Европа
Киев трупа тенкови во близина на Донецк
Украинските сили трупаат тенкови и оклопни возила на околу 20 километри јужно од Донецк, објавија во четвртокот светските медиуми.
Колона тенкови и возила, долга околу еден километар и половина, доцна во средата стигнала на местото каде се собираат украинските воени сили, притоа не наидувајќи на никаков отпор, истакнуваат претставници на украинската војска, пренесува AFP.
Украинските власти деновиве најавиле дека планираат опколување на Донецк и Луганск.
Прокиевските воени сили претрпуваат загуби за време на извршувањето на својата „анти – терористичка“ операција во источна Украина, додека во Донецк проруските бунтовници продолжуваат да ја засилуваат својата самоодбрана, соопштила во четвртокот канцеларијата на самопрогласената Народна Република Донецк, пренесува Итар-Тасс.
Еден вооружен транспортер во текот на средата налетал на мина на патот во близина на селото Краснаја Ѕвезда, при што загинале двајца војници, а шест биле ранети, потврдила на прес-конференција украинската служба за известување на воените сили на Украина, со напомена дека проруските сили и натаму поставуваат мини на патиштата по кои украинската војска напредува кон Донецк и Луганск.
Минатата ноќ еден украински камион на патот во близина на селото Муратов бил пресретнат од митралески оган при што загинал еден војник, а тројца други биле ранети.
Одбрамбените сили, исто така, успеале да оштетат и еден тенк, а раниле двајца украински војници во областа Северск, во регионот на Донецк.
Проруските борци нападнале и повеќе контролни пунктови на украинските сили во регионот Луганск, помеѓу останатите и еден во близина на местото Металист. Во овие напади немало информации за евентуални жртви.
Според соопштението на прес центарот на украинските сили, во „анти – терористичката“ операција на истокот на земјата до сега загинале 173 украински војници, додека 446 биле ранети.
Во операцијата на украинската војска на истокот во Украина, во која се вклучени оклопни возила, тешка артилерија и борбени авиони, до сега загинале повеке стотици цивили, уништени се многу објекти, а десетици илјади лица биле приморани да пребегаат на руска територија.
Во Донецк доцна во средата во пооддрлни делови од градот одекнувале пукотници и експлозии, додека утрото во четвртокот ситуацијата била мирна, а градските служби нормално функционирале, објавил донецкиот градски совет на својот сајт, а пренесува Гласот на Русија.
Според соопштението на РИА Новости, изминатата ноќ, средата спроти четвртокот, биле забележани судири во областите на Славјанск и Краматорск, од каде изминатите два дена се повлекоа главните сили на Народна Република Донецк./крај/мф/ап
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Во Киев се урива споменик кој ја слави блискоста меѓу Русија и Украина
Властите на Киев во вторникот почнаа да го отстрануваат споменикот од советската ера што ја означува врската меѓу Русија и Украина, повеќе од две години откако Москва започна инвазија врз Украина.
Неколку дена ќе бидат потребни за целосно уривање на споменикот од црвен гранит, кој се состои од дваесетина поединечни елементи, соопшти градската управа.
Тоа е всушност група статуи кои прикажуваат украински Козаци кои го опкружуваат лидерот Богдан Хмелницки и московскиот амбасадор.
Статуите ќе бидат префрлени во воздухопловниот музеј.
Споменикот е изграден во 1982 година за да го одбележи „обединувањето на украинскиот народ со братскиот руски народ“ во 1654 година, кога Хмелницки склучил сојуз со рускиот император во борбата против полско-литванскиот сојуз.
Советските историски книги го романтизираа како почеток на нераскинливо пријателство меѓу Украина и Русија.
Европа
Белоруските спортисти одат на Олимписките игри, Лукашенко: Победете ги противниците
Белорускиот претседател Александар Лукашенко денеска им порача на белоруските спортисти кои учествуваат на Олимписките игри во Париз под неутрален статус „да ги победат своите противници“.
„Ако сте избрале и одите таму под неутрален статус, истепајте ги, покажете им дека сте вистински Белоруси“, рече Лукашенко во соопштението за печатот на претседателството.
За време на посетата на регионот Могилев во Белорусија, жителите го прашале Александар Лукашенко што мисли за ова учество под неутрален статус, се вели во извештајот објавен на веб-страницата на белоруското претседателство.
„Спортистот треба да избере. Доколку одлучи да учествува на Олимписките игри, ќе биде уште пожесток. Затоа што разбирате дека состојбата на умот и гневот не се од мала важност во спортот“, реагира Лукашенко. „Вие сте Белорусија и кога ќе излезете како победници, тоа е добар начин политички да ги удрите во лице“.
Лукашенко, кој е на власт од 1994 година, ги искорени сите форми на опозиција во неговата земја, потиснувајќи мирно масовно движење во 2020 година. Тој е навикнат и на широки изјави и испади, како на пример кога парадираше со калашников во раката пред демонстрантите кои се противат на неговото владеење, нарекувајќи ги „стаорци“. Во февруари 2022 година, тој ја отвори Белорусија за руската армија за да може да ја нападне Украина од север.
Белорусија беше исклучена како земја од Игрите поради нејзината поддршка за руската инвазија на Украина, а нејзините спортисти се натпреваруваат под неутрален статус, без химна, знаме или национални обележја.
Европа
(Видео) Полицијата го бркаше убиецот со меч низ Лондон, објавена е снимка
Би-би-си објави снимка на која се гледа лондонската полиција која го брка напаѓачот со нож, кој денеска уби 13-годишно момче и повреди неколку други.
На снимката се слушаат полицајците како им викаат на граѓаните: „Заклучете ги вратите“.
Полицијата смета дека не се работи за терористички напад.
Полицајците уапсија маж вооружен со меч по извештаите за сериозен инцидент со прободување во североисточен Лондон.
Со електрошокер бил совладан 36-годишниот маж кој мавтал со меч.
„Со голема тага можам да потврдам дека 13-годишното момче кое беше избодено, почина во болница набргу откако му биле нанесени убодите“, изјави началникот на лондонската полиција Стјуарт Бел.
Уште две лица и двајца полицајци се во болница поради убодни рани и се надвор од животна опасност.
„Не мислиме дека постои закана за пошироката заедница, полицијата не бара други осомничени и се чини дека овој инцидент не е поврзан со тероризам“, рече Бел.