Европа
Приврзаниците и противниците на независноста на Шкотска речиси изедначени
Девет дена пред референдумот за независност Шкотска (18-ти септември), најновата анкета направена од институтот TNS Scotland објавена во вторникот покажа дека приврзаниците и противниците на отцепувањето на Шкотска од Обединетото Кралство по 307 години, се речиси изедначени со „лесен“ тренд на растот на гласовите за независност.
Девет дена пред референдумот за независност Шкотска (18-ти септември), најновата анкета направена од институтот TNS Scotland објавена во вторникот покажа дека приврзаниците и противниците на отцепувањето на Шкотска од Обединетото Кралство по 307 години, се речиси изедначени со „лесен“ тренд на растот на гласовите за независност.
Приврзаниците за независноста на Шкотска би добиле 38 отсто од гласовите, додека 39 проценти од избирачите би се определиле за останување во унијата на Велика Британија, а 23 отсто од испитаниците се изјасниле дека сé уште немаат одлучено, според истражувањето на јавното мнение што го спровел институтот TNS Scotland, на репрезентативен примерок од 990. Меѓутоа, оние што ќе гласаат „за“ и „против“ се целосно изедначени на 41 отсто гласови меѓу избирачите коишто се изјасниле дека сигурно ќе гласаат на 18-ти септември.
Ова истражување на јавното мнение всушност покажува дека анкетата што институтот YouGov ја направи за весникот The Sunday Times објавена во неделата во којашто приврзаниците на независноста првпат минаа во водство со 51 наспроти 49 отсто, не била аномалија.
Британските медиуми, исто така, истакнуваат дека во анкетата на TNS Scotland од август заговорниците на шкотското останување во рамките на Велика Британија имаа предност од 13 процентни поени.
„Ова испитување на јавното мнение открива значителна промена во намеруваните гласови. Премногу е тесно за предвидувања, но двата табора последните денови од кампањата ќе се обидат да ги убедат неодлучните избирачи во предноста на своите аргументи, изјави директорот на институтот TNS, Том Гостли.
За противниците на независноста кои ја водат кампањата „Better Toether“„ (Подобро заедно), ова е сигнал дека ќе мора да се смета на секој глас.
„Изминатите два дена ќе се сметаат за вистински почеток на референдумот. Гласот на секој од нас би можел да се покаже како клучен и да направи разлика меѓу распадот на Обединетото Кралство и неговото одржување“, изјави директорот на кампањата, Блер Мекдугл.
Водачите на кампањата за независност под назив „Yes Scotland“, пак, изразија задоволство со ова „клучно испитување на јавното мнение кое потврдува дека гласовите ’за’ растат“.
Двете последни истражувањата на јавното мнение прават зголемен притисок врз британскиот премиер Дејвид Камерон кој минатата седмица повтори дека не сака да поднесе оставка доколку на референдумот победат приврзаниците на шкотската независност.
Владата на Велика Британија поради нагорнито тренд на поддршката за независност, се обврза дека на Шкотска ќе и’ пружи поголема автономија, доколку на претстојниот референдум за независност на 18-ти септември се одлучи да остане во 307 години долгата унија со Англија во Обединетото Кралство, откако во неделата беше објавено дека првпат приврзаниците на независноста минале во водство во анкетите, откако претходно постојано растеше овој процент во испитувањата на јавното мнение. Британскиот министер за финансии Џорџ Осборн изјави во неделата дека следните денови ќе бидат претставени плановите за давање поголема автономија на Шкотска во сферата на даноците, трошоците и социјалната грижа, доколку Шкотите на историскиот референдум од 18-ти септември донесат одлука против независноста. /крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Грузија сака да донесе закон за „странски агенти“, oфицијален претставник на ЕУ: Неприфатливо
Висок функционер на Европската унија денеска ја предупреди грузиската влада дека предложениот закон за „странски агенти“ е неприфатлив и ќе претставува пречка во напорите на земјата да се приклучи кон ЕУ, доколку биде усвоен во сегашната форма.
Грузискиот парламент вчера го усвои законот во второто читање, за кој опозицијата вели дека е инспириран од Кремљ, додека полицијата употреби солзавец и шок-бомби за да ги растера толпата демонстранти.
Владата смета дека законот е неопходен за да се гарантира транспарентно странско финансирање на невладините организации.
