Европа
Француските власти потврдија дека Абaауд е убиен
Главниот „мозок“ на терористичките напади кои минатиот петок се случија во Париз, Абделхамид Абaауд бил убиен за време за време на рацијата која се случи ноќта меѓу вторникот и средата во парискиот кварт Сен Дени, потврдиле од канцеларијата на државниот обвинител на Франција, пренесуваат светските агенции.
По целодневните шпекулации дали терористот роден во бриселскиот кварт Моленбек навистина настрадал во акцијата на француската полиција, информацијата и официјално ја потврдиле од канцеларијата на францускиот државен обвинител, без дополнителни детали за неговата смрт.
„Абделхамид Абаaуд формално е идентификуван со помош на отпечатоци од прстите, по акцијата на специјалната единица во Сен Ден на 18-ти ноември“, соопштиле од канцеларијата на државниот обвинител.
Првата реакција на смртта на Абаaуд дошла од страна на францускиот премиер Мануел Валс, кој „го поздравил тоа што се случило“. Дека Абаaуд настрадал во акцијата на француските специјални сили претходно во средата пренесе и The Washington Post, повикувајќи се на двајца неименувани агенти на тајната служба.
Францускиот обвинител Франсоа Молин потоа соопшти дека Абаауд не бил меѓу уапсените, но тогаш не ја исклучил можност тој да е убиен во акцијата на полицијата. Француската полиција во ноќта меѓу вторникот и средата спроведе голема рација во париската населба Сен Дени во која уапси седум лица, а две лица беа убиени.
Имињата на убиените не беа објавени, но потоа се појавија информации дека една од нив е Хасна Аитбулахсен, роднина на првообвинетиот за терористичките напади во Париз. Таа побарала помош од полицијата, се појавила на еден прозорец од зградата во која упаднала полицијата, а по десетина минути од престрелката меѓу полицијата и терористите го активирала појасот со експлозив.
По потекло од Мароко, 27-годишниот Абаауд се смета за еден од најактивните членови на Исламска држава во Сирија, а на почетокот на годината во отсуство беше осуден на 20 години во затвор поради терористички напад во градот Вервје, во кој беа убиени белгиски полицајци. Тогаш истражителите изразија уверување дека тој е лидерот на џихадистичката келија во Белгија и дека раководи со регрутација на радикални исламисти кои потоа стануваат членови на Исламска држава.
Абаауд беше уапсен на 17-ти јануари годинава во Грција, заедно со уште тројца исламисти, два дека откако во Белгија беа убиени двајца членови на неговата терористичка ќелија, Редуан Хагауи и Тарик Жадаун. Сепак, непосредно потоа тој беше пуштен на слобода и се претпоставува дека се вратил во Сирија, од каде ги командувал операциите на терористите во Белгија./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
(Видео) Украинците објавија снимка: „Ова се руски агенти, сакаа да го убијат Зеленски“
Украинските разузнавачи соопштија дека спречиле руски заговор за атентат на претседателот Володимир Зеленски. Украинската служба за државна безбедност СБУ објави дека фатила руски агенти, кои биле вработени во украинската државна гарда. Разузнавачките претставници велат дека руски агенти планирале да ги убијат претседателот и други високи владини функционери.
Шефот на СБУ, Васил Маљук, изјави дека неуспешниот атентат требало да биде подарок за Владимир Путин пред неговата денешна инаугурација.
СБУ на својот канал на „Телеграм“ објави тврдење дека руски таен агент ги пренел координатите на безбедната куќа пред планираниот воздушен напад. Претставници на разузнавањето додадоа дека Русија планирала да ги уништи сите траги од дронот што би се користел за гаѓање на претседателот со друг проектил.
„Непријателот активно развиваше планови за да го тргне претседателот Володимир Зеленски. Една од задачите на руската разузнавачка мрежа ФСБ беше да бара џелати меѓу војниците блиски до службата што го штити претседателот, кои би можеле да го убијат шефот на државата“, соопштија од СБУ.
„Покрај Володимир Зеленски, непријателот планира да ги елиминира и шефот на Службата за безбедност на Украина, Васил Маљук, шефот на Воената разузнавачка служба на Украина, Кирил Буданов, и други високи функционери“, се вели во соопштението.
„Ограничен број луѓе знаеја за нашата специјална операција и јас лично го следев нејзиниот напредок. Терористичкиот напад, кој требаше да биде подарок за Путин пред инаугурацијата, всушност беше неуспех на руските специјални служби“, рече Маљук.
