Македонија
(Видео) Туск: Северна Македонија направи сè што се очекуваше за влез во ЕУ
Претседателот на Европскиот совет, Доналд Туск, по денешната средба со премиерот, Зоран Заев, изјави дека Северна Македонија направила сè што се очекувало изминатиот период за влез во Европската Унија. Туск истакна дека земјата многу добро, на демократски начин, се справила со политичката криза од изминатиот период.
„Напорите на вашата земја во последните неколку години беа извонредни. Издржавме една од најтешките миграциски кризи. Ова беше тежок тест и период за дејствување, вашата земја го помина подобро од многу други. За политичката криза, пак, најдовте решенија засновани на демократски принципи. Со договорите со Бугарија и Грција вие станавте шампиони. Она што го направивте е меѓународно признаено и не треба да биде залудно сфатено од страна на ЕУ“, рече Туск.
Претседателот на ЕС истакна дека лидерите од Унијата се обврзале во октомври јасно да се произнесат за почеток на преговорите на Северна Македонија со ЕУ.
„Јас во јуни реков дека вашата земја во последните две години направи сè што се очекуваше за да почнат преговорите за пристап кон ЕУ. Тоа продолжува да биде мојот цврст став. Сакам да биде кристално јасно дека не постои сомнеж во Брисел за вашето владеење на правото и борбата против корупцијата. Но, секој во секое време може да го оспори ова и ние знаеме дека вашата Влада е издржна и стои на тоа во однос на работите за СЈО“, рече Туск.
Тој порача дека Северна Македонија мора да остане во фокусот за влез во ЕУ, но потребно е и трпение.
„Немам сомнежи дека оваа земја содржи квалитети. Скопје е најдоброто место каде што би сакал да ги повикам лидерите на ЕУ“, рече претседателот на Европскиот совет.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Одлуки за учество на припадници на Армијата на вежби во Германија, Бугарија, Косово
Владата на денешната седница донесе и повеќе одлуки на предлог на Министерството за одбрана, меѓу кои и за испраќање на припадници на Армијата на Република Северна Македонија за учество на вежбата „BEYOND HORIZON 24“, во Република Бугарија, за испраќање на припадници на Армијата на Република Северна Македонија за учество во НАТО операцијата „КФОР“ во Република Косово и за испраќање на припадници на Армијата на Република Северна Македонија за учество на вежбата „Combined Resolve 24-2“ во Сојузна Република Германија.
Македонија
Личните документи ќе можат да се подигнат и в среда, извести МВР
Во пресрет на претстојните Претседателски и Парламентарни избори што ќе се одржат утре, Министерството за внатрешни работи ги известува граѓаните дека Одделот за граѓански работи, односно сите отсеци за управни работи на оваа организациона единица при МВР на 08.05.2024 ќе работат за издавање на лични документи со работно време од 08.00 до 19.00 часот.
„Исто така ги известуваме граѓаните дека сите барања за лични карти кои се поднесени до 03.05.2024 година, се веќе изготвени и граѓаните можат да ги подигнат“, соопшти МВР.
Македонија
Пронајдени три полуавтоматски пиштоли и 139 куршуми, ОЈО Велес отвори истрага за недозволено држење оружје
Основното јавно обвинителство Велес донесе Наредба за спроведување истражна постапка против едно лице за кривично дело – Неовластено изработување, држење, посредување и тргување со оружје или експлозивни материи од член 396 став 5 во врска со став 3 на Кривичниот законик.
„При претрес во домот на осомничениот во селото Мелница, општина Чашка, полицијата пронашла поголемо количество оружје и муниција – три полуавтоматски пиштоли и 139 куршуми со различен калибар. За осомничениот поднесен е предлог за определување мерка притвор“, соопшти Обвинителството.
ОЈО Велес продолжува да постапува и да презема дејствија за проверка на сомненијата за изборен поткуп во однос на овој осомничен и на уште едно лице во велешко кај кое во текот на вчерашниот ден беа извршени претреси, се додава во соопштението.