Црна хроника
Повеќе загинати во автобуска несреќа во Црна Гора

Според различни извори меѓу 8 и 20 патници ги загубиле животите во автобуската несреќа којашто се случи во неделата по 17 часот на црногорскиот магистрален пат Подгорица – Колашин, според неофицијални информации со кои располагаат локалните медиуми.
Станува збор за автобус со романски регистарски таблички со кој патувале 52 туристи. Покрај загинатите, од околу 30 повредени 24 се здобиле со тешки повреди опасни по животот. Се стравува дека бројката загинати е 20.
Првичната информација беше дека станува збор за украински туристички автобус. Од Клиничкиот центар во Подгорица изјавиле дека кај нив се довезени 17 повредени од кои едно е дете.
Портпаролката на Управата на полицијата, Тамара Поповиќ, изјавила за подгоричка Побједа дека несреќата се случила кога од досега непознати причини, автобусот кој околу 15 часот влегол во Црна Гора, доаѓал од правецот на Колашин излегол од тунелот слетал од мостот Грло, кај манастирот Морача, ја пробил заштитната ограда и паднал во провалијата на 30 до 40 метри од патот.
На местото на несреќата биле испратени сите медицински екипи со кои располага подгоричкиот клинички центар, а полицијата направала коридор до црногорската престолнина за пренесување на настраданите. Покрај со амбулантни возила, повредените се пренесувани и со приватни возила.
Исто така, на местото на несреќата се упатени и полициски специјалци, пожарникари, планинари и припадници на службата за спасување. На местото од несреќата пристигнал и црногорскиот министер за внатрешни работи Рашко Коњевиќ./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Црна хроника
Приведен 19-годишник во Тетово оти предизвикал пожар

Тетовската полиција го приведе 19-годишниот С.М. од Скопје, со привремено место на живеење во Тетово, кој бил затекнат додека палел кабли.
Со тоа, како што велат од МВР, предизвикал пожар кај железничкиот надвозник на улицата Маршал Тито во Тетово.
Со интервенција од Тетовската противпожарна единица, пожарот бил изгаснат, а С.М. е задржан во полициска станица и по документирање на случајот против него ќе биде изготвен соодветен поднесок.
Црна хроника
Тешко повреден возач на тротинет во судир со автомобил

Вчера вечер во 22:30 часот во СВР Скопје е пријавено дека на бул.„Словенија“ во Скопје се случила сообраќајна несреќа помеѓу патничко возило „фолксваген пасат“ со скопски регистарски ознаки, управувано од Н.Д.(28) од с.Гумалево, скопско и електричен тротинет „шаоми“, управуван од К.М.(59) од Скопје.
Во несреќата со тешки телесни повреди се здобил возачот на тротинетот, констатирани во Градска општа болница „Св.Наум Охридски“.
Извршен е увид од увидна екипа од СВР Скопје.
Црна хроника
Уапсен вработен во Здравствениот дом – Берово, кај него пронајдена дрога

Вчера околу 22 часот на улицата „Браќа Миладинови” во Виница од страна на полициски службеници од ПС Виница во координација со ПС Берово од слобода е лишен 29-годишниот Б.Р. од Берово затоа што при преглед кај него е пронајдена марихуана и ризла.
Имено, по претходно добиени оперативни сознанија, полициските службеници сопреле возило „дачија сандеро“ со беровски регистарски ознаки, сопственост на ЈЗУ „Здравствен дом“- Берово, а управувано од Б.Р. и при преглед кај него е пронајдена дрогата, по што е известен јавен обвинител од ОЈО Кочани, кој дал насоки тој да биде лишен од слобода.
По документирање на случајот, против Б.Р. ќе биде поднесена соодветна пријава.