Секоја вечер, речиси еден месец, се поголем број демонстранти излегуваат на улиците. Вчера десет илјади демонстранти го блокираа центарот на Тбилиси на најголемиот антивладин митинг организиран досега.
Герт Јан Купман, директор на Управата за проширување на Европската комисија, за новинарите во главниот град на Грузија изјави дека Брисел ја следи ситуацијата и е загрижен за тоа што се случува.
„Гледаме загрижувачки случувања кога станува збор за законодавството. Законот за транспарентност, кој беше усвоен во второ читање, е неприфатлив во сегашната форма и ќе создаде сериозни пречки на патот кон пристапување во ЕУ“, рече Купман.
„Но, има уште време. Во септември ќе излеземе со препораки дали да ги започнеме пристапните преговори со Грузија и да објавиме извештај во октомври и ноември, така што има уште време. Но, сега топката кај владата“, додаде тој.
Грузискиот парламент се очекува да го разгледа законот во третото читање за околу две недели.
Европа
Русија: Не ја гледаме поентата на мировната конференција во Швајцарија
Русија објави дека не ја гледа поентата на конференцијата за прекин на огнот во Украина што Швајцарија ја планира за средината на јуни и на која Москва не беше поканета. Швајцарската влада соопшти дека Русија „во овој момент“ не е меѓу десетиците поканети земји, додавајќи дека е отворена за нејзино учество, но дека Москва не е заинтересирана. Берн го најави собирот во јануари, велејќи дека го организирал на барање на украинскиот претседател Володимир Зеленски.
Портпаролот на Кремљ, Дмитриј Песков, нагласи дека Москва не ја смета за веродостојна иницијатива.
„Не разбираме каква пресвртница би била таа мировна конференција“, им рече тој на новинарите. „За каква конференција зборуваме, за каква сериозна конференција со сериозни очекувања дека ќе има некакви резултати, без учество на Русија?
„Тоа е целосно невозможно и јасно е дека тоа е некаква иницијатива која не е фокусирана на резултати“, заклучи тој.
Швајцарската влада соопшти дека „мировниот процес не е можен без Русија. Украина, од друга страна, ги доведува во прашање придобивките од руското учество на состанокот што ќе се одржи во близина на градот Луцерн.
„Знаеме дека нема смисла да ја имаме Русија на маса ако не можете да се осигурате дека таа ќе дејствува со добра волја“, рече шефот на украинската дипломатија Дмитро Кулеба минатата недела во интервју за магазинот „Форин полиси“.
Кулеба смета дека создавањето дополнителен притисок врз Русија на бојното поле и обединувањето на земјите „кои ги делат принципите“ ќе помогнат Русија да биде подготвена да учествува во дијалогот.
Европа
Макрон не ја исклучува можноста за испраќање војници во Украина доколку Русија „ја пробие линијата на фронтот“
Францускиот претседател Емануел Макрон во интервју за Економист изјави дека не ја исклучува можноста за испраќање војници во Украина доколку Русија „ја пробие линијата на фронтот“ и ако Киев тоа го побара од Париз, пренесува BFMTV.
„Доколку Русите ги пробија првите линии на фронтот и ако има украинско барање – што не е случај денес – би било легитимно да се постави тоа прашање“, рече Макрон.
Веќе во февруари, Макрон ја покрена можноста за испраќање западни трупи на украинска територија, потсетува БФМ.
„Како што кажав, не исклучувам ништо бидејќи има некој од другата страна кој не исклучува ништо. Без сомнение, бевме премногу сомнителни кога ги дефиниравме границите на нашата акција”, рече францускиот претседател.
Макрон рече дека „априори отфрлањето“ на можноста за испраќање војници би значело дека „не се научени лекциите од последните две години“, бидејќи во летото 2022 година биле против испраќање тенкови, ракети со долг дострел и авиони. и сега сето ова го испорачуваат во Украина.
„Имам јасна стратешка задача: Русија не смее да победи во Украина. Ако Русија победи во Украина, нема да има безбедност во Европа“, додаде тој.
„Кој може да тврди дека Русија ќе застане таму? Каква безбедност има за другите соседни земји, Молдавија, Романија, Полска, Литванија и толку многу други? И тогаш, каков кредибилитет има за Европејците кои би потрошиле милијарди, велејќи дека тоа е опстанокот на континентот и не би обезбедиле средства за запирање на Русија. Така да, не треба ништо да исклучуваме“, истакна Макрон.