Европа
Лондонски таксист осуден на две доживотни казни за силување
Џон Ворбојс, познат како „Џон Радфорд, силувач од црното такси“, е осуден на две доживотни казни затвор со минимален рок од шест години за напад на уште четири други жени, јави Би-би-си.
62-годишниот Ворбојс беше затворен во 2009 година за напад врз 12 жени во Лондон, но откако одборот за условна казна објави дека ќе биде ослободен, се јавија уште четири жени, кои го обвинија за напад. Ворбојс беше затворен на неодредено време во 2009 година, со минимален рок од осум години, откако беше прогласен за виновен за 19 сексуални напади врз 12 жени меѓу 2006 и 2008 година.
Минатата година одборот за условна казна се премисли и одлучи дека престапникот треба да остане во затвор. Обвинителот Данкан Пени изјави дека психијатарот Филип Џозеф утврдил оти Ворбојс фантазирал за напади на жени уште од 1986 година. Во извештајот од август годинава се вели дека субјектот е потенцијално опасен сега исто како што бил во времето на изрекувањето на првата казна.
Откако четири жени го пријавиле за напад, Ворбојс се изјаснил за виновен по две обвининија кои се однесуваат на давање дрога со намера за силување.
Пени објасни дека насилникот ја нападнал првата од четирите жртви кои подоцна пријавиле, во 2000 или почетокот на 2001 година, по излегување во бар во населбата Сохо. Втората жртва, студентка која живеела во северен Лондон, била нападната во 2003 година. Ја собрал од улица откако ноќта ја минала со пријателите во ноќен клуб. Третата жртва била нападната од Ворбојс во 2007 година при ноќна забава, откако ѝ рекол дека добил на лотарија и ја понудил со шампањ. Четврта жртва ја издрогирал во Бурнмут.
Полицијата верува дека покрај овие злосторства, Ворбојс извршил над 100 силувања и сексуални напади врз жени во Лондон.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Венеција заработи огромна сума на пари со наплата на влезници во градот за само 11 дена
Новововедениот билет за туристите на еднодневно патување во Венеција на градот му донесе приход од 975 илјади евра во првите 11 дена од пробниот период.
Билетот, кој првпат беше воведен на 25 април, се наплаќа по стандардна цена од пет евра.
Градот објави дека продал вкупно повеќе од 195.000 билети, што е малку над очекувањата, пренесува Независне новине.
Влезот ќе се наплаќа во повеќето саботи и недели до средината на јули, кога градот ќе ја разгледа цената.
Како општо правило, целодневните посетители помеѓу 8:30 и 16:00 часот се обврзани да платат влезница и да добијат QR код, кој служи како доказ за плаќање. Ако не го сторат, може да платат казна од 300 евра.
Домашните жители, гостите кои преноќуваат, студентите и децата под 14 години се ослободени од плаќање.
Со околу 15 милиони посетители годишно, Венеција е една од најпосетуваните туристички дестинации во светот.
Масовниот туризам му носи многу приходи на градот, но и гужвите создаваат големи проблеми. Не е познато дали Венеција ќе ја задржи таксата по пробниот период.
Европа
(Видео) Украина уништи моќен руски ракетен лансер
Ракетата TOS-1A LANSER често се нарекува тежок фрлач на пламен поради специфичната термобарична муниција што ја истрелува, која е ефикасна против силно утврдените одбранбени позиции.
The warriors from the 93rd Mechanized Brigade destroyed another "no-analogue" russian TOS-1A Solntsepyok heavy flamethrower system with the use of a night-vision FPV drone. pic.twitter.com/lS22jAGa8o
— Defense of Ukraine (@DefenceU) May 7, 2024
„Војниците од 93-та механизирана бригада уништија уште еден руски тежок пламен фрлач TOS-1A Solntsepyok користејќи беспилотно летало за ноќно гледање FPV“, се вели во објавата на Твитер. Не е наведено кога и каде се случил нападот.
Вредноста на еден таков систем се проценува на 6,5 милиони долари.
Европа
Русија и Украина меѓусебно се обвинуваат за употреба на забрането хемиско оружје
Русија и Украина меѓусебно се обвинуваат за употреба на забрането хемиско оружје на бојното поле, објави Организацијата за забрана на хемиско оружје.
Организацијата за забрана на хемиско оружје соопшти дека наводите се „недоволно потврдени“ со доказите, но во соопштението се додава:
„Ситуацијата останува нестабилна и крајно загрижувачка кога станува збор за потенцијалната употреба на токсични хемикалии како оружје“.
Ниту Русија ниту Украина официјално не побарале од организацијата да ја истражи наводната употреба на хемиско оружје, се вели во соопштението.
Минатата недела, САД соопштија дека Русија ја прекршила меѓународната забрана за употреба на хемиско оружје, која е надгледувана од Организацијата.
Таа, наводно, користела хлоропикрин, моќен пестицид што се користи во земјоделството и е забранет за воена употреба, против украинските трупи и користела хемиски соединенија кои привремено ги онеспособуваат луѓето, како солзавец, „како метод за војување“ во Украина.
Ова следеше по украинските тврдења во април дека Русија ја засилила употребата на солзавец во рововите. Русија ги отфрли обвинувањата, а украинските власти не одговорија на барањето на Ројтерс за коментар во вторникот.
Организацијата за забрана на хемиско оружје соопшти дека ја следат ситуацијата од февруари 2022 година, кога Москва ја нападна Украина. Според Конвенцијата за хемиско оружје, секоја токсична хемикалија што се користи за да предизвика повреда или смрт се смета за хемиско оружје.
Употребата на токсични агенси на бојното поле во војна е против Конвенцијата, соопшти Организацијата за забрана на хемиско оружје. „Доколку се користат како метод на војување, овие агенси се сметаат за хемиско оружје и затоа, според Конвенцијата, тие се забранети“.