По долготрајна потрага по Абу Бакр ал-Багдади, еден од главните помошници на лидерот на Исламската држава, во 2018 година на ирачките разузнавачки служби им открил како Багдади со години успевал вешто да бега, рекле ирачките власти.

Ал-Багдади знаел да води стратешки разговори со своите вработени во комбиња, со кои бил превезуван зеленчук, открил Исмаил ал-Етави кога бил фатен од турските власти и предаден на ирачките.

„Етави откри вредна информација која им помогна на ирачките безбедносни агенции да го состават последниот дел од сложувалката од движењата на Багдади и просторот во кој се криел“, рекол претставник на ирачките безбедносни служби.

„Етави откри детали за петтемина мажи, вклучително и тој, како и детали за нивните состаноци со Багдади во Сирија, но и за разни локации“, рекол извор за „Ројтерс“.

Ловот на Багдади бил фрустрирачки за западните и арапските разузнавачки агенции, кои со години се обидувале да му влезат во трага на човекот што наметна владеење терор низ Сирија и Ирак и издаде наредби за масовни егзекуции и обезглавувања.

Ирачките служби го сметале Етави за еден од петтемина главни помошници на Багдади. Ѝ се придружил на Ал каеда во 2006 година, а американските сили го фатиле во 2008 година и го затвориле на четири години, велат ирачките безбедносни власти.

Подоцна, Багдади му ги доверил клучните улоги на Етави, како што се верското учење и изборот на командант на Исламската држава. По уривањето на групата во 2017 година, Етави заедно со сопругата Сиријка побегнал во Сирија.