Во неделата, во два одделни случаи во селото Горно Татеши во струшко се случил обид за убиство и тепачка, соопшти полицијата.

Имено, во првиот случај, во 18 часот во полициската станица во Струга, М.Т.(1974) од село Горно Татеши-Струга, пријавил дека околу 14.30 часот додека бил на местото викано Долно Тоски, атар на село Горно Татеши, кон него, еден од синовите на А.И. истрелал неколку рафали со автоматско оружје, но не го погодил.

Полицијата на лице место нашла 14 чаури и еден проектил кој бил во непосредна близина на мотоциклот на М.Т., а кој претходно го пробил седиштето на мотоциклот.

По увидот на лице место, со наредба на истражен судија извршен е претрес во домот и помошните простории на А.И. во Горно Татеши, каде на околу два метри од куќата под запрежна коњска кола пронајдена е една автоматска пушка без сериски број и една рамка со девет куршуми. При претресот, одземени се и една ловна пушка, еден ловен карабин и пиштол марка „Црвена Застава“ М-57, кои ги поседувал со дозвола.

А.И. и неговите синови Б.И. и М.И. се приведени во ПС-Струга. Се преземаат мерки за целосно расветлување на случајот.

Исто така, во неделата околу 19 часот во село Горно Татеши, струшко, дошло до нарушување на јавен ред и мир со меѓусебна тепачка помеѓу лицата П.А., неговите синови Б.А., А.А. и Б.А. од една страна и И.М. и неговите братучеди Д.М. и Џ.М. од друга.

Во тепачката Б.А. со лопата го удрил неколку пати Џ.М., кој се здобил со телесни повреди, додека И.М. се обидел да го спречи Б.А., се здобил со тешки телесни повреди. Лицата се пренесени во МЦ-Струга каде се задржани на понатамошно лекување./крај/со/бб