Европа
Во Дрезден рекордни 18 илјади противници на исламизацијата
На протестите против изламизацијата на германското општество, коишто традиционално се одржуваат во понеделник навечер во источногерманскиот град Дрезден, денеска се собрале 18 илјади луѓе според податоците на полицијата, што претставува рекорден број откако започнаа ваквите собори, додека повеќе од 30 илјади луѓе учествувале во анти-исламските демонстрации во понеделникот навечер во поголемите градови на Германија, пренесуваат медиумите.
Движењето Родољубиви Европејци против исламизацијата на Западот (Pegida), коешто се залага за построги закони за имиграцијата и за барателите на азил, во октомври ги започна протестите во Дрезден, а на претходниот одржан само три дена пред католички Божик, се собраа дотогаш најголемиот број демонстранти – 17 илјади. Во Дрезден во понеделникот без струја останал локалниот погон на автомобилскиот концерн „Volkswagen“ кој се залага за „отворено, слободно и демократско општество“.
Паралелно во германските градови се одржуваат и демонстрации на противниците на антиисламските протест. Агенцијата AFP пренесува дека во другите делови од Германија соодносот бил обратен. Во Рошток, исто така во источна Германија, противниците на движењето чија бројност не се наведува, извикувале „Добродојдовте на Запад“
Според Associated Press, во германската престолнина Берлин овојпат имало околу 5.000 луѓе кои се противат на нетрпеливоста кон имигрантите. Уште 22 илјади противници на движењето Pegida излегле на улиците на Штутгарт, Хамбург и Минстер.
Во Келн имало неколку илјади противници на Pegida, и само неколку стотици негови поддржувачи, според AFP. Покрај тоа, во знак на протест противниците на активностите на антиисламското движење ги исклучиле осветлувањата на познатата Келнска катедрала и други знаменитости на градот.
Во секој случај подемот на движењето Pegida силно ја потресе германската политичка сцена, и ја наведе канцеларката Ангела Меркел во своето новогодишно обраќање да ги нарече „расисти полни со омраза“ водачите на движењето во Дрезден.
Анкетата што на Нова година ја објави списанието Stern покажа дека 13 отсто од испитаниците би учествувале на протестите на Pegida доколку бидат организирани во нивното место на живеење, додека 29 отсто веруваат дека тие протести се оправдани поради влијанието на исламот врз животот во Германија.
Бројот на оние коишто во Германија бараат азил, повеќето од Блискиот исток, се зголемил за повеќе од двојно во 2014 година и изнесува околу 200 илјади, четири пати повеќе отколку во 22012 година, а нето имиграција во таа земја е на највисокото ниво во последните две децении. Многу Германци се загрижени околу трошоците за имигрантите, дека имигрантите им ги земаат работните места, па оттаму и се јави граѓанското движење кое протестира против имиграцијата, особено од Блискиот исток, предупредувајќи на „исламизација на земјата“./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Полските земјоделци повеќе нема да ја блокираат границата со Украина
Полските фармери го откажаа протестот на последниот блокиран граничен премин со Украина, објавија Киев и Варшава, ставајќи крај на повеќемесечната криза која ги наруши билатералните односи меѓу двете земји.
Украинскиот министер за земјоделство ја поздрави „конструктивната работа“ на Полска за укинување на блокадата, наведувајќи во соопштението дека преговорите со Варшава и индустриските здруженија не биле лесни, но „главната работа е што резултатот е постигнат“.
„За среќа, сите правци на границата со Полска се деблокирани“, изјави портпаролот на украинската гранична полиција Андриј Демченко, додавајќи дека полските фармери го ослободиле пристапот до преминот Рава-Руска.
Камиони утринава почнаа да ја минуваат границата во двата правци, рече тој.
Портпаролот на полската гранична полиција Анджеј Јузвијак изјави за Ројтерс дека Украина може да се премине „непречено“ на сите премини.
Полските земјоделци и камионџии ги блокираа граничните премини со Украина од крајот на есента минатата година во знак на протест против нелојалната конкуренција.
Како главна причина тие ја наведоа пасивноста на владата кон губење на работни места поради странските конкуренти од почетокот на војната во Украина, бидејќи камионџиите од Украина беа ослободени од обврската да имаат дозвола за преминување на полската граница.
Европа
Шпанскиот премиер останува на функцијата, нема да поднесе оставка
Шпанскиот премиер Педро Санчез денеска одлучи да остане на функцијата што ја извршува од летото 2018 година, иако претходно овој месец судија во Мадрид отвори истрага против неговата сопруга за можна корупција.
„Решив да продолжам, со уште посилна сила на чело на владата“, рече Санчез во говорот од владината зграда.
Санчез, лидер на шпанската социјалистичка работничка партија (ПСОЕ), во средата ги суспендираше сите должности за да „размисли“ пет дена дали вреди да остане на функцијата поради „лажни обвинувања“ и „напади врз неговата сопруга“.
Европа
Путин ги откажа парадите на 9 мај: „Стравот од украински напад е посилен од традицијата“
Рускиот претседател Владимир Путин беше принуден да ја откаже годишната руска триумфална парада на Денот на победата на 9 мај поради страв од напади со беспилотни летала со украински камикази, пишува „Сан“, додека руските медиуми јавуваат дека маршот на Бесмртниот полк и другите настани планирани за тој ден се намалени на многу поскромно ниво „од безбедносни причини“.
Путин наводно ги откажал повеќето од прославите на 9 мај – најсветиот ден во рускиот календар – затоа што не можел да ја гарантира безбедноста на своите граѓани.
Патриотски воени паради се одржуваат низ Русија како начин на славење на победата над нацистичка Германија во Втората светска војна.
Вообичаено, овие настани се користат за Путин да ја покаже моќта на руската воена машина и да генерира национална гордост – водејќи огромна парада на Црвениот плоштад во Москва.
Овој дел ќе се одржи под зголемено обезбедување – под надзор на Путин – но многу од воените паради во регионот се откажани заедно со придружниот огномет.
Областите на Белгород, Брјанск, Псков, Рјазан, Курск и Саратов ги откажаа своите настани, иако не се сите блиску до Украина.
Денот на победата беше откажан и во окупираните региони на Украина, вклучувајќи ги Запорожје и Севастопол на Крим, исто така поради „безбедносни причини“.
Пред руската инвазија на Украина, денот вклучуваше тенкови, нуклеарни проектили и друго масивно оружје што минуваше низ главниот град додека авионите летаа на небото.
Низ Русија, стотици маршеви на Бесмртниот полк – каде луѓето носат фотографии од нивните воени ветерани – исто така се откажани поради безбедносни причини.
Еден од стравувањата е дека овие настани би можеле да бидат преземени од антивоени демонстранти.
Огнометот беше откажан во некои други региони, како што е Сиктивкар, а откажани се концерти во Воронеж.
Во Ростов и Воронеж некои паради се откажани, додека други може да се одржат без публика.
Се очекуваат повеќе откажувања.
Минатата година, Денот на победата беше откажан ширум Русија со намален настан во Москва, каде речиси и да немаше изложена тешка воена опрема.
По две години војна во Украина, кружеа гласини дека парадите се откажани поради недостиг на тенкови за учество на парадите.
Дури и тогаш, локалните гувернери наведоа „безбедносни причини“.