Свет
Во Индија расте бројот на деца починати од воспаление на мозокот

Уште шест деца починаа во индиската држава Бихар од воспаление на мозокот (енцефалитис), па бројот на починати од оваа болест во детска возраст достигна 112 овој месец, објави индиската влада во здравствен билтен.
Владата вели дека уште 170 деца се лекуваат во болниците во градот Мусафарпур. Повеќе од 500 случаи на енцефалитис се пријавени од почетокот на јуни.
Децата се особено подложни на оваа болест, која може да предизвика оток на мозокот, треска и повраќање.
Илјадници Индијци страдаат од енцефалитис, маларија, тифоид и други болести пренесени од комарци секоја година во текот на летната сезона на монсуните.
Медицинските експерти велат дека индиските власти сè уште не се подготвени за овие годишни циклуси на болести што доведуваат и до смртни исходи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Макрон: Европските воени сили треба да учествуваат во мировните операции во Украина

Францускиот претседател Емануел Макрон им рече на новинарите во Вашингтон дека европските воени сили треба да учествуваат во мировните операции во Украина во иднина.
„Ќе ни треба силна украинска армија и ќе мора да ѝ помогнеме на Украина со сили на терен“, рече Макрон. „Ќе ни требаат мировни операции што сојузниците на Украина се подготвени да ги обезбедат“.
Не е прв пат Макрон да ја изнесе идејата, но досега тоа не доведе до никакви конкретни распоредувања.
Макрон додаде дека Трамп би бил „подготвен“ да воведе секундарни санкции и царини врз Москва „доколку Русија не соработува“. Тој исто така потсети дека Трамп веќе вовел царини врз Индија за купување руска енергија.
Францускиот претседател нагласи дека не е убеден дека Русија сака мир, додавајќи дека европските лидери „му ставиле до знаење на Трамп“ дека мировниот договор не може да чека недели или месеци.
фото: принтскрин
Свет
Британскиот премиер: Постигнавме вистински напредок

Британскиот премиер Кир Стармер зборуваше по состанокот во Белата куќа, каде што Доналд Трамп и Володимир Зеленски присуствуваа и европски лидери.
Тој рече дека на состанокот е постигнато „чувство на единство“ и дека се постигнати два клучни заклучоци.
Првиот е дека „коалицијата на волните“ – група од 31 земја што ветија дека ќе помогнат во зајакнувањето на Украина – ќе соработува со Соединетите Американски Држави за безбедносни гаранции. Стармер додаде дека веќе им дал задача на своите тимови да работат на ова прашање, нагласувајќи дека тоа е важна тема за безбедноста на Украина, Европа и Обединетото Кралство.
Вториот е договорот за состанок меѓу Владимир Путин и Зеленски, кој треба да се одржи билатерално, а потоа трилатерално, со учество на Доналд Трамп.
„Кога станува збор за прашања како територија, размена на затвореници или многу сериозното прашање за враќање на деца, јасно е дека Украина мора да биде на масата“, рече Стармер, заклучувајќи: „Денес постигнавме вистински напредок“.
фото: принтскрин
Свет
Шефот на НАТО: Испраќањето војници во Украина не е дискутирано

Генералниот секретар на НАТО, Марк Руте, изјави дека за време на разговорите во Белата куќа, воопшто немало дискусија за испраќање војници на украинска територија.
Во изјава за „Фокс њуз“, тој рече дека деталите за безбедносните гаранции на САД ќе бидат разработени во наредните денови, но сè уште не е јасно каква форма ќе имаат.
„Важно е што САД ќе се вклучат, тоа е голем чекор напред“, рече Руте без понатамошно појаснување.
фото: принтскрин