Подготвено ја започнуваме новата учебна 2025-2026 година. На сите ученици, на наставниците, стручните соработници им посакуваме многу успеси и нови достигнувања. Владата предводена од ВМРО – ДПМНЕ се погрижи да бидат обезбедени сите услови за квалитетна настава, истакна на прес-конференција Емилија Бошковска од ВМРО-ДПМНЕ.

„Обезбедивме учебници за сите ученици. Истите се испорачани веќе во училиштата, а за прв пат нови учебници ќе има за странските јазици, нешто што ни недостасуваше во изминатите 7 години.

Инфраструктурните услови се доста подобрени и продолжуваат да се подобруваат. Владата и Министерството вложија 67 милиони евра во изградба на нови училишта, спортски сали и во реконструкција на постојните објекти. Во поголем дел од училиштата поставена е модерна информатичка опрема, вклучително и опрема за мрежно поврзување и безбеден интернет“.

Како што нагласи, вештачката интелигенција станува дел од наставните содржини. За таа цел, додаде Бошковска, изготвено е упатство за наставници и ученици, за етичка примена на вештачката интелигенција за образовни цели.

„За прв пат во средните училишта се ангажираат 130 образовни асистенти кои ќе им помагаат на учениците со посебни образовни потреби. Во основните училишта ќе има над 1300 образовни асистенти, а воведено е и формално образование за децата кои се на подолго болничко лекување на детските клиники со што тие повеќе нема да губат настава.

Надлежното министерство стави во употреба и нов електронски дневник, далеку посовремен и пофункционален од претходниот“.

Бошковска потенцира дека откако Владата предводена од ВМРО – ДПМНЕ го започнала својот мандат, наставниците добиле зголемување на платите од над 12 проценти. Следното покачување според неа, ќе изнесува помеѓу 7,5% и 10%, во зависност од степенот на инфлација, а ќе се случува во текот на учебната година, поточно во март 2026та година.

„Го враќаме достоинството на наставниците со јасен план и потпишана спогодба за раст на платите во секоја година од мандатот.

Расте поддршката кон учениците, преку зголемени квоти на стипендии и покривање на трошоците за учество на меѓународни научни олимпијади.

Образованието е приоритет за оваа Влада и за ВМРО – ДПМНЕ. Буџетот за овој ресор годинава е најголем досега и изнесува речиси 40 милијарди денари, односно за 6 повеќе од лани. Застојот од изминатите 7 години е откочен. Промените се интензивираат, се следат глобалните трендови и стандарди, а квалитетот се зголемува“.

Со Буквар за финансиска писменост и училиштен прибор, Халкбанк им посака топло добредојде на првачињата од општините Кисела Вода, Прилеп и Берово. Активноста е дел од иницијативата „Среќно прваче“, која банката ја спроведува шеста година по ред, со цел да ја поддржи едукацијата на децата уште од најмала возраст. Годинава, првачињата на училишните клупи ги пречека пакетче со ликот на слончето Халки, кое е симбол на детското штедење на Халки и носител на голем број активности за општествена одговорност на банката.

Букварот за финансиска писменост содржи триесетина основни финансиски поими кои се илустрирани и опишани на јазик разбирлив за возраста на првачињата. Преку него тие можат да ги научат основите на финансиската писменост и да стекнат корисни навики за штедење.

„Среќно прваче е една од нашите најдраги активности бидејќи е посветена на првачињата, кои денес, на 1-ви септември, почнуваат нова епизода во својот живот. Нашата цел е преку специјално дизајнираните пакетчиња да им испратиме порака дека учењето нови работи може да биде забавно и на тој начин да се почувствуваат прифатени во новата училишна средина. Букварот на Халки е уникатно издание кое на првачињата ќе им овозможи да научат и нешто ново и интересно за финансиската одговорност“, вели вели Маја Наумовска Савеска, директор на корпоративни и маркетинг комуникации во Халкбанк.

Иницијативата „Среќно прваче“ секоја година се спроведува во различни општини од повеќе региони во Македонија. Годинава, од скопските општини, е вклучена Кисела Вода, каде активноста ќе се реализира во сите осум основни училишта.

