Македонија
Шилегов: Гасоводниот прстен околу Скопје е завршен
Градоначалникот Шилегов денеска учествуваше на панел-дискусијата „Обновливи извори на енергија и енергетска ефикасност за подобра животна средина“ што се одржуваше во хотелот „Холидеј ин“, во организација на Институтот за комуникациски студии, а во рамките на кампањата од јавен интерес за подобра животна средина „Не игнорирај! Реагирај!“.
„Во текот на минатата година ја завршивме секундарната мрежа, односно гасоводниот прстен околу Скопје. Со цевката го преминавме дури и Вардар, од Карпош 4 кон Влае. Ова за мене е еден од поголемите потфати, зашто зборуваме за енергетска стратегија за нашиот град, нешто што со години наназад го немавме и сега живееме со последиците. Кога зборуваме за енергенсите, особено кога зборуваме за природниот гас, најчесто зборуваме само за затоплување на домовите, иако тој енергенс може да се користи за сите енергетски потреби. Основните карактеристики на овој енергенс е дека во најмалку 20% е помала емисијата на штетните гасови во однос на другите горива, речиси воопшто го нема сулфурот како нус продукт и е енергетски ефикасен. За нас како град сега е многу битно да влеземе во процесот на терцијална гасификација, односно, достапност на гасот до домаќинствата“ рече Шилегов.
Тој додаде дека треба да имаме предвид дека дел од производствените и индустриските капацитети се префрлени на природен гас, а префрлени се и сите топлани во нашиот град.
„Секогаш кога зборуваме за топловодната мрежа и затоплувањето на домовите преку централниот систем зборуваме за евтино и еколошки најприфатливо затоплување на домовите кое во овој момент може да им биде понудено на граѓаните. Да не заборавиме дека употребата на огревно дрво што е најраспространето во нашата држава, ако биде заменето со други енергенси, ќе ја спречи сечата на дрвјата во шумите и ќе се спречат елементарните непогоди како во Стајковци од пред три години. Што значи примената на гасот? За домаќинствата ќе значи поекономично греење, зашто се намалуваат трошоците за затоплување на домовите, а тоа на краток рок значи подобрување на економската состојба на граѓаните. За индустриските капацитети тоа значи намалување на трошоците и можност за инвестирање во нови технологии токму заради заштедите кои се прават поради воведувањето на гасот. Во таа насока, во текот на утрешниот ден ги очекуваме претставниците на МАН и го потпишуваме договорот за набавка на нови 33 градски автобуси кои што ќе бидат на гас. Заштедата што ќе ја направиме со овие 33 автобуси е 700.000 евра годишно“, нагласи Шилегов.
Градот Скопје е сериозно посветен на енергетската политика. Токму затоа го основа и „Градски енергетски системи“, правен субјект кој претендира да биде носител на енергетската политика на градот, и тоа во двата сегмента – во развојот на топловодната мрежа и нејзиното проширување и во развојот на гасификациската мрежа.
„Во градот има три топловодни мрежи кои опфаќаат делови од Центар, Аеродром, Карпош, Кисела Вода, Чаир, Гази Баба и Бутел, но се неспоени. Тоа е предизвик кој допрва ни претстои. Има и делови од општините Карпош, Чаир, Бутел, Гази Баба и Кисела Вода, како и општините Ѓорче Петров, Шуто Оризари и Сарај каде што е економски неисплатливо да ја прошируваме топловодната мрежа и токму во тие делови треба да навлеземе со терцијалната гасификација. Станува збор за густо населени подрачја каде што има индивидуално домување. Со централната власт не секогаш имаме синхронизирани ставови. Градот Скопје е на став дека терцијалната гасификација мора да ја води градот и за нас јавно-приватно партнерство не е прифатливо. Искуствата кои ги имаме на Балканот зборуваат дека при јавно-приватно партнерство се бара поврат на инвестицијата во првите десет години, а првите десет години не се инвестициски циклус. Ако Градот Скопје или единиците на локална самоуправа не се креатори на енергетските политики може да ни се случи развојот на гасификацијата да се одвива во делови каде што веќе имаме топловодна мрежа. Тоа би бил поевтиниот начин за развој на гасификацијата, но погрешен начин, ако се има предвид дека како држава би требало да ни биде приоритет намалувањето на аерозагадувањето и доведувањето на евтин енергенс до што е можно поголем број корисници“, нагласи градоначалникот Шилегов на денешната трибина.
