Во Страчинци се засадуваат 15.000 багреми. Од Општина Гази Баба велат дека ова место е избрано за оваа акција затоа што според студијата за ерозија што ја направиле како Општина со експертите од Шумарскиот факултет, Страчинци заедно со населените места Раштак, Булачани, Црешево, Виниче и Брњарци, спаѓа во едно од најкритичните ерозивни подрачја во општината.

„Затоа, засадуваме багреми, кои лесно се фаќаат како дрвја и кои ја собираат водата од почвата и прават заштита за идните поголеми количества вода од дождовите, кои може да бидат причина за ерозија на почвата, особено на вакви суводолици. Со ова во иднина ќе се спречи создавање елементарни промени на почвата од големите количества вода, кои носат големи ерозивни наноси кои предизвикуваат големи штети. Оваа акција е од големо значење за овој регион, кој е суводолица токму поради бесправната и дива сеча што во последните 10 години има сè поголем замав на Скопска Црна Гора. Од друга страна, овој регион неколкупати беше зафатен од пожари во летниот период, со што значително го збогатуваме шумскиот фонд“, рече градоначалникот Георгиевски.

Тој агласи дека целта е да се спречи водната ерозија во овој регион и никогаш да не се дозволи да се повтори катастрофалната поројна поплава, која се случи во август 2016 година, во која најзасегнати беа токму овие села во подножјето на Скопска Црна Гора.

„Во изминатите 2 години извршивме чистење на речните корита во Црешево, Виниче и Страчинци, каде што се чистеа каскадните постави на каналите сè со цел да се ублажи големото количество вода од овие предели. Заедно со краткорочните мерки, кои предвидуваат чистење на каналите и пошумување, како долгорочна мерка Општина Гази Баба изработи нов основен проект за нов ободен канал, кој предвидува да ги собере сите речни корита и суводолици почнувајќи од поројните реки што доаѓаат од атарот на селата Црешево, Виниче, Страчинци и Брњарци за на крајот да се влее во одводниот канал и да не дозволи да им направи штета на инфраструктурата и на земјоделството, како што беше случајот во 2016 година по поплавата“, додаде Георгиевски.

Општина Гази Баба и Владата преземаат конкретни мерки за заштита на животната средина, но граѓаните мора да се вклучат во одржувањето на околината околу себе затоа што секој наш труд нема да се исплати доколку жителите и понатаму ги сечат дрвјата што ние ги садиме, да ги полнат каналите што ние ги чистиме и намерно да предизвикуваат пожари само за свои цели. Колку повеќе се вклучиме во чувањето и одржувањето на животната средина, толку повеќе ќе ја имаме, од нас зависи, посочи градоначалникот на општина Гази Баба.

Акцијата за пошумување ја поддржаа претседателот на РСМ, Стево Пендаровски, министерот за земјоделство, шумарство и водостопанство, Трајан Димковски, заменик-министерот за животна средина и просторно планирање, Јани Макрадули, Дејан Павлески, заменик-министер за локална самоуправа, ЈП „Национални шуми“, спортисти, волонтери, акцијаши и граѓани.