Јавен обвинител од скопското Обвинителство поднесе обвинение против едно лице за неовластено производство и пуштање во промет наркотични дроги.

Кај обвинетиот полицијата на 3 јули, при вршење контрола и личен претрес во возило во кое биле повеќе лица, пронашла едно полиетиленска пакување со супстанција амфетамин во вкупна нето-маса од 41,59 грам. Кога возилото било запрено, осомничениот, кој седел зад совозачкото место и се превезувал како сопатник, се обидел да ја истури супстанцијата, но во тоа не успеал.

При преземање натамошни истражни дејства извршен е претрес во станот во Скопје во кој привремено престојувал осомничениот, 20-годишен жител на Пробиштип. Притоа пронајдени се 39 таблети метилен-диоксиметамфетамин, дигитална вага со остатоци од наркотична дрога марихуана и прашета материја, која претставува психотропна супстанција – амфетамин. Со тоа обвинетиот го сторил кривичното дело што му се става на товар.

Со поднесување на обвинението јавниот обвинител до надлежниот Основен кривичен суд – Скопје достави и предлог за продолжување на определената мерка притвор за обвинетиот бидејќи ценеше дека постојат оправдан страв од бегство на обвинетото лице и дека лицето ќе го повтори кривичното дело.