Со почит,
Град Скопје
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Во 100 дена Мицкоски изврши брутална партизација на институциите, вели Филипче
Партиската книшка и лојалноста кон партијата беа предуслов за вработување во изминативе 100 дена од владината Коалицијата предводена од ВМРО-ДПМНЕ. Претседателот на СДСМ, Венко Филипче на денешната прес-конференција, упати силна критика за владеењето на Христијан Мицкоски во првите 100 дена.
„Со право некои велат дека ова се најлошите 100 дена на било која Влада. Наспроти ветувањата за мала, професионална државна администрација, добивме Влада со четири нови министерства и можност за стотици нови партиски вработувања. ВМРО-ДПМНЕ измисли нови позиции за добро платени национални координатори и вдомување на партиските кадри. За прв пат се воведоа три нови заменици директори во Царина за да се задоволат партиските апетити на Максим Димитриевски и ВЛЕН“, рече Филипче.
Наместо департизирана, професионална и високо обучена администрација, во изминативе 100 дена добивме брутална партизација на институциите, без критериуми, без стручност, професионалност и соодветно образование, додаде тој
„Ваква брутална партизација на главните органи на државата е најава за само едно, а тоа е огромен криминал преку овие институции! За 100 дена Влада дознавме дека Мерит системот на ВМРО-ДПМНЕ и ЗНАМ всушност бил систем за партиски заслуги“, истакна Филипче.
Македонија
Филипче: Безбедноста на граѓаните загрозена во 100 дена власт на Мицкоски
Насилничкото однесување на припадници на полицијата, ја покажа погубната страна на партизацијата на безбедносните служби во првите 100 дена од владеењето на Мицкоски и коалицијата. Ова е став на претседателот на СДСМ, Венко Филипче, кој денеска на прес-конференција ги анализираше првите 100 дена од мандатот на Мицкоски и коалицијата предводена од ВМРО-ДПМНЕ.
„Телохранители на Мицкоски кои тепаат полицајци стануваат команданти, а лица со криминално минато се поставуваат за директори. Безбедносните служби целосно се криминализираат. За само 100 дена имаме партизација на виталните институции и загрозување на безбедноста на косовската граница. Партиски кадри на ВМРО-ДПМНЕ и Влен ја третираат државната граница како приватен премин. Никој не контролира што и кој влегува или излегува на Блаце“, рече Филипче.
Тој потенцираше дека од почетокот на мандатот на министерот за внатрешни работи Панче Ташковски, досега личната безбедност на граѓаните е непозната категорија.
„За сто дена ВМРО-ДПМНЕ улиците станаа небезбедни каде убиствата, разбојништвата и нападите се секојдневие. Десетици нерасчистени убиства има само откако Тошковски е министер за внатрешни работи. Во полицијата, наместо професионализација имаме партизација со насилници и криминалци“, истакна Филипче.
Македонија
Ѝ се заканувал со убиство на уставна судијка преку социјалните мрежи: Обвинителството предлага условна осуда за скопјанец
Јавен обвинител од Основното јавно обвинителство Скопје до Основниот кривичен суд Скопје достави предлог за издавање казнен налог против едно лице за кривично дело загрозување на сигурноста во согласност со член 144 став 5 од Кривичниот законик.
На 21 јуни, преку информатички систем, обвинетиот се заканил дека ќе стори кривично дело убиство од член 123 став 2 од Кривичниот законик за кое е пропишана затворска казна од најмалку 10 години спрема оштетената – судијка на Уставниот суд на Република Северна Македонија. На својот профил на социјална мрежа, незадоволен од одлука на Уставниот суд во врска со Законот за застареност на долговите, обвинетиот напишал објава со закани дека ќе го стори кривичното дело директно споменувајќи ја посочената уставна судијка, со што кај оштетената предизвикал чувство на несигурност, загрозување и страв.
Со казнениот налог Обвинителството предлага на обвинетиот да му биде изречена кривична санкција – условна осуда, со која ќе му биде определена казна затвор од три месеци, која нема да се изврши доколку тој не стори ново кривично дело во рок од една година од правосилноста на пресудата.