Црна хроника
Трагите од „опелот“ 99,9 отсто се совпаѓаат со ДНК профилот на Алил Демири
Траги од земјата од местото на убиството биле пронајдени на автомобилот „опел омега“, а биолошките траги што биле пронајдени во автомобилот 99,9 отсто му припаѓаат на првообвинетиот за петкратното убиство кај Смилковското езеро, Алил Демири, потврдија вештаците.
Во судот во петокот беа презентирани вештачења на траги од земај од местото на убиството и земјата пронајдена на автомобилот „опел омега“, со којшто, според обвинението, дел од обвинетите избегале од местото на убиството.
Беше презентирано и вештачење на траги од биолошко потекло, ДНК пронајдена во овој автомобил, како и вештачење на оружјето со коешто било пукано.
Земјата од калниците на „опел омега“-та се совпаѓала со земјата од местото на убиството каде што се наоѓало едно од телата на убиените. Земјата на тркалата на автомобилот, не се совпаѓала со земјата од местото на настанот, бидејќи при возењето, составот на земјата се изменил.
Примерок на земјата од месноста Вражји вир, местото каде што беше најден опелот – не бил земен за вештачење.
На задното седиште на автомобилот биле пронајдени траги од пот и епителни клетки кои се совпаѓале со ДНК профилот на провообвинетиот Алил Демири.
Форензичарот Роберт Јаневски тврди дека 99,9 отсто му припаѓаат на Демири. Неговиот ДНК профил веќе бил во крим евиденцијата од 2009 година, откако бил уапсен за нелегално поседување оружје. ДНК профилот им го доставиле колегите од СВР Куманово.
При увидот биле земени траги од 50 до 60 локации на „опелот“, но само четири биле погодни за испитување.
Според балистичарот Неџад Муриќ, во жртвите било пукано со автоматски пушки и со пиштол ткн „долга деветка“. На местото на убиството биле подигнати 13 чаури од пушка и осум чаури од пиштол. Но проектилите кои биле најдени во телата на жртвите не биле вештачени.
Според обвинението, Агим Исмаиловиќ ја зел „опел омега“-та од паркинг во Топаанско Поле, додека обвинетите Алил Демири и Африм Исмаиловиќ, по убиството, со истиот автомобил дошле на обиколницата кај Качанички пат каде ги чекал обвинетиот Хаки Азири, го оставиле „опелот“ и се качиле во автомобилот на Азири.
Адвокатот на дел од обвинетите, Насер Рауфи ги негираше сите овие факти. Судењето го следеа и роднини на жртвите и роднини на обвинетите.
Судскиот процес за грозоморното убиство коешто ја потресе цела земја почна на 20-ти декември минатата година, а на обвинителната клупа седнаа Агим Исмаиловиќ, Фејзи Азири, Рами Сејди и Хаки Азири. Судењето се снима визуелно и тонски со две камери. На другите двајца обвинети, Алил Демири и Африм Исмаиловиќ кои се во бегство,им се суди во отсуство.
Во убиството коешто се случи на 12-ти април без причина беа убиени матурантите Кире Тричковски, Филип Славковски, Цветанчо Ацковски, Александар Наќевски и рибарот Борче Стефковски./крај/мф/фф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Маж насилно изваден од својот дом и со убодни рани оставен кај Транспортниот центар во Скопје
Вчера во 07.40 часот во Полициската станица Аеродром, 34-годишниот К.Б. од Скопје пријавил дека на 24/25.04.2024 околу 01.30 часот, А.„Н“ со употреба на сила го извадил од неговиот дом и го внел во патничко возило кое го управувал К.„Н“, со уште едно лице совозач, извести МВР.
„Како што е пријавено, во возилото А.„Н“ му нанел неколку убодни рани со остар предмет и го однеле кај Транспортен центар во Скопје, каде што повторно му нанел повреда со остар предмет, по што физички го нападнале и го оставиле. Исто така, според пријавеното, тој не бил на преглед и не пријавил во полициска станица затоа што лицата му се заканиле“, соопшти МВР.
Се преземаат мерки за расчистување на случајот.
Црна хроника
Кривична против двајца штипјани, истепале полицаец
СВР Штип поднесе кривична пријава против 53-годишниот Д.Д. и 54-годишниот П.Д., двајцата од Штип, поради постоење основи на сомнение за сторено кривично дело „напад на службено лице при вршење работи на безбедноста“, извести МВР.
„На 22.02.2024, по претходна расправија околу сообраќајот, пријавените физички нападнале полициски службеник“, соопшти МВР.
Црна хроника
Тело на починат маж извадено од Вардар во Велес
Полициски службеници од СВР Велес, вчера во 8.30 часот, во водите на реката Вардар блиску до местото наречено „Јаниташ“, пронашле тело на починато машко лице.
Телото на починатиот било извадено од реката од полициски службеници од Одделот за специјални полициски операции при МВР, известуваат од СВР Велес.
Увид извршила увидна екипа од СВР Велес. По наредба на јавен обвинител, телото е дадено на обдукција.