„Но, не смееме да заборавиме – непријателот е силен и искусен, не може да се потцени. Ќе продолжиме да планираме однапред и да си ја работиме работата секој предавник да ги добие заслужените судски казни“, заклучи тој.
СБУ наведува дека при претресот на просториите на уапсените руски агенти биле пронајдени „релевантни средства за уништување“ и други докази за криминални активности.
Европа
Босфор затворен, заринка украински брод
Теснината Босфор, која го поврзува Црното со Средоземното Море, е затворена за бродови откога денеска таму заринка товарен брод од Украина, соопштија турските власти за ДПА.
Бродот „Алексис“ превезува прехранбени производи од Украина до Египет. Дефект на моторот се случил во близина на излезот од пловниот пат, изјави портпаролот на Управата за безбедност на крајбрежјето за дпа.
Спасувачките напори се веќе во тек, додаде изворот. Босфорот служи како излез за украинското жито на светските пазари во екот на руската инвазија. Речиси 40.000 брода поминале низ Босфорот во 2023 година, според турското Министерство за транспорт.
Европа
Руски хеликоптери уништија дронови на украинската морнарица, следуваше одговор, пишува „Форбс“
Украински експлозивни автономни пловни објекти или поморски беспилотни летала напаѓаат и потонуваат руски воени бродови во Црното Море од минатата есен, а сега руската Црноморска флота одлучи да возврати, и тоа од воздух, пишува „Форбс“.
Руски бомбардери, летечки бродови и хеликоптери патролираа на рутите до пристаништата, каде што е закотвена Црноморската флота, барајќи знаци за приближување на автономните бродови, кои ги гаѓаа со ракети и куршуми. Меѓутоа, во војната – како и во физиката – секоја акција има своја реакција. И, така, сега украинските автономни бродови добија проектили „земја-воздух“, кои можеби веќе ги лансираат руските авиони.
Снимките од Црното Море направени во неделата или понеделникот покажуваат како хеликоптер „камов Ка-29“ кружи околу украинскиот брод и пука во него. Можно е овој напад да е поврзан со украинскиот напад на Црноморската флота на Крим овој викенд. Пловилата наводно потопиле руски патролен брод.
Ова не е првпат руско летало да уништи украински автономен брод (УСВ). Но, тој конкретен УСВ се издвојуваше затоа што беше опремен со ракетни фрлачи и инфрацрвена ракета „Р-73“. Се чини дека некои украински бродови сега имаат свои противвоздушни ракети.
Рускиот канал Fighterbomber на „Телеграм“ беше изненаден од ова: „Украинците некако успеаја да ја поврзат ракетата со системите за далечинско управување на УСВ“.
Проектилот „Р-73“ е чувствителен на извори на топлина како што се моторите на леталата. Не бара телеметрија за водење. Сепак, каналот Fighterbomber не греши кога се прашува како војниците што управуваат со УСВ може од далечина да ги нишанат и лансираат тие проектили.
Fighterbomber шпекулира дека украинските автономни пловила сè уште не ги лансирале своите проектили, но вреди да се напомене дека УСВ, што екипажот Камов го уништи во неделата или понеделникот, имал два ракетни фрлача, но само еден проектил.
Со опремувањето на УСВ со ракети „Р-73“ украинските сили додадоа уште една улога на нивните сè повеќе разновидни автономни пловила. Повеќето од нив се еднонасочни: тие се натоварени со експлозиви и удираат во руски воени бродови. Постои и верзија на поморскиот дрон Sea Baby, кој може да лансира ненаведувани проектили за напади со долг дострел, а можно е и најголемите УСВ во Украина да имаат и радиопопречувачи.
Постои шанса дека овие нови УСВ сепак веќе ги лансирале своите проектили. Најмалку еден, а можеби и два руски хеликоптера наидоа на неволја над Црното Море на 9 и 10 април. Портпаролот на украинската морнарица, Дмитро Плетенчук, тврди дека рускиот „камов ка-27“ бил соборен на 9 април, а повеќе извори потврдуваат дека еден ден подоцна бил соборен уште еден хеликоптер „мил ми-24“.
Падот на „камов“ не е потврден, но интересно е тврдењето на Плетенчук дека руското летало „барало нешто“ и „го нашло“. Ако Русите навистина го загубија „ка-27“ на 9 април и ако тој хеликоптер навистина бараше УСВ, дали е можно дека пронашол УСВ вооружен со ракети „земја-воздух“?