Македонија
Мицевски: Заев и Ангеловска го скроија најрасипничкиот буџет во историјата на независна Македонија
Зоран Заев и Нина Ангеловска го скроија најголемиот, најрасипнички, најкоруптивен и најнеразвоен буџет во историјата на независна Македонија. Удираат по џебот на граѓаните, собираат пари за луксузирање, а капиталните инвестиции им се помали и од најлошите години. Власта за 2020 година предвидува да потроши неверојатни 4 милијарди евра, порача Никола Мицевски, координатор на пратеничката група на ВМРО-ДПМНЕ.
„Буџетот за в година е поголем за 200 милиони евра од буџетот за оваа година, а сумата што се одвојува за капитални инвестиции и процентуално и номинално е помала од сумата што беше предвидена за оваа година. Наместо буџетот да придонесува за подобрување на квалитетот и продуктивноста на администрацијата, Заев и Ангеловска со овој буџет прават класичен поткуп за претстојните парламентарни избори манипулирајќи ги граѓаните велејќи дека вложуваат во човечки капитал.
Треба да се има проекти за да се оспособат младите луѓе, тоа е капитал, а вака тие се само потрошувачи. Овој буџет не создава услови за капитал, а што имаме ние во услови кога се зголемува буџетот, се намалуваат инвестициите.
Исто така, слушаме нов поим во науката – инвестиции во човечките ресурси, во исплата на плати во државната администрација, која не е намалена, туку уште се зголемува заради партиски цели, а овој буџет, единствено треба да помогне во предизборниот период за потребите на СДСМ.
Ова не е ни приближно вложување во човечки капитал, туку класичен пример за буџет што треба да служи за поткуп, уцени и корупција со гласачите.
Заев и Нина Ангеловска во услови кога го зголемуваат буџетот за 200 милиони евра, наместо да покачат, ја намалуваат ставката за капитални инвестиции за 43 милиони евра.
За споредба, пред доаѓањето на власт на оваа најнеспособна гарнитура, ставката за капитални инвестиции изнесувала од 10 до 15 отсто од буџетот, а сега минатогодишните 6,5 отсто ги намалуваат на 5 отсто од буџетот. Тоа е рамно на катастрофа.
Се предвидуваат над 200 милиони евра повеќе, а ниту евро повеќе за автопати, железници, гасоводи. Нема пари за развој, но има за изборен поткуп.
Додека парите за развој се намалуваат, се зголемуваат средствата во ставката стоки и услуги.
Владата планира в година да потроши 180 милиони евра повеќе на стоки и услуги, односно цели 835 милиони евра. Значи, речиси една милијарда евра фрлени во ветер.
Овие 835 милиони евра власта планира да ги потроши на тендери, привремени вработувања, со цел изборен поткуп и исплата на патни трошоци. После сите се чудиме како Пендаровски мртов ладен изјавува дека би заминал од Македонија доколку не бил избран за претседател, а младите засилено веќе бегаат од државата.
Со новиот буџет нема средства за „Чебрен“ и „Галиште“, ниту за ТЕЦ „Неготино“. Нема пари ниту за енергетски развој, ниту за нови проекти во секторот за користење природен гас. Нема пари ниту за борба против загадениот воздух, а генерално на жабри ќе дише Министерството за животна средина, кое ќе добие под 1 отсто од буџетот.
Оваа власт, која дојде ветувајќи подобро образование, в година предвидува 17 отсто помалку во буџетот за наука од оваа година. Значително се намалуваат и средствата за изградба на основни и средни училишта, како и за студентски домови.
Екстра пари ќе нема ниту за здравството, а граѓаните и медицинскиот персонал нема да видат ништо ниту од нови, модерни и поскапи медицински апарати.
Овој буџет е расипнички и не води грижа за развојот на државата и идните генерации.
Единствено позитивно во овој буџет е што оваа неодговорна, неспособна и расипничка власт нема да може да го троши по 12 април.
Ваквиот буџет ќе претрпи значителен ребаланс со доаѓањето на ВМРО-ДПМНЕ на власт кога ќе бидат одвоени повеќе средства за развој, капитални проекти и креирање додадена вредност за државата и граѓаните.
На 12 април завршува расипничкото трошење на народните пари. По 12 април, следува обнова на Македонија со ВМРО-ДПМНЕ“, вели Мицевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Нема бојкот на претседателските избори, сите што излегле на парламентарни, гласале и за претседател, уверува Даштевски
Нема бојкот на претседателските избори, сите што излегле на парламентарни, гласале и за претседател, вели претседателот на ДИК, Александар Даштевски.
„На неколку места се појавени технички проблеми, кои во меѓувреме се решаваат, таму гласањето ќе продолжи на стар начин со УВ ламба и спреј, а доколку се исправат техничките недостатоци, ќе се продолжи со техничката опрема. Такви места има во Кочани, Охрид, во Куманово, во Тетово и во Гази Баба.
Како што дополнува, има доставено и 15 приговори за избирачко право, и само три од нив се одбиени.
Во однос на излезноста на парламентарните избори, до 9:00 часот, по обработени податоци од 1033 изборни места, гласале 4,45%. Според податоците на ДИК, најголема излезност има во Пробиштип, а најмала излезност за парламентарните избори има во Боговиње (1,43%).
Во Македонија утрово започна вториот круг од претседателските и парламентарните избори.
Избирачките места, од кои вкупно 3.480, беа отворени во седум часот, а ќе бидат затворени во 19 часот.
Скопје
Паркингот во Центар денеска е бесплатен
По повод Македонските претседателски и парламентарни избори, од ЈП Паркинзи на општина Центар известуваат дека денеска паркиралиштата со кои стопанисува јавното претпријатие ќе бидат без наплата за сите граѓани.
Дирекцијата на ЈП Паркинзи на Општина Центар во катната гаража „Судска палата“ нема да работи, а сите услуги можат да се користат електронски на www.poc.mk.
Редовната наплата за паркирање на паркиралиштата и работењето на дирекцијата ќе продолжат од утре со вообичаено работно време.
Македонија
Изборниот ден е неработен за сите граѓани
Поради одржување на парламентарните и вториот круг од претседателските избори, денешниот ден е неработен за сите граѓани во Република Македонија.
Работодавачите не треба да извршуваат дејност со исклучок на оние каде работните процесите заради својата природа не можат да се прекинат.
Поради првиот круг од претседателските избори, неработен беше и 24 април. Според одлуката на техниката Влада, двата неработни дена нема да се одработуваат.