Црна хроника
Притвор од 30 дена за десетмина од приведените во акцијата „Фаланга 2"

Истражниот судија при Основниот суд Скопје I Скопје, постапувајќи по барањето за спроведување истрага со предлог за определување на мерка притвор за спроведување истрага против обвинетите И.Б, Д.М, К.В, Д.Ш, А.К, З.Н, З.Б, Т.И, С.М, Ш.С, К.Б, З.Т, А.К, А.С, Т.Ц и А.П за предметните кривични дела.
По извршениот распит на обвинетите истражниот судија на обвинетите И.Б, Д.М, К.В, А.К, Ш.С, З.Т, А.К, А.С, Т.Ц и А.П им определи мерка притвор во траење од 30 – триесет дена, а на обвинетите З.Н, З.Б, Т.И и С.М по предлог на Јавното обвинителство им определи превентивна мерка да се јавуваат кај надлежен државен орган.
Превентивните мерки ќе траат додека има потреба од истите, а најдолго до правосилно завршување на постапката.
По однос на обвинетите Д.Ш и К.Б во однос на предлогот за определување притвор истражниот судија не се произнесе. Одлуката ќе биде донесена по прибавување на известување од МВР дали истите во овој момент се наоѓаат на територијата на Р.М и дали се достапни за судот.
Основното јавно обвинителство Скопје за гонење на организиран криминал и корупција поднесе барање за спроведување истрага со предлог за определување на мерка притвор И.Б, Д.М, К.В, Д.Ш, А.К, З.Н, З.Б, Т.И, С.М, Ш.С, К.Б, З.Т, А.К, А.С, Т.Ц и А.П, поради постоење на основано сомнение да сториле кривично дело Злосторничко здружување 4, кривично дело Злоупотреба на службената положба и овластување, Тешка кражба и кривично дело Прикривање.
Во полициската акција „Фаланга 2″ разбиена беше криминална група која ископувала предмети со културна и археолошка вредност и ги продавала во Македонија и во странство.
Во групата учествувале и четири службени лица вработени во Управата за заштита на културното наследство, Музејот на Македонија и Музејот во Демир Капија како и полициски службеник од Велес.
Криминалната група ископувала предмети од археолошки локалитети на територијата на Демир Капија, Свети Николе, Кавадарци и Скопје. Во групата има и двајца Срби кои ги купувале вредните археолошки предмети и истите ги препродавале во западноевропските земји.
Во текот на акцијата приведени се 14 од пријавените лица, двајцата Срби не се достапни, а три лица претходно се пријавувани во врска со истата истрага.крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Црна хроника
Граната од Втората светска војна пронајдена во Бардовци

Вчера околу 13 часот во СВР Скопје е пријавено дека при вршење на градежни работи во с.Бардовци, скопско, била пронајдена стара експлозивна направа.
Полициски службеници од СВР Скопје излегле на местото, а била известена и Дирекцијата за заштита и спасување и било констатирано дека станува збор за граната која најверојатно потекнува од Втората светска војна.
Гранатата ќе биде безбедно подигната од страна на Дирекцијата за заштита и спасување.
Црна хроника
Тешка сообраќајна несреќа кај Блаце, едно лице загина

Едно лице загина во сообраќајна несреќа што се случила вчера на патот од село Горњане кон село Блаце.
Според информациите од МВР, вчера во 17.30 часот во СВР Скопје е пријавено дека на локалниот пат од с.Горњане кон с.Блаце, скопско, товарно возило „мерцедес“ со тетовски регистарски ознаки, управувано од Б.Ш.(46) од с.Желино, тетовско, излетало надвор од коловозот.
Од здобиените повреди на местото на настанот починал Б.Ш., а лекар од Итна медицинска помош констатирал смрт. Извршен бил увид од увидна екипа од СВР Скопје и јавен обвинител, по чија наредба телото на починатиот било дадено на обдукција.
Црна хроника
Предизвикале пожар на градската депонија: уапсени две лица во Демир Хисар

Вчера во 13.30 часот полициски службеници од ОВР Демир Хисар ги лишиле од слобода С.Ф.(28) и А.С.(48), двајцата од Прилеп.
Тие се сомничат за сторено кривично дело „предизвикување општа опасност” по член 288 од Кривичниот законик.
Имено осомничени се дека предизвикале пожар на градската депонија во Демир Хисар, а при преглед кај нив се пронајдени предмети со кои го предизвикале пожарот.
Според полицијата, по документирање на настанот, против нив ќе следува соодветна пријава.