Спорт
Лазаров: Вардар покажа дека бајките постојат
Македонскиот капитен, Кирил Лазаров во својата колумна за хрватскиот портал „Индекс“ зборува за втората европска титула на Вардар и инспирацијата која нивниот успех треба да ја носи кај сите спортски фанови.
„Ова е бајка. Приказна која ќе се раскажува со години. Вардар стана симбол за сите кои веруваат дека сè е можно. Вардар стана инспирација на сите луѓе на светот, не само за спортистите, туку за сите аутсајдери, да сфатат дека најважното во животот е да се верува, крваво да се работи и да се даде последната капка пот и крв за своите соништа. Овие момци седум-осум месеци немаат добиено плата. Лесно е да се правиме паметни, но единствената вистинска приказна можат да ја раскажат тие кои на својата кожа почувствувале како е да се живее и да се работи со такви услови. Пред две години, кога беа шампиони на Европа, имаа страшен тим, беа финансиски моќни и не беше изненадување што се искачија на врвот на Европа. Ова што се случи е нешто сосема поинакво. Минатата сезона и оваа им заминаа неколку играчи кои беа носители на играта, Циндриќ, Штербик, Борозан и Алекс Душебаев. Никој не им даваше шанси да влезат на Ф4, а не да стигнат до титулата“, пишува македонскиот капитен.
Пораката која Вардар ја праќа е најмоќна: „Немате право на оправдувања и алибија“.
„Само тие веруваа дека можат да направат нешто и тоа е многу поважно од резултатот. Пратија моќна порака на младите спортисти дека нема изговори, нема алибија. Не е важно дали управата не чини, дали се нема пари, дали имаш вакви или такви соиграчи, какви буџети имаат ривалите. Нивната приказна мора да биде патоказ за сите млади луѓе. Неверојатно е како во таа година дена без пари, со постојани написи дека клубот се распаѓа, што немало караници, што не е нарушена хемијата во тимот. Сите проблеми како да ги зближија и да го зголемија инаетот. Во животот сум освоил многу, но ретко кога сум бил толку среќен. Македонец сум и горд сум што ваква спортска бајка раскажа еден македонски тим. Вардар е институција во Македонија, многу повеќе од обичен клуб. Симбол. Се надевам дека овој трофеј и ова чудо ќе ги придвижи работите и дека Вардар ќе биде голем и моќен и во иднина“, додава Лазаров.
Тој имаше што да каже и за Барселона, клубот каде што и тој самиот играше.
„Финалето беше еднонасочно. Веспрем се доближуваше, но никој не веруваше дека ќе се вратат. Клучот беше полуфиналето против Барселона или поточно тоа второ полувреме. Неколку пати ги гледав тие половина час и не ми се верува што направија. На 15 минути пред крај Барса имаше плус шест и контра. И тогаш почна бајката. Тешко е да се објасни што се случи, но ќе се обидам. Во Барселона бев четири години, и тоа е најтрофејниот клуб во историјата, спортска институција и идеален клуб за играње кога се победува. Кога ќе дојде паниката, кога ривалот ќе ја намалува предноста, тогаш Барселона се губи. Се сеќавам пред неколку години против Флензбург, водевме пет-шест разлика и загубивме. Но, тоа не е само во ракометот, туку и во кошарката и фудбалот. Видете што се случи во ЛШ со Рома и Ливерпул“, објаснува Лазаров.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
(Видео) Болоња преку Интер до финалето на Суперкупот
Актуелниот освојувач на Купот на Италија, Болоња, ќе се бори за трофејот во Суперкупот. Болоња во Ријад го победи Интер по изведувањето пенали со 3.2. Во регуларниот дел натпреварот заврши 1:1.
Интер беше подобар во текот на целиот натпревар, но тоа не успеа да го претвори во победа. Турам му донесе предност на Интер во втората минута. Болоња изедначи од пенал во 35-та минута, преку Орослини.
Во пенал серијата, во херој се претвори голманот на Болоња, Раваља. Тој ги одбрани ударите на Бастони и Бони, а Барела шутираше над голот.
Финалниот натпревар се игра в понеделник од 20 часот. Противник на Болоња ќе и биде актуелниот првак Наполи.
