Американската армија и „партнерите“ ги започнаа воздушните напади врз позициите на Исламската држава во Сирија, соопшти Пентагон, а Стејт департментот во вторникот потврди дека Вашингтон пред нападите го известил Дамаск иако претходно претседателот Барак Обама и државниот секретар Џон Кери изјавија дека нападите врз џихадистите на сириска територија нема да бидат изведувани во координација со владата на Башар ал-Асад, од кого бараат да си замиен од власта.
 

Американската армија и „партнерите“ ги започнаа воздушните напади врз позициите на Исламската држава во Сирија, соопшти Пентагон, а Стејт департментот во вторникот потврди дека Вашингтон пред нападите го известил Дамаск иако претходно претседателот Барак Обама и државниот секретар Џон Кери изјавија дека нападите врз џихадистите на сириска територија нема да бидат изведувани во координација со владата на Башар ал-Асад, од кого бараат да си замиен од власта.

„Американците во понеделникот ги известија претставниците на Сирија при Обединетите нации дека ќе изведат удари врз терористичката организација Исламска држава во Рака“, кое е силно упориште на IS во северна Сирија, пренесува државната агенција SANA. Државната сириска телевизија потоа извести дека „американските авиони започнале со напади на позициите на терористичката организација Исламска држава во Рака“.

Американскиот претседател Барак Обама во својот говор од 10-ти септември предупреди дека си го зема правото да ја нападне Исламската држава, па и нејзините позиции во Сирија.

„Одлуката за почетокот на нападите ја донесе нешто порано во текот на денот командантот на централната воена област (Centkom, задолжена за операциите во овој регион), врз основа на одобрувањето кое му го дал врховниот командант (претседателот Обама)“, се истакнува во соопштението на службата за односи со јавноста на Пентагон.

Според анонимен американски функционер кој зборувал за агенцијата Reuters, арапските партнери коишто учествуваат во нападите против IS во Сирија се всушност сунитските арапски земји кои ја поддржуваат и финансираат сириската сунитска опозиција против владата на претседателот алавит Башар ал-Асад – Саудиска Арабија, Обединетите Арапски Емирати, Јордан и Бахреин.

Според опозициската Сириска опсерваторија за човекови права (SOHR) со седиште во Лондон, САД и неговите арапски сојузници извеле во вторникот речиси 20 напади врз позициите на Исламската држава во покраината Рака. „Меѓународната коалиција изведе речиси 20 напади врз позициите на IS во градот Рака и во близина на локалитетите Табака, Ајин Иса и Тал Абиџаф при што имаше мртви меѓу редовите на џихадистите“, се вели во соопштението SOHR.

Претходно месецов зборувајќи за оваа тема американскиот претседател Барак Обама рече дека Вашингтон доколку прибегне на овој чекор нема да го консултира Дамаск, кој, пак, соопшти дека американските напади мора да бидат во координација со владата на претседателот Башар ал-Асад, кој инаку е трн во окото на Западот како регионален сојузник на Русија, и три ипол години ги поддржуваат сунитските бунтовници кои се обидуваат да го соборат.

Потоа американскиот државен секретар Џон Кери повтори дека нема да има никакво координирано договарање са официјален Дамаск за потенцијалните американски напади врз упориштата на Исламската држава во Сирија, меѓутоа дека ќе биде сторено сѐ за да се избегнат непланираните инциденти. „Нема да ја координираме воздушната операција со Сирија, но ќе се потрудиме да ги спречиме непланираните инциденти и да обезбедиме Сиријците да не преземат нешто поради што уште повеќе би зажалиле“, изјави американскиот државен секретар Џон Кeри во интервјуто за американската телевизиска мрежа CBS.

Кери изјави дека нема да има координирано дејствување бидејќи не станува збор за акција којашто се темели на соработка, Сириската страна неодамна изјави дека се наклонети на нападите врз џихадистите од Исламската држава, кои претставуваат заеднички непријатели, но само доколку бидат координирани со Вашингтон.

Руското министерство за надворешни работи во четвртокот објави дека смета оти воздушните напади врз џихадистите од Исламската држава во Сирија без мандат од Советот за безбедност на Обединетите нации и без координација со властите во Дамаск, би претставувал акт на агресија. Москва, инаку, е децениски стратешки сојузник на Сирија, а со помош на Кина неколкупати блокираше западни резолуции во Советот за безбедност на ОН, со кои требаше да се осуди владата на сирискиот претседател Башар ал-Асад, што според двете земји ќе создаде ситуација за повторување на ткн либиско сценарио, односно за странска воена интервенција. САД повеќе од три години се под притисок на своите сунитски арапски сојузници на Блискиот исток, да интервенира против алавитот (шиит) Асад.

„Американскиот претседател зборуваше директно за можност од воздушни напади на американските воздушни сили врз позициите на Исламската држава (IS) во Сирија без дозвола на нејзината легитимно избрана влада. Таквиот потег, додека не постои резолуција на Советот за безбедност на ОН, би претставувал акт нa агресија и големо кршење на меѓународното право“, изјави во четвртокот портпаролот на руското министерство за надворешни работи, Александар Лукашевич.

Истиот став го искаже сирискиот министер за национално помирување, Али Хајдар. „Секоја акција преземена без одобрение на сириската владата е чин на агресија врз Сирија. Мора да постои соработка и координација со Сирија и мора да постои сириско одобрување за секоја акција, военa или каква и да е друга“, изјави Хајдар.

Ноќта кон вторникот Пентагон потврди дека започнале на падите против џихадистите на сириска територија. „Можам да потврдам дека американската војска и силите на партнерските земји водата воена акција против терористите на Исламската држава во Сирија со употреба на ловци, бомбардери и ракети Томахавк“, изјави портпаролот на американското министерство за одбрана, контраадмиралот Џон Кирби, пренесе AFP.

Иако Кирби не изјави ништо за целите на овие напади, весникот The New York Times пишува дека целите однапред биле избрани во Рака, поради големата порозност на границата меѓу Сирија и Ирак. Весникот од свои извори потврди дека во напад учествувале „повеќе сојузнички арапски земји“.

Агенцијата Reuters, повикувајќи се анонимен американски функционер јави дека цел на нападите се дваесетина локации, како и дека во нападите изведувани со ракетите „Томахавк“ учествува најмалку еден американски воен брод.

Американската армија од 8-ми август секојдневно изведува воздушни напади врз позициите на Исламската држава во Ирак. Според американскиот претседател Обама тие напади се преземаат за да им се помогне на силите на ирачката влада и на ирачките Курди кои трпеа силни порази од џихадистите кои се подобро вооружени и подисциплинирани. Благодарејќи на тие напади на кои последните денови им се приклучија и француските вооружени сили, ирачките и курдските сили успеаја да задржат некои позиции и да повратат повеќе стратешки места./крај/мф/сн

Извор: Макфакс