Култура
Голем интерес за македонските документарни филмови на „Македокс“
Премиерите на македонските документарни филмови на „Македокс“ направија програмски бум на годинашното фестивалско издание, со што се потврди дека се вистинска магија што привлекува многубројна публика.
Најавувајќи го 10. издание, „Македокс“ објави десет нови македонски документарни филма што се дел од фестивалската програма. По премиерата на „Тетовски самрак“ на Билјана Гарванлиева и Мануел Цимер, чија проекција помина со многу емотивни рекции кај публиката, на платото пред Куршумли ан веќе се одржа и премиерата на документарниот филм „Господата од современа“ на Ана Алексовска.
Филмот беше прикажан на 23 август во селекцијата на кратки филмови и открива дел од животната приказна на протагонистката Сунчица, која во група со 12-ина други истомисленици секојдневно посетува културни настани во градот.
Филмот носи убава порака и направен е со цел да се промени перцепцијата на пошироката јавност кон овие луѓе, кои место да ги фаќа депресија седејќи дома, одат од еден до друг културен настан во градот. По проекцијата, режисерката Алексовска доби бурен и долготраен аплауз од публиката, која во голем број беше присутна на платото пред Куршумли ан.
Во програмата за млади, која се одвива во МКЦ, премиерно се прикажани 3 од четирите филма на докуникулците на „Македокс“. На 23 август премиерно беше прикажан есеистичко-поетскиот филм „Низ објективот на копнежот“ на Розе Симоновска. На 24 август публиката на „Македокс“ го проследи „Скопска ситуација ’18“ во режија на Анастасија Павловска, филм што произлезе од една рап-песна, а зборува за проблемите на младите генерации. Третата премиера се случи на 25 август кога беше прикажан „Палец горе“ на Марија Матеска, филм за страста и возбудата што ги носи патувањето автостоп.
Во комплетниот процес од идеја, снимање, монтажа и продукција на фиомовите се вклучени млади луѓе од првите две генерации докуникулци на „Македокс“, а остана да ја видиме уште премиерата на „Лог аут“ на младата режисерка Рамона (Моња) Кочишка, која ќе се одржи на 27 август, во 18 часот, во МКЦ.
Премиера на филм од македонски автор има и во рамките на Студентската програма на 26 август, во терминот од 22.40 часот. Станува збор за филмот „Спасение“ (Италија, Велика Британија/ 2017/24 мин.) на режисерот Никола Ивановски, кој на Сицилија снимил приказна за миграцијата како печалбарски избор наспроти миграцијата како последен очаен обид за спас.
Студентската програма на „Македокс“ се одржува веќе четири години. Досега се прикажани повеќе од 50 филма, а гостувале 40-ина студенти од разни земји. На јубилејното издание на „Македокс“ првпат, благодарение на Current Time TV, ќе биде доделена парична награда во износ од 2.000 евра за најдобриот студентски филм.
Во програмата со македонски документарни филмови на 26 август, во рамките на форумот MakeCoProDox, ќе има проекција на „Манаки – Приказна во слики“ на Роберт Јанкулоски, а на 27 август публиката ќе може да го види и „По патот на клавето“ на Лидија Мојсовски. Секако, десеттото издание на „Македокс“ ќе биде затворено со премиерата на годинава најуспешниот македонски документарен филм „Медена земја“ на Тамара Котевска и Љубомир Стефанов на 28 август. Филмот ќе има проекции во Куршумли ан и во киното „Фросина“ во МКЦ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Денес е Ден на македонскиот јазик
Петти мај е прогласен за „Ден на македонскиот јазик“. На овој ден во 1945 година, со решение на Народната влада на Федерална Македонија е усвоена азбуката на македонскиот јазик врз принципот еден глас – една буква, а набргу потоа, на 7 јуни 1945, е усвоен и Правописот на македонскиот јазик.
Кодификацијата на современиот македонски стандарден јазик се заокружува со делата на Блаже Конески – Граматиката на македонскиот литературен јазик, Речникот на македонскиот јазик и Историјата на македонскиот јазик.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.