Според преговарачките позиции на Брисел околу „косовското поглавје“, односно поглавјето 35 кое Србија го отвори во понеделникот, од земјата не се бара признавање на независноста на Косово, ниту пак правнообрзувачки договор за нормализација на односите со Приштина, коментираат српските медиуми.

Најголемата „замка“ на платформата на ЕУ за ова поглавје е можноста за „замрзнување“ на отворањето на нови или пак затворањето на веќе завршените поглавја, доколку напредокот во нормализацијата на односите меѓу Србија и Косово заостанува зад напредокот во другите области. Поглавјето 35 не е замена за дијалогот меѓу Белград и Приштина, а се однесува на нормализацијата на односите меѓу Србија и Косово.

Србија мора да ги исполни договорите кои ги постигнала со Приштина на 25-ти август годинава, како и оние од април 2013-та година, а кои се однесуваат на полицијата, правосудството и цивилната заштита, а Брисел, пак, двапати годишни ќе разгледува до каде е напредокот на Србија во ова поглавје.

Бенчмарковите во однос на ова поглавје, пак, можат да бидат прилагодувани или ажурирани во текот на преговорите. Доколку напредокот во нормализацијата на односите со Косово значајно заостанува зад напредокот во останатите преговорите и Србија не ги примени постигнатите договори со Косово, Европската комисија (ЕК) на сопствена иницијатива или барање на третина од земјите членки на ЕУ, во согласност со точката 25 од преговарачката рамка, ќе предложи „замрзнување“ на отворањето нови поглавја.

Преговарачите позиции на Брисел исто така предвидуваат Србија да престане со поддршката и финансирањето на српските структури на Косово, а општинската администрација ќе мора целосно да се усогласи со косовските закони. Поглавјето 35 исто така наложува целосна примена на косовскиот правен систем на северот. Исто така се бара и воспоставување на Заедницата на српски општини (ЗСО), во согласност со косовските закони и договорите од август од оваа година, како и транспарентност во финансирањето на ЗСО./крај/мф/бс

Извор: Макфакс