Регион
Пет загинати и 36 ранети во експлозијата во Истанбул
Пет лица загинаа и најмалку 36 други се ранети, од кои 12 странски државјани се со тешки повреди, во самоубиствениот бомбашки напад кој одекна во саботата на авенијата Истиклал во центарот на Истанбул, пренесуваат турските медиуми.
Нападот се случи на улицата Бало пред канцеларијата на локалниот гувернер во општината Бејоглу, и започната е темелна истрага за нападот, изјави за медиумите гувернерот на турскиот мегалополис Истанбул, Васип Шахин.
Министерот за здравство Мехмет Муезиноглу соопшти дека се ранети 36 лица, од кои 12 се странски државјани во тешка состојба и едно дете. Според него, во истанбулските болници седум жртви се во критична состојба.
Агенцијата Doğan јавува дека е потврдено загинувањето на пет лица во самоубиствениот бомбашки напад на популарната пешачка зона на авенијата Истиклал, како и дека меѓу ранетите има тројца државјани на Израел. Оваа зона долга три километра во текот на викендите ја посетуваат повеќе од три милиони домашни и странски туристи.
Портпаролот на израелското министерство за надворешни работи Емануел Нахсон потврди дека се ранети израелски државјани, но за Reuters не можел да ја потврди нивната бројка.
Во јануари 12 туристи, претежно германски, загинаа во Истанбул во сличен самоубиствен бомбашки напад за кој турските власти ја обвинија екстремната сунитска организација Исламска држава.
Висок турски функционер за Reuters, кој барал да остане анонимен, изјавил дека првичните сознанија укажуваат дека забранетата Работничка партија на Курдистан (PKK) или некоја од нејзините фракции, стојат зад нападот. Според него, напаѓачот бил спречен да го изведе нападот како што планирал, бидејќи бил забележан од полицајци и ја активирал бомбата „од страв“.
Скин, вокалиститот на светски познатиот британски бенд Skunk Anansi, бил меѓу очевидците на нападот. „Голема експлозија на бомба пред нашиот хотел. Јас сум во ред, многу сум потресен, мртви луѓе, ужасни слики“, напиша пејачот на Twitter веднаш по експлозијата која одекна околу 11 часот.
Овој напад доаѓа шест дена по големата експлозија на автомобил бомба во турската престолнина Анкара, кога минатата недела загинаа 35 луѓе. Одговорноста за нападот ја преземаа милитантите од организацијата Курдски соколи на слободата (ТАК), која се смета за отцепена фракција од РКК. Кон крајот на февруари ТАК ја презема одговорноста, исто така, за големиот напад со автомобил бомба во Анкара кога беа убиени 29 луѓе.
Поради постоење информации за можни бомбашки напади, Германија ги затвори од четвртокот своите дипломатски мисии и образовни институции во Турција. Американската амбасада во Анкара издаде соопштение за своите државјани да ги имаат предвид мерките за претпазливост, наведувајќи дека овој викенд се одбележува Курдската нова година – Невроз, како и дека на големите настани може да дојде до судири и насилства. Амбасадата на САД, исто така, потсетува дека цели на терористичките организации во последно време беа железничките и автобуските станици, институциите на турската влада и јавни простори.
Турските коментатори предупредуваат дека комбинираниот ефект од терористичките напади, војната во соседна Сирија и остриот дипломатски според со Русија, може да има разурнувачки ефект врз виталниот за Турција туристички сектор.
Незапирливиот бран насилства во Турција започна минатото лето, кога во југоисточниот дел се случи џихадистички напад врз курдски активисти, а курдските милитанти ја преземаа одговорноста за убиство на двајца турски полицајци. Потоа следеше најголемиот терористички напад изведен на турска територија, на централната железничка станица во Анкара, која беа убиени 105 луѓе, активисти на прокурдски и левичарски организации и движења. Турските власти за овој напад ја обвинија Исламската држава.
Во меѓувреме се разгоре вооружениот конфликт во југоисточниот мнозински курдски дел од Турција, по двегодишниот прекин на огнот и пропаѓањето на мировните преговори меѓу владата во Анкара и историскиот челник на РКК, Абдула Оџалан, кој е во заточение во близина на Истанбул. Во борбите загинати се стотици луѓе, вклучително и цивили, а забележано е масовно напуштање на домовите на цивилното население, поради воените операции на турските безбедносни сили против курдските герилци./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
(Видео) „Мажот ја навредувал и изневерувал“ – Обвинителството во Албанија со детали за мајката што скокна во река со своите деца
Обвинителството на Основниот суд од општа надлежност во Скадар во комуникација до медиумите изнесе повеќе детали за трагедијата во семејството Арази во албанскиот град Скадар, каде досега се пронајдени телата на две деца, додека потрагата по телото на мајката и третото дете продолжува.
