Црна хроника
Кривични пријави против 15 лица за криумчарење мигранти
Македонската полиција во неделата потврди дека открила организирана криминална група која во подолг временски период вршела криумчарење на мигранти од Грција, преку Македонија во Србија од каде истите понатаму илегално се пренесувани до заподноевропските земји.
Акција под оперативно име „Коридор“ беше спроведена во саботата од страна на Единица за трговија со луѓе и криумчарење на мигранти при ЦСОСК по повеќемесечна спроведена истрага.Како организатори на криминалната група се идентификувани лицата С.Б. (52), А.И. (36) А.И. (30) сите од с. Лојане – кумановско, В.Д. (32) од Богданци и О.А. (30) од Судан.Тие организирале канал за криумчарење на мигранти преку македонска територија како дел од меѓународна криминална мрежа за криумчарење на мигранти, соопшти МВР. Во договор со државјанин на некоја од арапските земји, кој престојувал во Грција, од средината на декември минатата година, преку Македонија успеале да прокриумчарат повеќе од 250 мигранти по потекло од Авганистан, Пакистан, Судан, Сирија и други арапски и африкански земји. Криминалната група наплаќала од 120 до 200 евра по мигрант за транспорт од границата со Грција до Кумановскиот регион, каде мигрантите биле привремено сместувани, и потоа за сума од околу 300 евра по мигрант се вршело нивно илегално префрлање во Србија. Дел од паричните средства биле наплаќани во готово од мигрантите, а дел од парите преку користење на брз трансвер на пари се префрлани на име на организаторите на криминалната група од с.Лојане, при што истите имаат остварено значителна имотна корист.Криумчарењето на мигрантите, членовите на криминалната група го вршеле на тој начин што НН лицето кое престојува во Грција, заедно со суданскиот државјанин О.А. кој илегално престојува во Македонија, го договарале датумот, терминот и бројот на мигрантите кои илегално требало да бидат пренесени преку македонска територија, по што во соработка со лицата од Лојане како и лицето од Богданци, го договарале, планирале и реализирале прифаќањето, транспортот и временото засолнување.Така, дел од групата предводена од В.Д. имала задача за организирање на прифаќањето на мигрантите во реонот на Богданци и Гевгелија, како и нивниот транспорт кон Куманово (најчесто по магистралниот пат Свети Николе – Куманово. т.н „Нато Петља“ и погодно место на автопатот Скопје – Куманово, во близина на рафинеријата “ОКТА“), од каде што С.Б. А.И. и А.И. вршеле прифаќање на мигрантите и истите ги транспортирале, најчесто кон с.Лојане и с.Ваксинце, и таму времено ги засолнувале. Во наредните денови во договор со членови на криминални групи од Србија, тројцата го организирале илегалното пренесување на мигрантите преку македонско-српската државна граница во близина на с.Лојане во правец на Миратовац, Србија, кадешто мигрантите биле прифаќани од страна на НН лица и транспортирани во правец на Белград, од каде им се организирало натамошното криумчарење кон земјите на ЕУ.За реализација на прифаќањето, превозот и временото засолнување, организаторите на групата С.Б., В.Д., А.И. и А.И. ги ангажирале членовите на криминалната група К.Д. (31), Р.М. (25), И.А. (33) од Богданци; Т.К. (23), Б.П. (21) од Гевгелија; како и Р.И. (48), И.И. (19), А.Х. (19) и Ф.А. (22) сите од Куманово, иако во повеќе случаи организаторите и самите непосредно учествувале во нивните “операции“.За транспорт на мигрантите од Гевгелија кон Куманово, најчесто користела ПМВ со такси ознаки на такси компанијата од Гевгелија во сопственост на В.Д. За транспорт, пак, на мигрантите од Куманово кон с.Лојане, криминалната група од липковскиот регион, предводена од С.Б., А.И. и А.И. ги користела своите приватни ПМВ и комби возила.Во извршувањето на криминалните активности на криминалната група било инволвирано и лицето Л.К. (37) од Скопје, вработен во МВР, кој активно ја помагал криминалната група со оддавање на информации за поставеноста на полициските патроли, времето на патролирање, како и со обезбедување на “чист пат“ при транспортот на мигрантите, за што добивал парични средства од страна на организаторот на група В.Д.За време на спроведувањето на истрагата во два наврата е пресечен транспорт на мигранти во кои биле инволвирани членови од криминалната група. Во рамки на реализацијата на случајот вчера, врз основа на добиена Судска наредба, беа извршени пет претреси во домови во Лојане како и пет претреси на подрачјето на Гевгелија и Богданци. Од извршените претреси пронајдени и одземени се седум патнички моторни возила со кои бил вршен транспортот на мигрантите од Гевгелија до Куманово. Исто така заедно со лицето О.