„Грижата за децата е еден од стожерите во работата на Општина Кисела Вода и токму затоа со задоволство се вклучивме во иницијативата „Среќно прваче“ на Халкбанк, која веќе традиционално претставува симбол на внимание и посветеност кон најмладите. Образованието не е само она што се стекнува во училишните клупи, туку и градењето корисни навики кај децата преку примери на општествена одговорност и креирање подобри услови за нивен непречен раст и развој. Само заедно, со учество на сите општествени фактори, можеме да изградиме подобра заедница за нашите млади, за нашата иднина“, изјави Орце Ѓорѓиевски, градоначалник на Кисела Вода.

Дополнително, Халкбанк ќе им посака среќен почеток и на сите првачиња во општините Прилеп и Берово.

„Горд сум што Општина Прилеп се приклучува на оваа општествено – одговорна иницијатива „Среќно прваче“ на Халкбанк. Со подарување пакетчиња за првачињата, заедно се грижиме да им обезбедиме радосен и достоинствен почеток на новата учебна година. Особена вредност има што покрај основниот училишен прибор, децата го добиваат и „Букварот на Халки“, кој ги запознава со важните теми на финансиската писменост уште од најмала возраст“, изјави градоначалникот на Општина Прилеп, Борче Јовчески.

„Искрена благодарност до Халкбанк за донираниот училишен прибор за нашите најмали – првачињата. Оваа донација е прекрасен гест и силна поддршка за нивниот прв чекор во образованието. Заедно со вакви партнери градиме посветла иднина за децата и вложуваме во највредното – знаењето“, рече градоначалникот на Општина Берово, Звонко Пекевски.

Покрај „Среќно прваче“, Халкбанк преку слончето Халки спроведува голем број активности за поддршка на децата и младите, кои главно се насочени кон градење позитивни навики за инклузија, заштита на животната средина, развој на креативноста, одговорно родителство.

ПР

На Глобалниот индекс за мир (GPI) за 2025 година, Македонија е на 51 место со резултат од 1,799. Ова според Институтот за економија и мир (IEP) претставува пад од четири позиции во однос на минатата година.

Во регионот на Западна и Централна Европа, пред Македонија се: Хрватска на 19 место (резултат 1,519, пад од 1 позиција), Бугарија на 29 место (резултат 1,610), Грција на 45 место (резултат 1,764, ).

После нашата земја на листата е Албанија која е на 52 место (резултат 1,812, пад од 6 позиции), Босна и Херцеговина на 59 место (резултат 1,895, пад од 3 позиции), Косово на 63 место (резултат 1,908, пад од 3 позиции) и Србија на 6. место (резултат 1,914, пад од 1 позиција).

На глобално ниво, Исланд ја задржува титулата на најмирна земја во светот со резултат од 1,095, Ирска (1,260) и Нов Зеланд (1,282).

Русија (3,441), Украина (3,434), Судан (3,323), Демократска Република Конго (3,292) и Јемен (3,262) се меѓу земјите со најмалку мир, погодени од интензивни конфликти и хуманитарни кризи.

78 земји бележат влошување поради зголемениот број на надворешни конфликти.

Во делот на милитаризација трендот на подобрување на милитаризацијата беше широко распространет, при што 111 од 163 земји опфатени во GPI бележат подобрување.  Благ напредок има во делот на безбедноста и сигурноста во светот. Во ова насока подобрувања се бележат кај 95 земји, особено во делот за криминал, политичкиот терор и насилни демонстрации.

Помеѓу 2013 и 2022 година, повеќе земји имаат подобрување во позитивниот мир отколку што имаат влошување, при што 108 регистрирале подобрувања и 55 регистрирале влошувања.
Овие подобрувања главно биле поттикнати од подобрувања во следните столбови за позитивен мир: Слободен проток на информации, Правична распределба на ресурсите, Прифаќање на правата на другите и Високи нивоа на човечки капитал.
• Трите столба на позитивен мир за кои е забележано влошување од 2013 година се добри односи со соседите, добро функционирачка влада и ниски нивоа на корупција.

Фото: принтскрин