Славниот француски актер Жерар Депардје, кој ја напушти татковината откако социјалистичката влада на претседателот Франсоа Оланд наметна зголемени даноци за богатите компании и поединци, повеќепати во минатото изјави дека повеќе не се смета за Французин, а во разговорот за италијанскиот дневен весник Corriere della Sera вели дека оваа земја се претворила во „Дизниленд за странци“.

Разговорот воден по повод излегувањето во Италија на неговата нова книга под наслов „Innocent“, Жерар Депардје „тешкото дете“ на француската кинематографија го започнува со фалење и набројување голем број доблести коишто ги поседува рускиот претседател Владимир Путин, кој во 2013 година му го одобри барањето за руско државјанство.

На новинарското прашање дали сé уште се чувствува како Французин, актерот одговара „Не, јас сум државјанин на светот. Франција е во опасност да стане обичен Дизниленд за странците, земја населена со имбецили кои прават вино и смрдливо сирење за туристите. Таму повеќе нема слобода, се манипулира со луѓето“.

Депардје нема убави зборови ниту за кинематографијата, ниту за светот на филмот. „Филмот и филмскиот свет повеќе не постојат. Денес можеме да говориме за светот на трошењето време и луѓето коишто ги малтретираат Американците и коишто повеќе ниту самите знаат со кој јазик зборуваат. Има десет филмски ѕвезди и сите се американски. Нивните филмови пренатрупани со специјални ефекти се обично играње, а остатокот од филмскиот свет тешко егзистира“, смета актерот.

Сепак, за Италија нема навредливи коментари и критики, „Вие во Италија, за среќа, не ја загубивте својата култура и идентитетот …, бидејќи сте млада земја, родена со Гарибалди, за разлика од половината Европа која, стравувајќи од мигрантите, стана малку и фашистички настроена“, смета Депардје./крај/мф/сн

Извор: AFP