и преку балканските земји се упатуваат кон западните европски држави, во прв ред Германија и Австрија.
Тогаш ваквата одлука, донесена откако некои западни земји одлучија да го заострат критериумите за примање на илегалните имигранти, ги разгневи Грција и Германија, кои не учествуваа на тој самит. Мигрантите заглавија на грчката граница кон Македонија, а Берлин кој ја спроведува политиката на канцеларката Ангела Меркел за отворени врати за барателите на азил, предупреди дека затворањето на границите не се одговор на мигрантската криза./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Во Киев се урива споменик кој ја слави блискоста меѓу Русија и Украина
Властите на Киев во вторникот почнаа да го отстрануваат споменикот од советската ера што ја означува врската меѓу Русија и Украина, повеќе од две години откако Москва започна инвазија врз Украина.
Неколку дена ќе бидат потребни за целосно уривање на споменикот од црвен гранит, кој се состои од дваесетина поединечни елементи, соопшти градската управа.
Тоа е всушност група статуи кои прикажуваат украински Козаци кои го опкружуваат лидерот Богдан Хмелницки и московскиот амбасадор.
Статуите ќе бидат префрлени во воздухопловниот музеј.
Споменикот е изграден во 1982 година за да го одбележи „обединувањето на украинскиот народ со братскиот руски народ“ во 1654 година, кога Хмелницки склучил сојуз со рускиот император во борбата против полско-литванскиот сојуз.
Советските историски книги го романтизираа како почеток на нераскинливо пријателство меѓу Украина и Русија.
Европа
Белоруските спортисти одат на Олимписките игри, Лукашенко: Победете ги противниците
Белорускиот претседател Александар Лукашенко денеска им порача на белоруските спортисти кои учествуваат на Олимписките игри во Париз под неутрален статус „да ги победат своите противници“.
„Ако сте избрале и одите таму под неутрален статус, истепајте ги, покажете им дека сте вистински Белоруси“, рече Лукашенко во соопштението за печатот на претседателството.
За време на посетата на регионот Могилев во Белорусија, жителите го прашале Александар Лукашенко што мисли за ова учество под неутрален статус, се вели во извештајот објавен на веб-страницата на белоруското претседателство.
„Спортистот треба да избере. Доколку одлучи да учествува на Олимписките игри, ќе биде уште пожесток. Затоа што разбирате дека состојбата на умот и гневот не се од мала важност во спортот“, реагира Лукашенко. „Вие сте Белорусија и кога ќе излезете како победници, тоа е добар начин политички да ги удрите во лице“.
Лукашенко, кој е на власт од 1994 година, ги искорени сите форми на опозиција во неговата земја, потиснувајќи мирно масовно движење во 2020 година. Тој е навикнат и на широки изјави и испади, како на пример кога парадираше со калашников во раката пред демонстрантите кои се противат на неговото владеење, нарекувајќи ги „стаорци“. Во февруари 2022 година, тој ја отвори Белорусија за руската армија за да може да ја нападне Украина од север.
Белорусија беше исклучена како земја од Игрите поради нејзината поддршка за руската инвазија на Украина, а нејзините спортисти се натпреваруваат под неутрален статус, без химна, знаме или национални обележја.
Европа
(Видео) Полицијата го бркаше убиецот со меч низ Лондон, објавена е снимка
Би-би-си објави снимка на која се гледа лондонската полиција која го брка напаѓачот со нож, кој денеска уби 13-годишно момче и повреди неколку други.
На снимката се слушаат полицајците како им викаат на граѓаните: „Заклучете ги вратите“.
Полицијата смета дека не се работи за терористички напад.
Полицајците уапсија маж вооружен со меч по извештаите за сериозен инцидент со прободување во североисточен Лондон.
Со електрошокер бил совладан 36-годишниот маж кој мавтал со меч.
„Со голема тага можам да потврдам дека 13-годишното момче кое беше избодено, почина во болница набргу откако му биле нанесени убодите“, изјави началникот на лондонската полиција Стјуарт Бел.
Уште две лица и двајца полицајци се во болница поради убодни рани и се надвор од животна опасност.
„Не мислиме дека постои закана за пошироката заедница, полицијата не бара други осомничени и се чини дека овој инцидент не е поврзан со тероризам“, рече Бел.