Најмалку 55 припадници на забранетата Работника партија на Курдистан (PKK) се убиени во нападите на турските борбени авиони врз курдските кампови во северен Ирак во текот на изминатата ноќ, соопштиле во саботата воени извори.

Авионите полетале од базата во Дијарбекир, во југоисточна Турција, и подоцна се вратиле неоштетени, изјавиле неименувани воени извори за Reuters.

Во меѓувреме приватната турска агенција Dogan објави дека во саботата најмалку 85 милитанти на PKK се убиени во воздушните напади во југоисточната турска покраина Тунчели и во областа Синат-Хафтанин во северен Ирак.

Во југоисточна Турција, каде што живее мнозинско курдско население, речиси секојдневно има судири меѓу турските безбедносни сили и герилците на PKK. Турската страна одговара со чести бомбардирања во северен Ирак во тамошната автономна курдска покраина, каде што PKK има свои кампови за обука. Анкара не покажува знаци на ублажување на нападите врз бунтовниците пред парламентарните избор кои ќе се одржат на 1-ви ноември.

PKK го започна својот сепаратистички бунт во 1984 година, во кој се загинати повеќе од 40.000 луѓе. Курдската организација којашто вели дека се бори за поголема курдска автономија, е прогласена за терористичка организација во Турција, САД и ЕУ.

Со обновените судири кои започнаа кон крајот на јули годинава, дефинитивно беа урнати мировните преговори меѓу Анкара и PKK започнати во 2013 година, по што свете страни се обвинуваат за неисполнување на договореното.

Турскиот претседател Реџеп Тајип Ердоган најави дека судирот нема да престане „сé додека има и еден терорист“./крај/мф/сн

Извор: Макфакс