А. од Судан пронајдени се и двајца илегални мигранти по потекло од Судан. Исто така, одземени се и 3380 евра, 30 швајцарски франци, 1720 српски динари и 10 потврди за трансакции на парични средства преку фирми за брз трансвер на пари.Сите лица, членови на криминалната група инволвирани во криминалните активности на криумчарењето на мигрантите во текот на вчерашниот ден беа предадени пред надлежен истражен судија при основен суд Скопје I Скопје. Поднесена е кривична пријава против организаторите на групата: С.Б., О.А., В.Д., А.И. (36) и А.И. (30), за сторено кривично дело – “организирање на група и потикнување на извршување на делата трговија со луѓе и криумчарење на мигранти“ од член 418-в став 1 од КЗ на РМ и кривични дела – “криумчарење на мигранти“ по член 418-б став 2 вв став 1 од КЗ на РМ.Исто така кривично пријавени се членовите на групата К.Д., Р.М., И.А. (33) од Богданци; Т.К. и Б.П. од Гевгелија; Р.И., И.И., А.Х. и Ф.А. сите од с.Лојане., како и полицискиот службеник Л.К. од Скопје.Истражен судија на пријавените веќе им одреди мерка притвор во траење од по 30 дена, а се преземаат натамошни мерки за целосно расветлување на случајот./крај/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Скопјанец измамен во менувачница од двајца странски државјани
Скопјанец пријавил дека во менувачница во Старата скопска чаршија бил измамен од страна на двајца странски државјани за сума од 25.000 евра, информираат попладнево од Министерството за внатрешни работи.
Синоќа во 19.15 часот во СВР – Скопје, Х.М., на возраст од 34 години од главниот град на државава, пријавил дека околу 15 часот во менувачница во Старата скопска чаршија бил измамен од двајца странски државјани.
Според пријавеното, откако се договориле во менувачницата да сменат пари за 25.000 евра, лицата дошле со чанта со договорената сума на пари во денари, при што еден од нив ја заменил чантата со денари со друга иста чанта, која во долниот дел била полна со хартиени ливчиња.
Како што пријавил Х.М., тој им ги дал еврата без да ја провери чантата, а откако заминале, сфатил дека е измамен, појаснуваат од МВР.
Се преземаат мерки за расчистување на случајот.
Црна хроника
Пожар во Дом за стари лица во струмичко Банско, нема повредени
Пожар синоќа избил во Дом за стари лица во село Банско, Струмичко. Нема повредени лица, предизвикана е само материјална штета, соопшти Центарот за управување со кризи (ЦУК).
Според Регионалниот центар за управување со кризи – Струмица, пожарот бил пријавен околу 23.30 часот. Во гаснењето на пожарот интервенирале седум пожарникари со две противпожарни возила. Пожарот целосно е изгаснат во 50 минути по полноќ.
– Прво биле евакуирани лица од катот каде што бил пожарот, потоа од долните катови. По целосното гаснење на пожарот, евакуираните лица полека се вратени на местата, собите од каде што биле евакуирани. Причината за пожарот и материјалната штета дополнително ќе бидат утврдени, појаснуваат од ЦУК.
Во денешното соопштение се наведува и дека изминатото деноноќие имало вкупно 1.759 повици на единствениот повикувачки број за итни случаи – 112 во ЦУК.
Црна хроника
Притвор за осомничен за спречување на полициски службеници да фатат побегнат затвореник
Основното јавно обвинителство Кавадарци поведе постапка против 18-годишник за кого постои основано сомнение дека сторил кривично дело – Спречување службено лице во вршење службено дејствие од член 382 став 3 во врска со став 2 и став 1 од Кривичниот законик.
На 2 мај, во куќа на улицата “Димката А. Габерот” во Кавадарци, двајца инспектори од МВР преземале службено дејствие – фаќање побегнат затвореник од КПУ Гевгелија, кој бил роднина на сега осомничениот.
Затвореникот давал отпор при обидот да биде лишен од слобода за доизвршување на затворската казна, во што сега осомничениот го поддржал, се нафрлил врз еден од полициските службеници, го влечел и го гребел, нанесувајќи му телесни повреди.
Затвореникот успеал да се ослободи и да побегне, но подоцна бил фатен и вратен во затворот. Осомничениот исто така избегал во прв момент, но бил лишен од слобода, а по предлог на јавниот обвинител, Основниот суд во Кавадарци му определи притвор во траење од осум дена.