Европа
Украинските мировни преговори во Минск засега без исход
Мировните преговори меѓу претставниците на украинската влада и рускојазичните бунтовници од југоистокот на земјата завршија во средата доцна ноќта во белоруската престолнина Минск, по пет и пол часови преговори, но засега не е објавено дека е постигнат каков и да е напредок, пренесуваат руските медиуми.
Учесниците на преговорите, на коишто зад затворени врати се разговараше за иднината на сепаратистичките региони во источна Украина населени со доминантно руско и рускојазично население кои не ја признаваат прозападната власт во Киев, по состанокот не даваа изјави за медиумите. Се очекува дека преговорите ќе продолжат во петок, но според соопштението на министерството за надворешни работи на Белорусија, која е домаќин по вторпат на преговорите, тоа се’ уште не е сигурно.
Преговорите за решавањето на судирот во кој од април 2014 година загинале повеќе од 4.700 луѓе, според Обединетите нации, се одржуваа во поранешната резиденција на белорускиот претседател Алекандр Лукашенко во центарот на Минск. Темите на разговорите беа осигурување на стабилен и одржлив прекин на огнот во источна Украина, повлекување на артилеријата, продолжување на процесот на размена на заробениците според модусот „сите за сите“ и овозможување испорака на хуманитарна помош.
Во преговорите како медијатори учествуваа од украинска страна поранешниот претседател Леонид Кучма, од руска амбасадорот во Киев Михаил Зурабов, и претставничката на Организацијата за безбедност и соработка во Европа (ОБСЕ), Хајди Таљивиани, и претставници на самопрогласените ткн Народни републики во Донецк и Луганск.
„Официјалниот претставник на републиката (Денис Пушилин) ме информираше за текот на средбата во Минск“, изјавил претседателот на Донецк, Александр Захарченко за Донецката новинска агенција. Според него, преговорите биле тешки и детали нема да бидат обелоденети, бидејќи „претстои втор круг“.
„Денеска не треба да се очекуваат резултати од преговорите. Денеска почнавме со работата, а конкретните резултати може да се очекуваат во петок навечер“, изјави пред почетокот на преговорите Валериј Чали, дипломатскиот советник на украинскиот претседател Петро Порошенко.
На преговорите, исто така, во Минск од 5-ти септември коишто следеа по телефонскиот разговор меѓу рускиот и украинскиот челник, Владимир Путин односно Петро Порошенко, беше постигнат договор за прекин на огнот и формирање на тампон зона меѓу завојуваните страни во длабина од 30 километри од линијата на раздвојување. Примирјето во повеќе наврати беше прекршувано од двете страни, но според општи оцени насилството во декември било значително намалено./крај/мф/сн
Извор: EPA – Учесниците на преговорите во Минск, Леонид Кучма (л) и Михаил Зурабов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Во Киев се урива споменик кој ја слави блискоста меѓу Русија и Украина
Властите на Киев во вторникот почнаа да го отстрануваат споменикот од советската ера што ја означува врската меѓу Русија и Украина, повеќе од две години откако Москва започна инвазија врз Украина.
Неколку дена ќе бидат потребни за целосно уривање на споменикот од црвен гранит, кој се состои од дваесетина поединечни елементи, соопшти градската управа.
Тоа е всушност група статуи кои прикажуваат украински Козаци кои го опкружуваат лидерот Богдан Хмелницки и московскиот амбасадор.
Статуите ќе бидат префрлени во воздухопловниот музеј.
Споменикот е изграден во 1982 година за да го одбележи „обединувањето на украинскиот народ со братскиот руски народ“ во 1654 година, кога Хмелницки склучил сојуз со рускиот император во борбата против полско-литванскиот сојуз.
Советските историски книги го романтизираа како почеток на нераскинливо пријателство меѓу Украина и Русија.
Европа
Белоруските спортисти одат на Олимписките игри, Лукашенко: Победете ги противниците
Белорускиот претседател Александар Лукашенко денеска им порача на белоруските спортисти кои учествуваат на Олимписките игри во Париз под неутрален статус „да ги победат своите противници“.
„Ако сте избрале и одите таму под неутрален статус, истепајте ги, покажете им дека сте вистински Белоруси“, рече Лукашенко во соопштението за печатот на претседателството.
За време на посетата на регионот Могилев во Белорусија, жителите го прашале Александар Лукашенко што мисли за ова учество под неутрален статус, се вели во извештајот објавен на веб-страницата на белоруското претседателство.
„Спортистот треба да избере. Доколку одлучи да учествува на Олимписките игри, ќе биде уште пожесток. Затоа што разбирате дека состојбата на умот и гневот не се од мала важност во спортот“, реагира Лукашенко. „Вие сте Белорусија и кога ќе излезете како победници, тоа е добар начин политички да ги удрите во лице“.
Лукашенко, кој е на власт од 1994 година, ги искорени сите форми на опозиција во неговата земја, потиснувајќи мирно масовно движење во 2020 година. Тој е навикнат и на широки изјави и испади, како на пример кога парадираше со калашников во раката пред демонстрантите кои се противат на неговото владеење, нарекувајќи ги „стаорци“. Во февруари 2022 година, тој ја отвори Белорусија за руската армија за да може да ја нападне Украина од север.
Белорусија беше исклучена како земја од Игрите поради нејзината поддршка за руската инвазија на Украина, а нејзините спортисти се натпреваруваат под неутрален статус, без химна, знаме или национални обележја.
Европа
(Видео) Полицијата го бркаше убиецот со меч низ Лондон, објавена е снимка
Би-би-си објави снимка на која се гледа лондонската полиција која го брка напаѓачот со нож, кој денеска уби 13-годишно момче и повреди неколку други.
На снимката се слушаат полицајците како им викаат на граѓаните: „Заклучете ги вратите“.
Полицијата смета дека не се работи за терористички напад.
Полицајците уапсија маж вооружен со меч по извештаите за сериозен инцидент со прободување во североисточен Лондон.
Со електрошокер бил совладан 36-годишниот маж кој мавтал со меч.
„Со голема тага можам да потврдам дека 13-годишното момче кое беше избодено, почина во болница набргу откако му биле нанесени убодите“, изјави началникот на лондонската полиција Стјуарт Бел.
Уште две лица и двајца полицајци се во болница поради убодни рани и се надвор од животна опасност.
„Не мислиме дека постои закана за пошироката заедница, полицијата не бара други осомничени и се чини дека овој инцидент не е поврзан со тероризам“, рече Бел.