„До оваа фаза се утврдени сомнежи врз основа на докази дека државјанин Е.А., како последица на континуирано психичко насилство врз неговата сопруга, манифестирано во форма на континуирани навреди и прељуба, тешко нарушувајќи го нејзиното достоинство, го предизвикал самоубиството на А.А., за која се сомнева дека во тешка психичка состојба, се фрлила во реката заедно со трите малолетни деца“, се вели во соопштението на Обвинителството.
Алма Арази (39) со трите деца скокна во студената река.
Телото на најстарото девојче било пронајдено вчера во реката, додека телото на второто денеска.
Во потрагата учествува и рибарот кој вчера пронашол едно од девојчињата и кој рекол дека потрагата е многу комплицирана.
По страшната трагедија, нејзиниот сопруг е уапсен и обвинет за семејно насилство и предизвикување самоубиство.
Новинарот на „Еуроњуз Албанија“ рече дека за време на сведочењето дадено во полиција, 39-годишниот сопруг Ергис Арази се појавил многу ладен за време на испрашувањето, не покажал никакви емоции и ги отфрлил обвинувањата дека ја малтретирал сопругата или другите деца.
Тој рече дека парот бил во стабилна економска ситуација, претходно живеел во Италија и Германија, а неодамна се преселил во Скадар.
Арази, откако неговото семејство било пријавено за исчезнато, два дена подоцна бил виден во кафуле со пријателите и наводно воопшто не бил вознемирен, наведува „Voxnews.al“, повикувајќи се на изјавите на неговите пријатели.
Како што рекоа, тој бил сосема мирен.
Семејството на Ергис тврди дека тој никогаш не би им наштетил. Тие тврдат дека парот имал проблеми меѓу себе, но дека Ергис Арази не бил насилник.
„Ги обожаваше децата. Тој никогаш не би им наштетил. Работеше цел ден во сервис за мобилни телефони за да ги испрати во приватно училиште. Можеби имал проблеми со сопругата, но таа никогаш не требало да им го прави тоа на децата. Тоа нема да и го простиме“, рекле тие.
Регион
Србите објавија детали за дочекот на кинескиот претседател во Белград: „Вучиќ ќе му служи српски вина“
Претседателот на Кина, утре пристигнува во дводневна посета на Белград, а во тек се последните подготовки за неговото пристигнување.
Тој ќе биде придружуван од делегација од 400 луѓе, а ќе го обезбедуваат 3.400 полицајци.
„Блиц“ го објави планот за неговиот пречек.
Кси на аеродромот ќе биде пречекан со свечена церемонија и фолклор. Покрај патот во Белград ќе бидат поставени кинеско-српски знамиња, а на надвозниците ќе бидат испишани пораки.
Свечен дочек ќе биде организиран и пред Палатата Србија. Српскиот и кинескиот претседател ќе потпишат триесетина договори.
За време на ручекот ќе се служат српски јадења и вина, а претседателот Вучиќ лично ќе служи Џинпинг со српски вина, од пенливи до десертни вина, од кои повеќето се автохтони српски сорти.
Девојка од Србија ќе ја отпее песната „Татковино и јас“ на кинески, додека хорот „Чаролије“ ќе ја изведе песната „Прекрасен јасмин цвет“, исто така на кинески. .
Програмата ќе заврши со песната „Ова е Србија“, објави српскиот портал.
Регион
(Видео) Вo Шпанија уапсен еден од најбараните наркобосови во Србија
Шпанската полиција разби српска организирана криминална група осомничена дека го нападнала домот на ривалскиот клан од Србија минатиот јануари. Во акцијата беа уапсени 11 лица, меѓу кои и лидерот, по кого Србија распиша потерница уште во 2021 година.
Во провинциите Малага, Мадрид и Барселона се извршени апсења поради вмешаност во криминални дејствија – киднапирање, грабеж со насилство, недозволено поседување оружје, телесни повреди, фалсификување документи, трговија со дрога и членство во криминална организација.
Во акцијата на шпанската полиција одземени се три парчиња огнено оружјо. На некои им беа избришани сериските броеви. Запленети се и сто парчиња муниција, седум лажни лични документи, дрон и 16.000 евра во кеш.
Извршени се и седум претреси, од кои пет во Естепона.
Меѓу уапсените е и водачот на криминална група по која Србија распишала потерница во 2021 година. Тој е еден од најбараните луѓе во Србија.