Спорт
Алекс Фергусон: Можно е Манчестер Јунајтед уште 10 години да не биде шампион
Легендарниот менаџер на Манчестер Јунајтед, Сер Алекс Фергусон, даде загрижувачка прогноза за иднината на клубот, предупредувајќи дека може да помине уште една деценија пред повторно да го кренат трофејот од Премиер лигата.
Јунајтед ја освои последната титула во лигата во 2013 година, точно во последната сезона на шкотскиот стручњак на клупата.
Фергусон денес има 83 години и освои 13 титули во англиското првенство и две Лиги на шампиони со Јунајтед. Тој го водеше клубот 27 години, од 1986 до 2013 година.
Според Фергусон, клучната причина за долгогодишниот пост лежи во лошиот избор на играчи. Тој истакна дека подобрувањето на процесот на регрутирање и доведување засилувања е неопходен предуслов за враќање на клубот на патеките на старата слава.
Тој посочи три нови играчи, за кои смета дека се засилувања
„Аморим е добра личност, не му е лесно. Кога јас пристигнав, Ливерпул беше одличен. Тие беа европски шампиони, но потоа им требаа 30 години за повторно да ја освојат титулата во англиската лига. Таква е ситуацијата со Јунајтед. Може да потрае уште десет години пред да ја освоиме титулата во лигата.
Мора да се погрижиме да доведеме подобри играчи. Голманот Ламенс беше доведен за да направи разлика. Тој е млад, агилен, висок и знае како да игра со рацете и нозете. Тука се и Мбеумо и Куња, за кои мислам дека исто така ќе бидат од голема помош“, им рече Фергусон на новинарите во Бахреин.
Foto/ depositphotos
Спорт
Гвардиола: Сити мора да се подготви за моето заминување
Тренерот на Манчестер Сити, Пеп Гвардиола, изјави дека клубот „мора да се подготви“ за да го испланира неговото заминување и да пронајде наследник. Иако Шпанецот има договор до крајот на сезоната 2026/27, гласни се шпекулациите дека ќе замине по заврпувањето на сезоната. Би-Би-Си пишува дека клупските челници веќе го започнале процесот на барање потенцијални кандидати за негова замена.
За време на неговата кариера во Сити, која ја започна во 2016 година, Гвардиола се етаблираше како една од најважните фигури во историјата на клубот, освојувајќи шест титули во Премиер лигата и Лигата на шампионите. Кога беше прашан дали ќе го заврши договорот, 54-годишникот одговори криптички.
„Во последните три или четири години во одреден период, ми го поставуваат ова прашање. Порано или подоцна, на 75 или 76 години, ќе го напуштам Манчестер Сити. Го разбирам прашањето, но сè уште имам 18 месеци, и воодушевен сум“, рече Гвардиола.
Кога директно го прашаа дали ќе биде во Сити следната сезона, тој додаде: „Одговорив на тоа прашање и претходно. Тука сум. Што ќе се случи, којзнае, но и да имав договор од 10 години или шест месеци, фудбалот многу се менува.“
Тој, исто така, ги отфрли обвинувањата за разговори за предвремено заминување. „Нема дискусија – крај на темата. Нема да бидам тука засекогаш и претходно реков дека нема да бидам тука засекогаш. Што ќе се случи, ќе се случи и клубот мора да биде подготвен за сè“, заклучи тој.
Во услови на неизвесност, менаџерот на Челзи, Енцо Мареска, кој претходно беше помошник на Гвардиола во Сити, се споменува како еден од потенцијалните наследници. Италијанецот, сепак, категорично ги негираше ваквите гласини.
„Воопшто не ме засега бидејќи знам дека се 100% шпекулации. А во моментов нема време за такви работи“, рече Мареска, чиј договор со Челзи е до 2029 година.
„Мојот фокус, многу пати сум рекол, е само на овој клуб и многу сум горд што сум тука. Пред една недела бев поврзан со Јувентус. Затоа не обрнувам внимание бидејќи знам дека не е вистина.“
Би-Би-Си дознава дека чувството за потенцијална промена го натера Сити да ја интензивира потрагата по наследник на Гвардиола. Се верува дека се идентификувани најмалку двајца кандидати, иако нивните имиња засега остануваат тајна.
Спортскиот директор Уго Вијана има клучна улога во составувањето на списокот, а конечна одлука за иднината на Гвардиола не се очекува пред крајот на сезоната. Сити, кој моментално е два бода зад лидерот Арсенал, е домаќин на Вест Хем во сабота.
Foto/ depositphotos

