Претседателката на државата, Гордана Сиљановска-Давкова, и годинава беше дел од манифестацијата „Галичка свадба“, каде што одблизу ги проследи свадбарските обичаи кои со децении го негуваат македонското културно наследство и ја афирмираат националната традиција.

Како што информира Кабинетот на претседателката, Сиљановска-Давкова им честитала на младенците Лилјана Михајлоска и Јован Филипоски, посакувајќи им среќен и исполнет заеднички живот, полн со љубов, разбирање и многу деца. На новиот брачен пар, претседателката им подари „галичка пафта“ – симболичен подарок со мотив од мијачката носија, карактеристична за регионот на Галичник.

Претседателката истакна дека „Галичка свадба“ не само што ги негува традициите, туку ја промовира македонската култура на светската сцена.

„Нешто што е дел од нашиот идентитет, нешто што нѐ прави посебни и уникатни мора да се зачува. Радосна сум што младите ја прифаќаат оваа традиција и ја продолжуваат“, рече Сиљановска-Давкова.

Таа додаде дека Галичник, со својата автентична архитектура, историја и природна убавина, има потенцијал да биде културно-туристички центар што ќе живее преку целата година, а не само за време на свадбарската манифестација.

Манифестацијата започна со поставување на свадбарскиот бајрак и симболичното „фрлање“ пушка од куќата на зетот, а по венчавањето во црквата „Св. апостоли Петар и Павле“, продолжија традиционалните обичаи.

„Галичка свадба“ традиционално се одржува околу празникот Петровден, време кога печалбарите се враќале во родниот крај за да се женат, а оваа културна манифестација со децении се одржува под покровителство на претседателот на државата.

Тројца загинати, меѓу кои и 13-годишно дете, е исходот од трагичниот настан што се случи на 12 јули 2025 година во Прилеп, а кој полицијата го води како кривично-правен настан „убиство и самоубиство“. Според официјалните информации од СВР Битола – ОВР Прилеп, сè започнало кога 62-годишниот П.Ѓ. од Прилеп телефонски го поканил својот внук од сестра П.Ч. (43) да дојде во неговиот дом, но со јасна инсистенција да го поведе и својот малолетен син.

П.Ч. ја информирал својата сопруга дека тргнува со детето на гости кај вујкото, по што заминале во непозната насока. Сведоци во близина на куќата на П.Ѓ. потоа слушнале истрели од огнено оружје меѓу 15:30 и 16:00 часот, но немало пријава до полицијата во тој момент.

Како што информира полицијата, во 17:10 часот на фејсбук-профил кој му припаѓа на П.Ѓ. бил објавен статус со сомнителна содржина, во кој ги споменува сестра му и нејзиниот син. Поради содржината, се претпоставува дека објавата била напишана по убиството на П.Ч. и неговото дете.

Кога сопругата на П.Ч. не успеала да ги добие на телефон, самата тргнала до куќата на П.Ѓ. На лице место го затекнала автомобилот на својот сопруг, но и покрај повиците никој не одговарал од внатрешноста. Околу 21:20 часот го пријавила случајот во ОВР Прилеп, укажувајќи дека нејзиниот сопруг и синот веројатно се во куќата на неговиот вујко.

Веднаш по пријавата, полициски службеници се упатиле на ул. „Стеван Апостолоски“ каде по неуспешен обид да добијат одговор на вратата, со наредба од јавен обвинител ја отвориле со употреба на сила. Внатре, П.Ѓ. фрлил рачна бомба кон полицијата која само чадела, но не експлодирала. Потоа започнал да пука кон полициските службеници, кои возвратиле со оган.

Околу 22:40 часот, преку радио врска било пренесено дека се пука од куќата кон полицискиот тим. По кратко време, П.Ѓ. со огнено оружје си го одзел животот.

Во 01:20 часот, во присуство на јавен обвинител, екипи на ОВР Прилеп извршиле увид во куќата. Биле пронајдени чаури, траги од проектили, пиштоли од калибар 9 мм и 7,65 мм, една неексплодирана бомба М93, документи, парични средства, како и имотни договори.

Јавниот обвинител издал наредба за обдукција на трите тела.

Првите 20 километри од автопатот Кичево – Охрид, на потегот од Врбјани до Ботун, денеска се пуштени во употреба. Овој момент, според Владата, претставува пресвртна точка и симбол на работата, посветеноста и разликата во пристапот кон големите проекти меѓу актуелната и претходната власт.

На свеченоста присуствуваше премиерот Христијан Мицкоски, кој порача дека не се работи само за пуштање на делница, туку за враќање на довербата на граѓаните.

„Само една година откако ја презедовме одговорноста за водење на државата, успеавме да го откочиме еден од најзаглавените инфраструктурни проекти. Овој автопат беше симбол на застој и срам, а денес е симбол на новото време. Секој метар е изграден со напор и волја да се стави крај на неуспесите од минатото“, изјави премиерот.

Тој најави дека веќе следната година автопатот Кичево – Охрид ќе биде целосно завршен и ставен во функција.

„Ова нема да биде случајна победа, туку планиран успех и резултат на секојдневна одговорна работа“, додаде Мицкоски.

Оптимизам за иднината изрази и вицепремиерот и министер за транспорт и врски Александар Николоски, кој оцени дека со оваа делница се отвораат нови можности за граѓаните и туризмот во регионот.

„Ова е автопат кој ги поврзува Кичево, Охрид и Струга со Скопје, Тетово и Гостивар, но и со Албанија. Веќе денес, овие први 20 километри се реалност и корист од нив ќе имаат сите“, нагласи Николоски.

Тој потсети дека проектот бил оставен во заборав и запустен од претходната Влада.

„Ова беше симбол на неспособноста на СДСМ и ДУИ. Немаше ниту работници, ниту инженери, ниту механизација. А денес е доказ за нашата посветеност и тоа е клучната разлика“, рече Николоски, додавајќи дека е симболично што првиот дел се отвора токму во славна Дебарца.

Изградбата на целокупниот автопат, кој е со вкупна должина од 57 километри, треба да биде завршена до крајот на 2026 година.