Во Основниот суд во Скопје, во петок продолжи судењето за другите обвинети во „Монструм“, каде пред судот сведочеа вешти лица од МВР, јави репортерот на „Макфакс“.

Според нивните вештачења, една чаура од пукањето во кое учествувал обвинетиот Фејзи Азири на фармата во селото Белимбегово во 2009 година се совпаѓала со 11 чаури што биле најдени на местото на петкратното убиство кај Смилковското Езеро.

Според вештите лица, чаурите биле испукани од автоматска пушка, која се користела и во убиството.Но, одбраната на обвинетите изрази сомнеж за ова вештачење бидејќи не се пронајдени ниту зрната, ниту пак оружјето со кое биле испалени чарите што се совпаѓаат.

Тие побараа да се направи вештачење во друга странска институција, јави репортерот на „Макфакс“.

Алил Демири, Африм и Агим Исмаиловиќ, Фејзи Азири, Рами Сејди, Хаки Азири се обвинети за тероризам, а според обвинителството тие на 12-ти април 2012 година во очи Велигден со цел да влеат страв кај македонското население и да се загрози безбедноста на земјата, кај Смилковското езеро убија петмина.

Обвинетите Африм Исмаиловиќ и Алил Демири кои беа во бегство, се наоѓаат во притвор на Косово поради нелегално поседување на оружје, и се чека на нивната екстрадиција.

Во петок тие беа осудени од приштинскиот суд на две односно две и пол години затвор./крај/мф/фф