Вкупно 135.5 килограми марихуана и пет килограми хашиш заплени полицијата во понеделник во близина на граничниот премин Богородица и уапси тројца македонски државјани. Со акцијата е пресечен меѓународен канал за шверц на дрога од Албанија преку Македонија во Грција, информираше во вторник министерката за внатрешни работи, Гордана Јанкулоска.

Вчера, во 3,15 часот, по претходно поставена заседа од страна на полициски службеници, во зелениот појас на граничната линија со Грција, во близина на ГП Богородица уапсени се Ѓ.П. (47) и Г.Г. (49), двајцата од село Стојаково, Гевгелија, а кај нив биле пронајдени пет патни торби во кои имало 136 пакувања со марихуана и две пакувања со хашиш, односно 135.5 килограми марихуана и пет килограми хашиш.

Јанкулоска информираше дека запленетата дрога потекнува од Албанија и истата преку Македонија требало да биде пренесена во Грција од каде што би се транспортирала во земјите од западна Европа каде би достигнала вредност од околу 500.000 евра.

При апсењето, уште пет други лица избегале и по нив полицијата се уште трага.

По пребарување на поширокиот реон на местото на настанот од страна на полициската патрола пронајдено е едно патничко моторно возило со бугарски регистарски таблички кое било користено за транспорт на дрогата од страна на лицата кои се лишени од слобода. По извршени проверки е утврдено дека таблиците се од друго возило, додека пронајденото возило е во сопственост на лицето Ф.Д. (40) од село Калишта, Струга кој исто така е уапсен.

Против тројцата уапсени полицијата поднесе кривична пријава за сторено кривично дело „неовластено производство и пуштање во промет на наркотични дроги, психотропни супстанци и прекурсори”, за што од страна на судија им е одредена мерка притвор во траење од по 30 дена.крај/мф/сд